ახალი ამბები

საქართველოს განათლებისა და მეცნიერების მინისტრმა თამარ სანიკიძემ ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის რეაბილიტირებული სასწავლო კორპუსი, ახლადშექმნილი ერთიანი საუნივერსიტეტო საგამოცდო ცენტრი, სამრეწველო ინოვაციების ლაბორატორია-ფაბლაბი და სტუდენტების მიერ დამზადებული პროდუქცია დაათვალიერა. ფაბლაბი ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის ბაზაზე 2015 წლის დასასრულს დაარსდა და ულტრათანამედროვე აპარატურით არის აღჭურვილი. 3D პრინტერები, ლაზერული მჭრელი და სხვა პროგრამირებადი დაზგა-დანადგარები ფიზიკურ პირებსა და კომპანიებს სხვადასხვა ინოვაციური პროდუქტის ტესტირების საშუალებას აძლევს.

დღეს, სასკაჩევანის უნივერსიტეტს (კანადა), ჯანდაცვისა და გარემოს უსაფრთხოების კანადურ ცენტრსა (CCHSA) და ბათუმის შოთა რუსთაველის სახელმწიფო უნივერსიტეტს შორის ურთიერთანამშრომლობის ხელშეკრულება გაფორმდა. ხელშეკრულება რესპირაციულ მედიცინაში ერთიანი კვლევების განხორციელებას ითვალისწინებს. ერთობლივი კვლევის მიზანი გეოგრაფიული ვარიაციების კავშირის დადგენაა ასთმის დიაგნოზთან, მის გავრცელებასა და სიმწვავესთან , რომელსაც კანადელი მკვლევარი ჯოშ ლოვსონი საბუნებისმეტყველო და ჯანდაცვის ფაკულტეტის პროფესორ ვახტანგ ბერიძესთან ერთად განახორციელებს. კანადელი დოქტორის ჯოშ ლოვსონი ვიზიტის ფარგლებში პროფესორ-მასწავლებლებისა და ექიმებისათვის ჩატარდება სემინარი მტკიცებითი მედიცინის აქტუალურ საკითხებსა და უცხოენოვანი პროგრამის სტუდენტებისათვის ღია ლექცია - ბიოსტატისტიკისა და ეპიდემიოლოგიის დარგში.

აჭარის ავტონომიური რესპუბლიკის ჯანმრთელობისა და სოციალური დაცვის მინისტრის მოადგილემ ლევან გორგილაძემ, ეკონომიკისა და ბიზნესის ფაკულტეტის სტუდენტებისათვის საჯარო ლექცია გამართა. ლექცია სოციალურ პოლიტიკას, საზოგადოების სოციალური დაცვის მექანიზმს და იმ სოციალურ პროექტებს შეეხებოდა, რომლებიც მთლიანად ქვეყანასა და აჭარის ა/რ რესპუბლიკაში ხორციელდება. სტუდენტებმა, უშუალოდ მინისტრის მოადგილისაგან მიიღეს ინფორმაცია სოციალურ სფეროში არსებულ პრობლემებსა და მიღწევებზე, აგრეთვე პასუხები მათთვის საინტერესო კითხვებზე.

საქართველოს საუნივერსიტეტო სპორტის ფედერაციის „საუნივერსიტეტო თასი - 2016“-ის ტურნირის მორიგი მატჩი ბათუმის შოთა რუსთაველის სახელმწიფო უნივერსიტეტის გამარჯვებით დასრულდა. უმაღლესი საგანმანათლებლო დაწესებულების ფუტსალის ნაკრებმა მოქმედი ჩემპიონი საქართველოს ეროვნული უნივერსიტეტის გუნდი დაამარცხა ანგარშით 6:3 და შემდეგ ტურში ოქროს 3 ქულით გადავიდა. თამაშს უნივერსიტეტის ადმინისტრაციის წარმომადგენლები ესწრებოდნენ.

დღეს, დედა ენის დღესთან დაკავშირებით, ბათუმის შოთა რუსთაველის სახელმწიფო უნივერსიტეტში მონოგრაფია ‘’სარფის’’ წარდგინება გაიმართა. მონოგრაფია, რომელზეც ქართველოლოგიის ცენტრის მკვლევართა ჯგუფმა წელიწადნახევრის განმავლობაში იმუშავა, პირველი ცდაა სარფის, ორად გაყოფილი სოფლის კომპლექსური შესწავლისა. მონოგრაფია ‘’სარფი’’ სამეცნიერო მივლინებების დროს შეკრებილ ისტორიულ, ლიტერატურულ, ეთნოლოგიურ, ფოლკლორულ და ლინგვისტურ მასალებსა და ლაზურ ტექსტებს მოიცავს. წიგნში შეტანილია მდიდარი საილუსტრაციო მასალა, რაც კიდევ უფრო საინტერესოს ხდის გამოცემას ისტორიული საქართველოს შავიზღვისპირეთით დაინტერესებული მკითხველისათვის.