ახალი ამბები

ბათუმის შოთა რუსთაველის სახელმწიფო უნივერსიტეტში XXVII საერთაშორისო სამეცნიერო კონფერენცია გაიხსნა თემაზე: ‘’გადაწყვეტილების მიღების პრობლემები გაურკვევლობის პირობებში’’. კონფერენცია ტარას შევჩენკოს კიევის ნაციონალური უნივერსიტეტის, საქართველოს ტექნიკური უნივერსიტეტის და ბათუმის შოთა რუსთაველის სახელმწიფო უნივერსიტეტის ორგანიზებით ტარდება და მასში 9 ქვეყნის 42 უმაღლესი საგანმანათლებლო დაწესებულება მონაწილეობს.

ბათუმის შოთა რუსთაველის სახელმწიფო უნივერსიტეტის რექტორის მოადგილე სამეცნიერო დარგში, პროფესორი ნათია წიკლაშვილი, განათლების ფაკულტეტის დეკანი, ასოცირებული პროფესორი მადონა მიქელაძე, ფიზიკა-მათემატიკისა და კომპიუტერულ მეცნიერებათა ფაკულტეტის დეკანი, ასოცირებული პროფესორი გულადი ფარტენაძე ოფიციალური ვიზიტით იმყოფებოდნენ ტალინის სახელმწიფო უნივერსიტეტში. ვიზიტი დაიგეგმა ორ უნივერსიტეტს შორის გაფორმებული ურთიერთთანამშრომლობის მემორანდუმის საფუძველზე.

ბათუმელი პროფესორები შეხვდნენ ტალინის უნივერსიტეტის რექტორს, ბატონ ტიიტ ლანდს. რექტორმა სტუმრებს გააცნო ტალინის უნივერსიტეტის მიღწევები განათლებასა და მეცნიერებაში და დაუდასტურა ბათუმელ კოლეგებს სამომავლო თანამშრომლობის მზაობა.

საბუნებისმეტყველო მეცნიერებათა და ჯანდაცვის ფაკულტეტზე განახლებული ზოოლოგიისა და მინერალოგიის კაბინეტები გაიხსნა. თანამედროვე სტანდარტებით მოწყობილ კაბინეტებში პროფესორ-მასწავლებლებისა და ლაბორანტების მიერ წლების განმავლობაში შეგროვებული უნიკალური მინერალოგიური ექსპონატები და ნიმუშები განთავსდა. სასწავლო თვალსაჩინოებისათვის განკუთვნილი ინტერიერი და საგამოფენო სტენდები საბუნებისმეტყველო მიმართულების სტუდენტებისათვის პრაქტიკული უნარ-ჩვევების ჩამოყალიბებასა და სასწავლო პროცესის ეფექტურობას შეუწყობს ხელს.

ბათუმის შოთა რუსთაველის სახელმწიფო უნივერსიტეტში ფიზიკა-მათემატიკისა და კომპიუტერულ მეცნიერებათა ფაკულტეტის სტუდენტებისა და აკადემიური პერსონალის მიერ განხორციელებული პროექტების გამოფენა მოეწყო. გამოფენაზე წარმოდგენილი იყო უნიკალური და ტექნოლოგიური სიახლით გამორჩეული პროექტების სადემონსტრაციო მოდელ-მაკეტები: ულტრაბგერითი მეგზური უსინათლოთათვის, რომელიც მათ შენობასა და შენობის გარეთ გადაადგილებაში ეხმარება და ხელსაწყო აგრარული გაზომვებისთვის, რომლის საშუალებითაც მიწისა და ჰაერის ტენიანობის, ტემპერატურის და მიწის მოსავლიანობას გაზომვა ხდება.

18-20 მაისს, ბათუმის შოთა რუსთაველის სახელმწიფო უნივერსიტეტის სხვადასხვა ფაკულტეტის სტუდენტებმა თბილისში, ნატოსა და ევროკავშირის შესახებ საინფორმაციო ცენტრის მიერ ორგანიზებულ სემინარში მიიღეს მონაწილეობა. ტრენინგი საქართველოს რეგიონების სახელმწიფო უნივერსიტეტების სტუდენტებისთვის ჩატარდა და მიზნად ისახავდა ახალგაზრდების ინფორმირებულობას საქართველოს ნატოსა და ევროკავშირში გაწევრიანების საკითხებსა და სტუდენტების ჩართვას ევროპულ და ევროატლანტიკურ პროცესში.