ახალი ამბები

ტემპუსის პროექტის LMPH-ის ფარგლებში, ბათუმის შოთა რუსთაველის სახელმწიფო უნივერსიტეტს გრენობლის აკადემიის რექტორი მიშელ ბროსე და პროექტის კოორდინატორი, გრენობლის უნივერსიტეტის პროფესორი ჟან ნოელ პიშუ ეწვივნენ. სტუმრებმა უნივერსიტეტის რექტორთან მერაბ ხალვაშთან, ტურიზმის ფაკულტეტის დეკანთან როსტომ ბერიძესთან და პროფესორ-მასწავლებლებთან გამართულ შეხვედრაზე სამომავლო თანამშრომლობის მიმართულებებსა და გეგმებზე ისაუბრეს. ტემპუსის პროექტი „ტურიზმის ინდუსტრიის განვითარებისთვის პროფესიული, საბაკალავრო და სამაგისტრო პროგრამების დანერგვის ხელშეწყობა საქართველოში, აზერბაიჯანსა და მოლდავეთში“ 2013 წლიდან ხორციელდება და მიზნად ისახავს საქართველოში ტურიზმის საგანმანათლებლო პროგრამების შექმნას. LMPH-ი ითვალისწინებს ტურიზმის სასწავლო პროგრამებში სასტუმროს დარგის საგნების მოდიფიცირებას ევროპული აკრედიტაციისა შესაბამისად და ახალი სასწავლო მოდულების დანერგვას.

დღეს, ბათუმის შოთა რუსთაველის სახელმწიფო უნივერსიტეტში პორტოს (პორტუგალია) უნივერსიტეტის ქიმია-ბიოლოგიის მეცნიერებათა დოქტორის, მკვლევარის, პროფესორ ელიზიუ მანუელ კოშტას საჯარო ლექციათა ციკლი დაიწყო. საჯარო ლექცია თირკმლის ქრონიკულ დაავადებათა გავრცელებას, გამომწვევი მიზეზების დადგენას, დიაგნოსტიკასა და მკურნალობის თანამედროვე მეთოდებს მიეძღვნა. აგრეთვე, საუბარი შეეხო თირკმლის ტერმინალურ სტადიაზე მყოფი პაციენტებისათვის ცხოვრების ხარისხის გაუმჯობესებას.

დღეს, სასტუმრო „რადისონ ბლუში“ პროექტის „თანამედროვე კვლევითი პრაქტიკის გაძლიერება რეგიონულ სასოფლო სამეურნეო ინსტიტუტებში’’- ფარგლებში სამუშაო შეხვედრა გაიმართა. პროექტის მიზანია, რეგიონულ ინსტიტუტებს შორის გამოცდილების გაზიარება და რეგიონთაშორისი თანამშრომლობის გაღრმავება. შეხვედრაში მონაწილეობას ღებულობდა აჭარის ა.რ. სოფლის მეურნეობის მინისტრი ლაშა კომახიძე, ბათუმის შოთა რუსთაველის სახელმწიფო უნივერსიტეტის რექტორი, მერაბ ხალვაში და პრორექტორი სამეცნიერო დარგში ნათელა წიკლაშვილი.

ბსუ-ს მომავლის სამრეწველო ინოვაციების ლაბორატორიაში დამზადებული ცნობილი არქიტექტურული კონსტრუქციების მოდელები გონიოს ციხეში გამართულ გამოფენაზე იყო წარმოდგენილი. არქიტექტურული პროექტების გამოფენაზე ფაბლაბის ნამუშევრებთან ერთად აჭარისათვის დამახასიათებელი ტიპური საცხოვრებელი სახლების, კულტურული მემკვიდრეობის ძეგლებისა და ბათუმის თანამედროვე არქიტექტურის ფოტოები გამოიფინა.

ბათუმის შოთა რუსთაველის სახელმწიფო უნივერსიტეტმა "ექსპო ჯორჯიაში" გამართულ მეცნიერებისა და ინოვაციების თბილისის ფესტივალში მიიღო მონაწილეობა. ბსუ საინტერესო კუთხით იყო წარმოდგენილი და ვიზიტორთა დიდი ინტერესი გამოიწვია. ფესტივალზე გამოფენილი იყო მომავლის სამრეწველო ლაბორატორიაში სტუდენტების მიერ დამზადებული ინოვაციური პროექტები, ცნობილი შენობების მაკეტები, კონსტრუქციები, ხელნაკეთი ნივთები, ასევე ფიზიკა-მათემატიკისა და კომპიუტერულ მეცნიერებათა ფაკულტეტის სტუდენტების მიერ დამზადებული ხელსაწყოები, რომელიც ფაბ ლაბთან ერთად განხორციელდა. მოწყობილობით შესაძლებელია გარემოსა და ნივთიერების ფიზიკურ-ქიმიური პარამეტრების განსაზღვრა და სხვადასხვა საინტერესო ექსპერიმენტის ჩატარება.