ახალი ამბები

საერთაშორისო განათლების ამერიკული საბჭოების საქართველოს ოფისის - დასავლეთ NIS-ის და სამხრეთ კავკასიის პროგრამების მენეჯერმა ალექსეი ხარლამოვმა ბათუმის შოთა რუსთაველის სახელმწიფო უნივერსიტეტის სტუდენტებსა და პროფესორ-მასწავლებლებს კარნეგის გაცვლითი პროგრამა წარუდგინა. პროგრამა ითვალისწინებს 4-თვიანი კვლევითი პროექტების დაფინანსებას სოციალურ და ჰუმანიტარულ მეცნიერებათა მიმართულებით. წარმატებული აპლიკანტები სტიპენდიას 2015-2016 სასწავლო წლისთვის მიიღებენ და კვლევებს აშშ-ს პრესტიჟულ სასწავლებლებში აწარმოებენ.

თურქეთის გენერალური კონსული ბათუმში იასინ თემიზქანი ბათუმის შოთა რუსთაველის სხელმწიფო უნივერსიტეტს ეწვია. დიპლომატიური კორპუსის წარმომადგენელი უნივერსიტეტის რექტორის მოვალეობის შემსრულებელს მერაბ ხალვაშს შეხვდა. გაცნობითი ხასიათის შეხვედრას ასევე ესწრებოდნენ რექტორის მოადგილე ნათია წიკლაშვილი, ჰუმანიტარულ მეცნიერებათა ფაკულტეტის პროფესორები და საგარეო ურთიერთობათა სამსახურის მთავარი სპეციალისტი თამარ მაჭუტაძე. მხარეებმა ორი ქვეყნის ურთიერთობებსა და სამომავლო გეგმებზე ისაუბრეს. დაიგეგმა ერთობლივი სასწავლო-სამეცნიერო პროექტების, საზაფხულო სკოლებისა და გაცვლითი პროგრამების განხორციელება.

„გენდერული თანასწორობისა და ქალთა პოლიტიკური გაძლიერების“ თემაზე ჟურნალისტებმა, გენდერის ექსპერტებმა და პოლიტიკური პარტიების წარმომადგენლებმა უნივერსიტეტში საჯარო ლექცია და დისკუსია გამართეს. ღონისძიების მიზანი იყო პოლიტიკაში ქალთა მონაწილეობის როლისა და მნიშვნელობის წარმოჩენა, სტუდენტების მოტივირება - ჩაერთონ ქვეყანაში გენდერული თანასწორობის პოლიტიკის გატარებასა და მონიტორინგში. შეეხვედრა ასევე ითვალისწინებდა ახალგაზრდა თაობის გენდერის საკითხებზე ინფორმირებას, გენდერული თანასწორობისა და არჩევნებში ქალთა მონაწილეობის გაზრდის ხელშეწყობას.

კომპანია „ჯიემჯის“ წარმომადგენლები ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის სტუდენტებსა და პროფესორ-მასწავლებლებს შეხვდნენ და დარგის სიახლეები გააცნეს. შეხვედრის შემდეგ მომავალმა მშენებლებმა ბათუმში, ს. ჟღენტის ქუჩაზე, #1-ში მშენებარე ხუთვარსკვლავიანი სასტუმრო და გასართობი კომპლექსი დაათვალიერეს. უმაღლეს საგანმანათლებლო დაწესებულებასა და კომპანიას შორის გაფორმებული თანამშრომლობის მემორანდუმის ფარგლებში სტუდენტები „ჯიემჯიში“ სასწავლო პრაქტიკასა და სტაჟირებას გადიან. კომპანიაში დასაქმებული არიან უნივერსიტეტის კურსდამთავრებულები და ამჟამად, პარტნიორ ორგანიზაციაში პროფესიულ უნარ-ჩვევებს 2 სტუდენტი ეუფლება.

ბათუმის შოთა რუსთაველის სახელმწიფო უნივერსიტეტში ფიზიკის მეცნიერებათა დოქტორ ჟუჟუნა დიასამიძის 70 წლისადმი მიძღვნილი საიუბილეო სხდომა გაიმართა. ღვაწლმოსილ პედაგოგსა და მეცნიერს იუბილე მიულოცეს, წარმატებები უსურვეს და მის ღვაწლზე ისაუბრეს უნივერსიტეტის რექტორის მოვალეობის შემსრულებელმა მერაბ ხალვაშმა, კოლეგებმა, საზოგადოების წარმომადგენლებმა, და მეგობრებმა. ქალბატონი ჟუჟუნა დიასამიძე ავტორია 80-მდე ნაშრომისა და მონოგრაფიის.