ახალი ამბები

ამერიკის საელჩოს კულტურის ატაშე დემიენ უომფლერი, ფულბრაიტის გაცვლითი პროგრამის ხელმძღვანელი მიქაელა იოვანე და ამავე პროგრამის მკვლევარი უილიემ ფრიკი ბათუმის შოთა რუსთაველის სახელმწიფო უნივერსიტეტს ეწვივნენ. დელეგაციის წევრებმა უმაღლესი საგანმანათლებლო დაწესებულებაში გამართულ გაცნობითი ხასიათის შეხვედრაზე სამომავლო თანამშრომლობის მნიშვნელობასა და ერთობლივი პროექტების განხორციელების შესაძლებლობებზე ისაუბრეს. ვიზიტის ფარგლებში სტუმრები ბსუ-ს საგანმანათლებლო პროგრამებსა და საუნივერსიტეტო ცხოვრებას გაეცნენ. შეხვედრის დასასრულს, უნივერსიტეტის რექტორის მოადგილემ ინგა შამილიშვილმა სტუმრებს სამახსოვრო საჩუქრები გადასცა.

ბათუმის შოთა რუსთაველის სახელმწიფო უნივერსიტეტს მაგდებურგის უნივერსიტეტისა და გერმანიის საერთაშორისო თანამშრომლობის საზოგადოების (GIZ) წარმომადგენელთა დელეგაცია ეწვია. შეხვედრა მიზნად ისახავდა პროფესიული განათლების მასწავლებელთა მოსამზადებელი ერთობლივი პროგრამის შექმნას. მხარეებმა ასევე ისაუბრეს პროფესიული განათლების ადმინისტრირებისა და მართვის ორმხრივი სამაგისტრო პროგრამის ამოქმედების მნიშვნელობაზე, რომლის ფარგლებშიც სტუდენტები ერთ ნაწილს გერმანიაში გაივლიან, ხოლო მეორე ნაწილს - საქართველოში.

6-7 ოქტომბერს, ბათუმის შოთა რუსთაველის სახელმწიფო უნივერსიტეტში პროექტის „მედია და კულტურის მეცნიერების მიმართულების განვითარების’’ ფარგლებში, ქართველი და გერმანელი პროფესორების მონაწილეობით მედიისა და კულტურის საკითხებზე სემინარები და დისკუსიები გაიმართა.

მიმდინარე წელს ბსუ-ს მონაწილეობით 22 ახალი საერთაშორისო გაცვლითი პროგრამა დაფინანსდა. პროგრამის ფარგლებში, სტუდენტებსა და აკადემიურ პერსონალს საშუალება აქვთ ისწავლონ და კვალიფიკაცია აიმაღლონ ევროპის ქვეყნების შემდეგ უმაღლეს საგანმანათლებლო დაწესებულებებში: ავსტრია, ბულგარეთი, გერმანია, ესპანეთი, თურქეთი, იტალია, ლიტვა, ნორვეგია, რუმინეთი, პოლონეთი, საფრანგეთი, საბერძნეთი.

ბათუმის შოთა რუსთაველის სახელმწიფო უნივერსიტეტში ახალი სასწავლო წელი დაიწყო. პირველკურსელებს უნივერსიტეტის რექტორი მერაბ ხალვაში, ფაკულტეტების დეკანები, პროფესორ-მასწავლებლები შეხვდნენ, სტუდენტობა მიულოცეს და საუნივერსიტეტო ცხოვრება გააცნეს. 2016-2017 სასწავლო წელს ბსუ-ში 1015 პირველკურსელი ჩაირიცხა, რომელთაგან სასწავლო გრანტი 58-მა მიიღო, ხოლო 10 უფასო სახელმწიფო საგანმანათლებლო პროგრამაზე 419 ახალგაზრდა ისწავლის. საინფორმაციო შეხვედრების დასასრულს, ბაკურ სულაკაურის გამომცემლობისა და წიგნის მაღაზია „სანტა ესპერანსას“ ორგანიზებით წიგნის სამდღიანი ფესტივალი გაიხსნა. ღონისძიების ფარგლებში შეხვედრა გაიმართა მწერლებთან დათო ტურაშვილთან და ლაშა ბუღაძესთან.