დღეს, სასტუმრო შერატონში, ბათუმის შოთა რუსთაველის სახელმწიფო უნივერსიტეტსა და კომპანია „მეტრო ავრასია ჯორჯიას’’ შორის თანმშრომლობის მემორანდუმი გაფორმდა. მხარეები ერთობლივი პროექტებისა და ღონისძიებების განხორციელებაზე შეთანხმდნენ. თანამშრომლობა ტექნოლოგიური ფაკულტეტის სამშენებლო მიმართულების სტუდენტებისა და კურსდამთავრებულების დასაქმებას, პრაქტიკისა და სტაჟირების გავლას ითვალისწინებს.
ბათუმის შოთა რუსთაველის სახელმწიფო უნივერსიტეტის სტუდენტურმა თეატრმა „დასმა“ საერთაშორისო ფესტივალის - „ნიღაბი 2016“ ორ ნომინაციაში გაიმარჯვა. ბათუმელი სტუდენტები მაყურებლის წინაშე რეჟისორ როინ დვალის მიერ დადგმული სპექტაკლით - „დარისპანის გასაჭირი“ წარსდგნენ. კომპეტენტური ჟიურის გადაწყვეტილებით, ქალის საუკეთესო როლის შემსრულებლად სოციალურ და პოლიტიკურ მეცნიერებათა ფაკულტეტის მეოთხე კურსის სტუდენტი მარიამ ქიქავა დასახელდა, ხოლო ფესტივალის სპეციალური პრიზი ფესტივალის საპატიო წევრს, ბსუ-ს სტუდენტთა მომსახურებისა და მხარდაჭერის სამსახურის მთავარ სპეციალისტს როინ დვალს გადაეცა. უნივერსიტეტი სტუდენტურ თეატრ „დასს“ ულოცავს გამარჯვებას და უსურვებს წარმატებებს.
ბსუ-ს ტექნოლოგიური ფაკულტეტი სასტუმრო „შერატონში“ სამშენებლო მასალებისა და დეველოპერების მე-6 საერთაშორისო გამოფენაში მონაწილეობს. „Batumi Build 2016“ -ზე ტექნოლოგიურმა ფაკულტეტმა ფაბლაბში დამზადებული სხვადასხვა არქიტექტურული კონსტრუქციები და მაკეტები გამოფინა.
დამთვალიერებელს საშუალება ჰქონდა ადგილზევე გასცნობოდა 3D პრინტერითა და ლაზერული ჭრის აპარატით დამზადებულ ნამუშევრებს და მონაწილეობა მიეღო პირამიდების მაკეტების დამზადების პროცესში.
შოთა რუსთაველის ეროვნულმა სამეცნიერო ფონდმა 2016 წლის სახელმწიფო სამეცნიერო საგრანტო კონკურსის შედეგები გამოაქვეყნა. ბათუმის შოთა რუსთაველის სახელმწიფო უნივერსიტეტის პროფესორ-მასწავლებლების ოთხმა სამეცნიერო პროექტმა მოიპოვა გამარჯვება ფუნდამენტური კვლევებისათვის სახელმწიფო სამეცნიერო გრანტებისა და გამოყენებითი კვლევებისათვის სახელმწიფო სამეცნიერო გრანტების კონკურსში. პროფესორ მამია ფაღავას ხელმძღვანელობით სამეცნიერო პროექტი „ტაო“ (ისტორიულ-ფილოლოგიური გამოკვლევა) განხორციელდება, პროფესორ მალხაზ ჩოხარაძის ხელმძღვანელობით - “მარადიდი“, პროფესორ შოთა მამულაძის ხელმძღვანელობით - „ისტორიული ჭანეთის ცენტრალურ ნაწილში დაცული ქართული კულტურული მემკვიდრეობის ძეგლები (საფორტიფიკაციო ნაგებობები, ეკლესიები, საკომუნიკაციო და საყოფაცხოვრებო არქიტექტურის ნიმუშები)“, ხოლო ასოცოსირებულ პროფესორ მაია ვანიძის ხელმძღვანელობით - „საქართველოში წარმოებული თაფლისა და ღვინის ქიმიური შედგენილობის შესწავლა მაღალი წნევის სითხური ქრომატოგრაფირებით, ადგილმდებარეობის და სახეობრივი პასპოტიზაციის წესების დასადგენად“.
ხელვაჩაურის რაიონის სხვადასხვა სკოლის მოსწავლეები ფაბ ლაბ ბსუ-ს ეწვივნენ და ლაბორატორიის მუშაობას და თანამედროვე ტექნოლოგიებს გაეცნენ. ახალგაზრდებმა ლაზერულ მჭრელებზე და 3D პრინტერებზე მუშაობის შესახებ ინფორმაცია უშუალოდ, ფაბლაბის მენეჯერებისგან მიიღეს და ნამუშევრები დაათვალიერეს. ფაბლაბის წარმომადგენლებმა მოსწავლეებს სიმბოლური საჩუქრები გადასცეს. ერთი დღე ფაბლაბში აჭარის ა/რ სპორტისა და ახალგაზრდობის საქმეთა დეპარტამენტის ღონისძიების „ახალგაზრდობის კლუბების მხარდაჭერის“ ფარგლებში „ხელოვანთა კლუბმა“ გამართა.
