ახალი ამბები

ბათუმის შოთა რუსთაველის სახელმწიფო უნივერსიტეტში შეზღუდული შესაძლებლობების მქონე პირთა საერთაშორისო დღისადმი მიძღვნილი სამეცნიერო კონფერენცია გაიმართა თემაზე: „ევროკავშირი და შეზღუდული შესაძლებლობების მქონე პირები“. უმაღლესი საგანმანათლებლო დაწესებულების პროფესორ-მასწავლებლებმა, სტუდენტებმა, სამთავრობო და არასამთავრობო ორგანიზაციების წარმომადგენლებმა და მოსწავლეებმა მოხსენებები წარმოადგინეს შშმ პირთა აქტუალურ საკითხებზე. უნივერსიტეტის რექტორმა მერაბ ხალვაშმა ყურადღება გაამახვილა უმაღლეს საგანმანათლებლო დაწესებულებაში განსაკუთრებული საჭიროების მქონე პირთა ადაპტირებული გარემოს შექმნასა და საგანმანათლებლო პროგრამებში ინკლუზიური განათლების აუცილებლობაზე.

2-3 დეკემბერს, სორეის უნივერსიტეტში (ლონდონი, დიდი ბრიტანეთი) ტემპუსის საგრანტო პროექტი ინოტლესის (სწავლებისა და სწავლის ინოვაცია ევროპისმცოდნეობის დარგში) საბჭოს შეხვედრა გაიმართა. სამუშაო შეხვედრა ინოვაციური მეთოდების უკვე არსებულ 5 სასწავლო მოდულში ევროპისმცოდნეობის მიმართულებით დანერგვას შეეხებოდა. ღონისძიებაში საგარეო ურთიერთობათა სამსახურის უფროსი, პროექტის მენეჯერი ნანა ყურშუბაძე და ამავე სამსახურის მთავარი სპეციალისტი, პროექტის ადმინისტრაციული თანამშრომელი ხათუნა ხაბაძე ესწრებოდნენ .

შოტოკან კარატეში ევროპის ჩემპიონატში მიღწეული წარმატებისა და უნივერსიტეტის პოპულარიზაციისათვის, ევროპის ჩემპიონი, ტექნოლოგიური ფაკულტეტის სტუდენტი, ბესიკ ჩხიკვაძე უნივერსიტეტის რექტორმა მერაბ ხალვაშმა საპატიო სიგელით დააჯილდოვა. აგრეთვე, ბესიკ ჩხიკვაძეს უნივერსიტეტი მიმდინარე წლის სწავლის საფასურს სრულად დაუფარავს.

საკონტაქტო სემინარი, რომელშიც საქართველოს 14 უნივერსიტეტი იყო ჩართული დასრულდა. სემინარი ჩატარდა ქალაქ კიევში ა. წ. 28-29 ნოემბერს. ის მიზნად ისახავდა სამომავლოდ ერთობლივი პროექტების დაგეგმვას როგორც ევროპელ, ისე რეგიონის სხვა ქვეყნების კოლეგებთან. სემინარს ესწრებოდა საგარეო ურთიერთობათა სამსახურის უფროსი ნანა ყურშუბაძე.

ოდესის ეკოლოგიის სახელმწიფო უნივერსიტეტის რექტორი სერგეი სტეპანენკო, საქართველოს ეკონომიკისა და მდგრადი განვითარების სამინისტროს ჰიდროგრაფიული სამსახურის უფროსი რევაზ ბაბილუა და ევროკავშირი-საქართველოს ბიზნეს საბჭოს (EUGBC) წარმომადგენელი აჭარაში თამაზ თურმანიძე ბათუმის შოთა რუსთაველის სახელმწიფო უნივერსიტეტს ეწვივნენ. უმაღლესი საგანმანათლებლო დაწესებულების რექტორთან მერაბ ხალვაშთან, რექტორის მოადგილესთან ნათია წიკლაშვილთან, საბუნებისმეტყველო მეცნიერებათა და ჯანდაცვის ფაკულტეტის დეკანთან მარინა ქორიძესთან და პროფესორ-მასწავლებლებთან გამართულ შეხვედრაზე სტუმრებმა სამომავლო გეგმებსა და ერთობლივი პროექტების შემუშავების შესაძლებლობებზე ისაუბრეს.