ახალი ამბები

საქართველოს უნივერსიადის ფარგლებში, 2013-2014 წლის სტუდენტურის ლიგის შესარჩევი ეტაპის I ტური გაიმართა ფუტსალში. პირველობის მოსაპოვებლად ერთმანეთს ბათუმის შოთა რუსთაველის სახელმწიფო უნივერსიტეტისა და ბათუმის სახელმწიფო საზღვაო აკადემიის გუნდები დაუპირისპირდნენ. შეხვედრა ანგარიშით 4:2, უნივერსიტეტელების გამარჯვებით დასრულდა. ტურნირის შემდეგი შესარჩევი ეტაპები 15 ნოემბერს ზუგდიდში, შოთა მესხიას სახელობის უნივერსიტეტსა და 3 დეკემბერს ქუთაისში, აკაკი წერეთლის სახელმწიფო უნივერსიტეტში გაიმართება. შეჯიბრი საქართველოს საუნივერსიტეტო სპორტის ფედერაციის, საქართველოს ფუტსალის ასოციაციის, საქართველოს სპორტისა და ახალგაზრდობის საქმეთა სამინისტროს ორგანიზებითა და კომპანია „ბილაინის“ მხარდაჭერით ტარდება. ტურნირში ქვეყნის ყველა აკრედიტებული უმაღლესი საგანმანათლებლო დაწესებულების ნაკრები მონაწილეობს.

ტემპუსის საგრანტო პროექტის „უნივერსიტეტის მართვის ინტეგრირებული სისტემის შექმნა ევროკავშირის გამოცდილების მიხედვით“ ფარგლებში უნივერსიტეტს პარტნიორი დაწესებულებების წარმომადგენლები ეწვივნენ გერმანიიდან, პოლონეთიდან, ჰოლანდიიდან, უკრაინიდან, მოლდოვადან და ბელორუსიიდან. ორი დღის განმავლობაში პროექტის მონაწილეები შესრულებული სამუშაოს შედეგებს გაეცნობიან, ცალკეული დაწესებულების მართვის თავისებურების გათვალისწინებით წამოჭრილ პრობლემებს განიხილავენ და მათ გადასაჭრელად საჭირო რეკომენდაციებს შეიმუშავებენ. ტემპუსის საგრანტო პროექტის მიზანია უნივერსიტეტის მართვის ინტეგრირებული სისტემის შექმნა და დანერგვა უკრაინაში, ბელორუსიაში, მოლდოვასა და საქართველოში ევროპული გამოცდილების საფუძველზე. პროგრამა ითვალისწინებს უნივერსიტეტის ეფექტური მენეჯმენტისთვის აუცილებელი ინფორმაციული ნაკადის აღრიცხვას, მართვას, შენახვასა და დაცვას კომპიუტერული ტექნოლოგიების გამოყენებით.

ევროპის ახალგაზრდული ოლიმპიური ფესტივალის "თბილისი 2015"-ის პრეზენტაცია ჩატარდა ბათუმის შოთა რუსთაველის სახელმწიფო უნივერსიტეტში. ფესტივალის საორგანიზაციო კომიტეტის დირექტორმა ალექსი ახვლედიანმა კომიტეტის წევრებთან ერთად, უმაღლესი საგანმანათლებლო დაწესებულების სტუდენტებს პროექტის დეტალები გააცნო და ფესტივალის მუშაობაში ჩართვისაკენ მოუწოდა. ევროპის ახალგაზრდული ოლიმპიური ფესტივალი 2015 წლის ზაფხულში თბილისში ჩატარდება და მასში 49 ქვეყნის 4 ათასზე მეტი სპორტსმენი მიიღებს მონაწილოებას. ახალგაზრდები პირველობისათვის სპორტის ცხრა სახეობაში: ძიუდოში, ჩოგბურთში, სპორტული ტანვარჯიშში, ველოსპორტში, მძლეოსნობაში, ცურვაში, ფრენბურთში, ხელბურთსა და კალათბურთში იასპარეზებენ.

ფსიქოლოგიის აკადემიური დოქტორის, ქართული ფსიქოლოგიური სკოლის ღირსეული წარმომადგენლის, პროფესორ ილია კეჭაყმაძის დაბადებიდან 85 წლისადმი მიძღვნილი საიუბილეო სხდომა გაიმართა ბათუმის შოთა რუსთაველის სახელმწიფო უნივერსიტეტში. ღვაწლმოსილ მკვლევარს იუბილე მიულოცეს, სამახსოვრო საჩუქრები გადასცეს და მის მოღვაწეობაზე ისაუბრეს უნივერსიტეტის რექტორმა, პროფესორმა ალიოშა ბაკურიძემ, პროფესორ-მასწავლებლებმა, სტუდენტებმა, მოსწავლეებმა, მეგობრებმა და საზოგადოების წარმომადგენლებმა. პროფესორ ილია კეჭაყმაძეს რამდენიმე ათეული წელია მნიშვნელოვანი წვლილი შეაქვს საუნივერსიტეტო ცხოვრებაში, ბავშვთა ფსიქოლოგიის, სკოლამდელთა პედაგოგიკის განვითარებისა და ექვსწლიანების სწავლისადმი დამოკიდებულების საკითხის შესწავლაში.

ტურიზმის განვითარების აქტუალურ საკითხებს მიეძღვნა ტურიზმის ფაკულტეტის მიერ ორგანიზებული ,,საგანმანათლებლო და ტურიზმის ინდუსტრიის ორგანიზაციების” III პრაქტიკული კონფერენცია. ღონისძიება მიზნად ისახავდა ტურიზმის განათლების სფეროში საგანმანათლებლო სექტორისა და ტურიზმის ინდუსტრიის ორგანიზაციების მჭიდრო ინტეგრაციას. თანამშრომლობა ხელს შეუწყობს ტურიზმისა და მასპინძლობის დარგისათვის მაღალკვალიფიციური, პრაქტიკული უნარ-ჩვევებისა და კომპეტენციების მქონე, ადგილობრივი და საერთაშორისო ტურისტული მომსახურების ბაზრის შესაბამისი სპეციალისტების მომზადებას. კონფერენციაზე პროფესორ-მასწავლებლებმა და დარგის წამყვანმა სპეციალისტებმა ისეთ აქტუალურ საკითხებზე იმსჯელეს, როგორიცაა: პროფესიული სტანდარტები და სასწავლო პროგრამები, სასწავლო და საწარმოო პრაქტიკის მნიშვნელობა და პრობლემები, ახალი სამაგისტრო საგანმანათლებლო პროგრამის შექმნა.