ახალი ამბები

ლიტვის მიკოლას რომეს უნივერსიტეტის დელეგაცია ბათუმის შოთა რუსთაველის სახელმწიფო უნივერსიტეტს ეწვია. პრორექტორი საერთაშორისო ურთიერთობებისა და კვლევის სფეროში, სამართლის დოქტორი, ინგა ზალინიენი და იურიდიული ფაკულტეტის სამართლის ჟურნალის აღმასრულებელი რედაქტორი აგნე ტვარონავიციენი ბსუ-ს რექტორს, პროფესორ ალიოშა ბაკურიძეს და უნივერსიტეტის დეკანებს შეხვდნენ. მხარეები უმაღლესი საგანმანათლებლო დაწესებულებების წარდგინების შემდეგ თანამშრომლობის მემორანდუმის გაფორმებასა და ერთობლივი სასწავლო-სამეცნიერო პროგრამების განხორციელებაზე შეთანხმდნენ. დელეგაციის ვიზიტი ბათუმის საერთაშორისო კონფერენციის ,,სამართალი და პოლიტიკა“ ფარგლებში შედგა.

უნივერსიტეტი TEMPUS-ის პროექტის „უწყვეტი განათლების სისტემის განვითარება საქართველოში“ პარტნიორი უმაღლესი საგანმანათლებლო დაწესებულებების წარმომადგენელთა შეხვედრას მასპინძლობს. პროექტის ფარგლებში ჰამბურგის უნივერსიტეტის პროფესორი ჰელმუტ ფოგტი ტრენინგებს ატარებს თემაზე: „ფინანსური მენეჯმენტი“. სემინარის 20 მონაწილე საქართველოდან, გერმანიიდან, სომხეთიდან და აზერბაიჯანიდან დაფინანსების დონეებზე, ძირითად მოდულებზე და ფინანსური მენეჯმენტის გაუმჯობესების სტრატეგიის ძირითად ელემენტებზე იმსჯელებს. პროექტის მიზანია ხელი შეუწყოს საზოგადოების უწყვეტ განათლებას, გადამზადებას და კვალიფიკაციის ამაღლებას.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის სტუდენტები სასწავლებლად ნორვეგიაში გაემგზავრნენ. ახალგაზრდები ტელემარკის უნივერსიტეტში ერთობლივი პროექტის - ,,ნორვეგიაში, საქართველოსა და ყირგიზეთში ტურიზმის მდგრადი განვითარებისა და ინოვაციების სფეროში განათლება“ ფარგლებში ისწავლიან. ტურიზმის ფაკულტეტის 6 სტუდენტი ერთი სემესტრის განმავლობაში ტურიზმის მენეჯმენტის სპეციალობას დაეუფლება, ხოლო ეკოლოგიის სპეციალობის სამი მაგისტრანტი 2-წლიან სასწავლო კურსს გაივლის. კონკურსში მონაწილეობა 110-მა სტუდენტმა მიიღო. პირველ ეტაპზე გადასული 15 სტუდენტიდან გამარჯვებულები ნორვეგიის ტელემარკის უნივერსიტეტის პროფესორებმა - ფრუდე ლენგმა და თემურ აბესაძემ ტრენინგის ჩატარების შემდეგ შეარჩიეს. სტუდენტები რექტორმა, ადმინისტრაციის ხელმძღვანელმა, დეკანებმა, ტურიზმის ფაკულტეტის პროფესორ-მასწავლებლებმა და მშობლებმა გააცილეს.

ტექნიკის მეცნიერებათა დოქტორის, პროფესორ ჯემალ ბერიძის 70 წლისადმი მიძღვნილი საიუბილეო საღამო გაიმართა ბათუმის შოთა რუსთაველის სახელმწიფო უნივერსიტეტში. ღვაწლმოსილ პროფესორს იუბილე მიულოცეს და მის მიღწევებზე ისაუბრეს უნივერსიტეტის რექტორმა, პროფესორმა ალიოშა ბაკურიძემ, აჭარის უმაღლესი საბჭოს თავმჯდომარემ ავთანდილ ბერიძემ, ტექნოლოგიური ფაკულტეტის დეკანმა გიზო ფარცხალაძემ, აკადემიკოსმა ვანო პაპუნიძემ, მწერალმა და საზოგადო მოღვაწემ რამაზ სურმანიძემ, კოლეგებმა და მეგობრებმა. პროფესორი ჯემალ ბერიძე წლების განმავლობაში მოწვეულ პროფესორად მუშაობს ბათუმის შოთა რუსთაველის სახელმწიფო უნივერსიტეტის ტექნოლოგიურ და ქუთაისის აკაკი წერეთლის სახელმწიფო უნივერსიტეტის საინჟინრო-ტექნიკურ ფაკულტეტებზე. ცნობილ მკვლევარს მნიშვნელოვანი წვლილი მიუძღვის კავშირგაბმულობის განვითარებისა და მომავალი თაობის აღზრდის საქმეში. მეცნიერს გამოქვეყნებული აქვს 80-ზე მეტი სამეცნიერო-ტექნიკური ხასიათის ნაშრომი, 10-ზე მეტი სახელმძღვანელო და დამხმარე სახელმძღვანელო. 2014 წელს გამოიცემა მონოგრაფია „თანამედროვე უსადენო ქსელები: მდგომარეობა და განვითარების პერსპექტივები“.

2008 წლის რუსეთ-საქართველოს ომში დაღუპული გმირის, ბათუმის შოთა რუსთაველის სახელმწიფო უნივერსიტეტის სტუდენტის, ვახტანგ გორგასლის I ხარისხის ორდენოსან ამირან მამალაძის საფლავი უმაღლესი საგანმანათლებლო დაწესებულების ადმინისტრაციის ხელმძღვანელმა ედიშერ ჩავლეიშვილმა, სტუდენტებმა, პროფესორ-მასწავლებლებმა და თანაკურსელებმა გვირგვინით შეამკეს. უნივერსიტეტელებმა კიდევ ერთხელ პატივი მიაგეს საქართველოს ტერიტორიული მთლიანობისათვის დაღუპული მებრძოლის ხსოვნას და მის ღვაწლზე ისაუბრეს. V ქვეითი ბრიგადის კაპრალი ამირან მამალაძე ერთადერთი სტუდენტი იყო აჭარის რეგიონიდან, რომელიც 9 აგვისტოს დაიღუპა.