ახალი ამბები

ტურიზმის განვითარების აქტუალურ საკითხებს მიეძღვნა ტურიზმის ფაკულტეტის მიერ ორგანიზებული ,,საგანმანათლებლო და ტურიზმის ინდუსტრიის ორგანიზაციების” III პრაქტიკული კონფერენცია. ღონისძიება მიზნად ისახავდა ტურიზმის განათლების სფეროში საგანმანათლებლო სექტორისა და ტურიზმის ინდუსტრიის ორგანიზაციების მჭიდრო ინტეგრაციას. თანამშრომლობა ხელს შეუწყობს ტურიზმისა და მასპინძლობის დარგისათვის მაღალკვალიფიციური, პრაქტიკული უნარ-ჩვევებისა და კომპეტენციების მქონე, ადგილობრივი და საერთაშორისო ტურისტული მომსახურების ბაზრის შესაბამისი სპეციალისტების მომზადებას. კონფერენციაზე პროფესორ-მასწავლებლებმა და დარგის წამყვანმა სპეციალისტებმა ისეთ აქტუალურ საკითხებზე იმსჯელეს, როგორიცაა: პროფესიული სტანდარტები და სასწავლო პროგრამები, სასწავლო და საწარმოო პრაქტიკის მნიშვნელობა და პრობლემები, ახალი სამაგისტრო საგანმანათლებლო პროგრამის შექმნა.

ახალგაზრდა პოეტების მონაწილეობით ბათუმის შოთა რუსთაველის სახელმწიფო უნივერსიტეტის სააქტო დარბაზში შემოქმედებითი საღამო გაიმართა სახელწოდებით: „პოეზიის საღამო“. ედო შავიშვილმა, ჯაბა ზურაბიანმა, ირაკლი წულუკიძემ და ზურა ასამბაძემ სხვადასხვა სპეციალობის სტუდენტებს ლექსები წაუკითხეს და საკუთარი შემოქმედება გააცნეს. სტუდენტების მიერ ორგანიზებული ღონისძიება მიზნად ისახავდა ქართული კულტურისა და ლიტერატურის პოპულარიზაციას. „პოეზიის საღამო“ უახლოეს მომავალში ტექნოლოგიური ფაკულტეტის სტუდენტებისათვის ჩატარდება.

ვახტანგ გორგასლის I ხარისხის ორდენოსნის, 2008 წლის აგვისტოს ომში დაღუპული გმირის, V ქვეითი ბრიგადის კაპრალ ამირან მამალაძის ხსოვნისადმი მიძღვნილი ტურნირი გაიმართა მინი ფეხბურთში. პირველობამ სტარტი 15 ოქტომბერს აიღო და მასში ბათუმის შოთა რუსთაველის სახელმწიფო უნივერსიტეტის ყველა ფაკულტეტის პირველკურსელებით დაკომპლექტებული 10 გუნდი მონაწილეობდა. შეჯიბრი ორ ქვეჯგუფად ჩატარდა და გარდამავალი თასის მოსაპოვებლად ფინალურ შეხვედრაში ერთმანეთს სოციალურ მეცნიერებათა, ბიზნესისა და სამართალმცოდნეობის ფაკულტეტის (IV გუნდი) და ტექნოლოგიური ფაკულტეტის გუნდები დაუპირისპირდნენ. მატჩი ანგარიშით 8:3, ტექნოლოგიური ფაკულტეტის გამარჯვებით დასრულდა. ტურნირი პირველად ჩატარდა, ტრადიციულ სახეს მიიღებს და ყოველწლიურად გაიმართება.

შოთა რუსთაველის ეროვნული სამეცნიერო ფონდის 2012 წლის საგრანტო კონკურსში გამარჯვებული სამეცნიერო პროექტის “კლარჯეთის” ფარგლებში წარმოებული კვლევა-ძიებისა და ექსპედიციის შედეგების წარდგინება გაიმართა ბათუმის შოთა რუსთაველის სახელმწიფო უნივერსიტეტში. პროექტს უმაღლესი საგანმანათლებლო დაწესებულების მეცნიერთა ჯგუფი (სამეცნიერო ხელმძღვანელი - სრული პროფესორი მამია ფაღავა, მენეჯერი - სრული პროფესორი მალხაზ ჩოხარაძე) ახორციელებს და მიზნად ისახავს ისტორიული კლარჯეთის შესწავლას. სამეცნიერო პროექტის ფარგლებში მკვლევრები 3-12 აგვისტოს ბორჩხისა და მურღულის რაიონებს იკვლევდნენ. მეცნიერთა შეფასებით, მოპოვებული მასალები საყურადღებოა სამხრული კილოების, ფოლკლორის, ეთნოლოგიის და ზოგადად სამხრული ყოფისა და კულტურის შესასწავლად.

ბათუმის შოთა რუსთაველის სახელმწიფო უნივერსიტეტს საქართველოს მწერალთა კავშირის თავმჯდომარე მაყვალა გონაშვილი, აჭარის მწერალთა კავშირის თავმჯდომარე დავით თედორაძე, ჟურნალ „ცისკრის“ რედაქტორი ბაღათერ არაბული, პოეტები ვახტანგ ღლონტი და ბელა ქებურია ეწვივნენ. უმაღლესი საგანმანათლებლო დაწესებულების რექტორთან, პროფესორ ალიოშა ბაკურიძესთან და პროფესორ-მასწავლებლებთან გამართულ შეხვედრაზე მწერლებმა სამომავლო თანამშრომლობის მიმართულებებსა და ერთობლივი პროექტების მნიშვნელობაზე ისაუბრეს. საქართველოს მწერალთა კავშირმა ჟურნალ „ცისკირის“ 120 წლის იუბილესთან დაკავშირებით საქართველოს კულტურისა და ძეგლთა დაცვის სამინისტროს მიერ განხორციელებული საგანმანათლებლო-შემეცნებითი პროექტის „ბიბლიოთეკა ბორბლებზე“ ფარგლებში, უნივერსიტეტის ბიბლიოთეკას საჩუქრად წიგნები და ჟურნალები გადასცა.