ახალი ამბები

ქველმოქმედებისა და საუნივერსიტეტო ცხოვრებაში აქტიური მონაწილეობისათვის 100 სტუდენტსა და 20-მდე პროფესორსა და ადმინისტრაციის წარმომადგენელს მამა სერგიმ და ბსუ-ს რექტორის მოვალეობის შემსრულებელმა მერაბ ხალვაშმა სიგელები გადასცეს. მეოთხე წელია ბათუმის შოთა რუსთაველის სახელმწიფო უნივერსიტეტის სტუდენტები და პროფესორ-მასწავლებლები ქალაქ ბათუმში (რურუას ქუჩა #3) ეფრემ ასურის სახელობის ტაძარს აშენებენ. გარდა ამ ტაძრის მშენებლობისა აქტიურად იყვნენ ჩართული 50-ზე მეტი ეკლესია-მონასტრის მშენებლობასა და სხვა სახის სამუშაოებში. სტუდენტების ორგანიზებით, ბათუმის ხელოვნების ცენტრში, მეუფე დიმიტრის ლოცვა-კურთხევით საქველმოქმედო კონცერტი გაიმართა სახელწოდებით ,,ეს გზა ტაძართან მიგვიყვანს“. ღონისძიებიდან შემოსული თანხა ეფრემ ასურის სახელობის ტაძრის მშენებლობის ფონდში გადაირიცხა. სტუდენტები და პროფესორ-მასწავლებლები დღემდე აგრძელებენ საქველმოქმედო ღონისძიებებს.

ტემპუსის საგრანტო პროექტის - PICASA (ინტერნაციონალიზაციის ხელშეწყობა აღმოსავლეთ სამეზობლო ქვეყნების უნივერსიტეტში კულტურული და სტრუქტურული ცვლილებების გზით) ეგიდით ბათუმის შოთა რუსთაველის სახელმწიფო უნივერსიტეტს პროექტის მონიტორინგის ჯგუფის წევრი, ლუვენის კათოლიკური უნივერსიტეტის საგარეო ურთიერთობათა სამსახურის უფროსი მაიკლ ჟორისი ეწვია. ვიზიტის ფარგლებში უცხოელმა ექსპერტმა ქართველ კოლეგებთან ერთად, ორი დღის განმავლობაში უმაღლესი საგანმანათლებლო დაწესებულების ინტერნაციონალიზაციის მიზნით საგარეო ურთიერთობათა სამსახურის ფუნქციებზე, სისტემის ორგანიზებაზე, ადამიანური რესურსების განვითარების საკითხებზე რეკომენდაციები შეიმუშავა და ინტერნაციონალიზაციის დებულება განიხილა.

უნივერისტეტის სააქტო დარბაზში ბათუმის შოთა რუსთაველის სახელმწიფო უნივერსიტეტის მან-სან-კანის შიდა საფაკულტეტო შეჯიბრი ,,მხიარული ბსუ“ ჩატარდა. პირველობა ტექნოლოგიური ფაკულტეტის გუნდს ერგო. შეჯიბრის საუკეთესო მონაწილეებით საუნივერსიტეტო გუნდი დაკომპლექტდა, რომელიც საქართველოს ,,მხიარულთა და საზრიანთა კლუბის“ თამაშების ჩემპიონატში მიიღებს მონაწილეობას.

ბათუმის შოთა რუსთაველის სახელმწიფო უნივერსიტეტსა და აჭარის კულტურული მემკვიდრეობის დაცვის სააგენტოს შორის მემორანდუმი გაფორმდა. დოკუმენტი მხარეებს შორის შემოქმედებითი მუშაობისა და აკადემიური განათლებისათვის აუცილებელი მატერიალურ - ტექნიკური რესურსების ეფექტურად გამოყენებას, სტუდენტთა პროფესიული პრაქტიკისათვის ხელშეწყობას, ცალკეული მიმართულების საგანმანათლებლო პროგრამების მომზადებაში თანამშრომლობასა და ერთობლივი პროექტების შემუშავება - განხორციელებას ითვალისწინებს.

უნივერსიტეტში საერთაშორისო კონფერენცია ,,ჩვენი სულიერების ბალავარი“ გაიხსნა. რიგით მეშვიდე სამეცნიერო კონფერენციაში 60-მდე ქართველი და უცხოელი მეცნიერი მონაწილეობს. მკვლევრები ორი დღის განმავლობაში მოხსენებებს წარმოადგენენ ქართული მართლმადიდებლური ეკლესიის ისტორიაზე, ავტოკეფალიისა და ქრისტიანული კულტურის განვითარების აქტუალურ საკითხებზე. კონფერენციის მოხსენებები კრებულის სახით უკვე დაიბეჭდა. საერთაშორისო ფორუმი ბათუმის შოთა რუსთაველის სახელმწიფო უნივერსიტეტის ქრისტიანული კულტურის კვლევის ცენტრისა და ნიკო ბერძენიშვილის ინსტიტუტის ისტორიისა და არქეოლოგიის განყოფილების ორგანიზებით ტარდება.