ახალი ამბები

სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტები ბათუმის საქალაქო სასამართლოს ადმინისტრაციის წარმომადგენლებს შეხვდნენ. მოსამართლე დავით მამისეიშვილმა სამართალმცოდნეობის სპეციალობის პირველკურსელებს უწყების მუშაობა, ნაფიც მსაჯულთა სასამართლოს სპეციფიკა გააცნო და მომავალი კოლეგების აქტუალურ შეკითხვებს უპასუხა. ბათუმის შოთა რუსთაველის სახელმწიფო უნივერსიტეტი და ბათუმის საქალაქო სასამართლო ორი წლის წინ დადებული მემორანდუმის ფარგლებში სხვადასხვა სახის პროექტებს ახორციელებენ. ტარდება ერთობლივი სამეცნიერო კონფერენციები, სემინარები და საჯარო ლექციები. სამართალმცოდნეობის სპეციალობის სტუდენტები სასამართლოში პრაქტიკულ კურსს გადიან და მონაწილეობენ სტაჟირების კონკურსში.

საერთაშორისო განათლების ცენტრის, ბათუმის შოთა რუსთაველის სახელმწიფო უნივერსიტეტისა და მშვიდობის კორპუსის მოხალისეების ორგანიზებით მოხალისეობის გამოფენა - 2013 ჩატარდა. გამოფენა მიზნად ისახავდა ახალგაზრდების დაინტერესებას, მოტივირებასა და ჩართვას მოხალისეობრივ საქმიანობაში. უმაღლესი საგანმანათლებლო დაწესებულების სტუდენტებს არასამთავრო ორგანიზაციის წარმომადგენლებმა საინფორმაციო სტენდები, ბუკლეტები და ორგანიზაციების საქმიანობა გააცნეს. ღონისძიების ფარგლებში ტრენინგი გაიმართა თემაზე: „მოხალისეთა რეკრუტირება და მართვა“.

პროექტ „სტუდენტური ბიზნეს ოლიმპიადის“ წარდგინება შედგა უნივერსიტეტის შოთა რუსთაველის დარბაზში. არასამთავრობო ორგანიზაციის „ახალგაზრდული ინიციატივებისა“ და საქართველოს ბიზნესის განვითარების ცენტრის „კავკასიის“ წარმომადგენლებმა ახალგაზრდებს პროექტის მისია, მიზნები და ამოცანები გააცნეს. პროგრამა აჭარის უმაღლესი საგანმანათლებლო დაწესებულებების სტუდენტებს დაეხმარება ბიზნესგეგმების შედგენაში, პროექტების წერასა და მენეჯმენტის უნარ-ჩვევების ჩამოყალიბებაში. „სტუდენტური ბიზნეს ოლიმპიადის“ ფარგლებში, კონკურსის წესით გამოვლინდება საუკეთესო ბიზნესპროექტები. პროექტი ითვალისწინებს სტუდენტების დასაქმების ხელშეწყობას წამყვან სამთავრობო და არასამთავრობო დაწესებულებებში.

ცნობილი პუბლიცისტისა და საზოგადო მოღვაწის ჰაიდარ აბაშიძის 120 წლისთავისადმი მიძღვნილი საიუბილეო საღამო გაიმართა ბათუმის შოთა რუსთაველის სახელმწიფო უნივერსიტეტში. უმაღლესი საგანმანათლებლო დაწესებულების რექტორმა, პროფესორმა ალიოშა ბაკურიძემ, აჭარის მწერალთა კავშირის ხელმძღვანელმა დავით თედორაძემ, პროფესორებმა: შორენა მახაჭაძემ, შუშანა ფუტკარაძემ, იური ბიბილეიშვილმა, მწერალმა რამაზ სურმანიძემ, პოეტებმა: ვახტანგ ღლონტმა, ცისანა ანთაძემ, ბელა ქებურიამ, საზოგადოების წარმომადგენლებმა და მწერლის შთამომავლებმა კიდევ ერთხელ გაიხსენეს ღვაწლმოსილი მამულიშვილის ცხოვრება და მოღვაწეობა. ჰაიდარ აბაშიძე იყო საქართველოს ეროვნული საბჭოს, ამიერკავკასიის სეიმის, საქართველოს პარლამეტის და დამფუძნებელი კრების „სამუსლიმანო საქართველოს განმათავისუფლებელი კომიტეტის“ წევრი, ტრაპიზონის საზავო კონფერენციის მონაწილე, საქართველოს აღმასრულებელი კომიტეტისა და საქართველოს მწერალთა კავშირის წევრი. საიუბილეო საღამო ბათუმის შოთა რუსთაველის სახელმწიფო უნივერსიტეტისა და აჭარის მწერალთა კავშირის ორგანიზებით ჩატარდა.

ბათუმის შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ და ტერნოპილის ეროვნული ეკონომიკური უნივერსიტეტის რექტორმა, პროფესორმა ანდრეი კრისოვატოვმა თანამშრომლობის მემორანდუმს მოაწერეს ხელი. ხელშეკრულება მიზნად ისახავს სტუდენტთა, პროფესორ-მასწავლებელთა და მკვლევართა გაცვლითი პროგრამების განხორციელებას, ერთობლივი კვლევების წარმოებას, საერთაშორისო სამეცნიერო და პრაქტიკული კონფერენციების, სემინარების, სიმპოზიუმების, კონგრესებისა და ტრენინგების ჩატარებას. მხარეთა შეთანხმებით, შემუშავდება საგანმანათლებლო პროგრამები და ხელი შეეწყობა ერთობლივი ცენტრების, ლაბორატორიების, ტექნიკური პარკების შექმნას. მემორანდუმის გაფორმების შემდეგ პროფესორი ანდრეი კრისოვატოვი სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებთან ერთად პროფესორ-მასწავლებლებს შეხვდა და სამომავლო თანამშრომლობის მიმართულებებზე ისაუბრა.