ახალი ამბები

ბათუმის შოთა რუსთაველის სახელმწიფო უნივერსიტეტში აკადემიკოს ვიქტორ კუპრაძის 110 წლისადმი მიძღვნილი საქართველოს მათემატიკოსთა კავშირის IV საერთაშორისო კონფერენცია გაიხსნა. ერთი კვირის განმავლობაში 63 უცხოელი და 162 ქართველი პროფესორ-მასწავლებელი თანამედროვე მათემატიკის აქტუალურ საკითხებზე ცხრა სექციის მიმართულებით იმუშავებს. საერთაშორისო კონფერენცია ბათუმის შოთა რუსთაველის სახელმწიფო უნივერსიტეტის, საქართველოს მეცნიერებათა აკადემიის, საქართველოს მათემატიკოსთა კავშირისა და შოთა რუსთაველის ეროვნული სამეცნიერო ფონდის ორგანიზებით იმართება.

სამეცნიერო სემინარი „ევრაზიულობის თეორია“ ჩატარდა ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებისათვის. ლოზანის უნივერსიტეტის ცენტრალური და აღმოსავლეთ ევროპის ენათმეცნიერების ისტორიის და ეპისტემოლოგიის სამეცნიერო-კვლევითი ცენტრის დირექტორმა, პროფესორმა პატრიკ სერიომ ლექცია წაიკითხა თემაზე: „ევრაზიულობა: საბუნებისმეტყველო-მეცნიერული მიდგომა ჰუმანიტარული დარგებისადმი (პ. სავიცკი და პლატონიზმი)“. სემინარის ფარგლებში შოთა რუსთაველის ეროვნული სამეცნიერო ფონდის სახელმწიფო საგრანტო პროექტი „ევრაზიულობის თეორია და საქართველო“ წარმოადგინა პროექტის თანახელმძღვანელმა გრიგოლ ჯოხაძემ. ივანე ჯავახიშვილის სახელობის თბილისის სახელმწიფო უნივერსიტეტის პროფესორმა თინათინ ბოლქვაძემ იმ საარქივო მასალებზე ისაუბრა, რომლებიც მოიძია პრაღაში ევრაზიულობის თეორიის მიმდევართა შესახებ.

თანამშრომლობის მემორანდუმი გაფორმდება ბათუმის შოთა რუსთაველის სახელმწიფო უნივერსიტეტსა და საქართველოს საპატრიარქოს წმიდა თამარ მეფის სახელობის სასწავლო უნივერსიტეტს შორის. ბსუ-ს რექტორთან, პროფესორ ალიოშა ბაკურიძესთან გამართულ შეხვედრაზე წმიდა თამარ მეფის სახელობის სასწავლო უნივერსიტეტის რექტორმა, არქიმანდრიტმა ადამ ახალაძემ თანამშრომლობის მიმართულებებზე ისაუბრა. მემორანდუმის ფარგლებში ამოქმედდება გაცვლითი პროგრამები, ჩატარდება ერთობლივი კონფერენციები, სიმპოზიუმები, სემინარები, ტრენინგები და შემოქმედებითი საღამოები. ხელშეკრულების თანახმად, გამოიცემა სახელმძღვანელოები, სამეცნიერო შრომები, კრებულები და მონოგრაფიები. მხარეთა შეთანხმებით, 10 ოქტომბერს ბათუმში გაიმართება ლიტერატურულ-მუსიკალური წარმოდგენა.

გერმანიის აკადემიური გაცვლის სამსახურის - DAAD-ის მხარდაჭერითა და ბათუმის შოთა რუსთაველის სახელმწიფო უნივერსიტეტის ორგანიზებით გერმანისტიკის მიმართულების დოქტორანტთა მეორე კონფერენცია გაიმართა. სესიაზე საქართველოს სხვადასხვა უმაღლესი საგანმანათლებლო დაწესებულების დოქტორანტებმა სადოქტორო ნაშრომების პროექტები წარმოადგინეს და კვლევის მეთოდოლოგიასთან ერთად კვლევის პროცესში წამოჭრილი პრობლემების დაძლევის გზები განიხილეს. მომავალმა მკვლევრებმა ასევე ისაუბრეს დოქტორანტთა მხარდამჭერი საერთაშორისო დონორი ორგანიზაციების საგრანტო პროექტებზე. კონფერენციის მუშაობაში გერმანიის აკადემიური გაცვლის სამსახურის საინფორმაციო ცენტრის ხელმძღვანელი, პროფესორი ელიზაბეთ ფენორი და DAAD-ის პროფესორი თურქეთში (ათათურქის უნივერსიტეტი) ენრიკო ლიპმანი მონაწილეობდნენ.

ბათუმის შოთა რუსთაველის სახელმწიფო უნივერსიტეტის და პროფესორებს: რეზო დიასამიძეს, ოთარ გოგოლიშვილს, ემერიტუს-პროფესორ ბიჭიკო დიასამიძეს დამსახურებული მოღვაწის და ემერიტუს-პროფესორ აკაკი ბერიძეს საპატიო ბათუმელის წოდება მიენიჭათ. თვითმმართველი ქალაქის - ბათუმის საკრებულოს გადაწყვეტილებით, დღესასწაულის - „ბათუმობა - 2013“ - ფარგლებში უმაღლესი საგანმანათლებლო დაწესებულების პროფესორ-მასწავლებლებმა საპატიო წოდება განათლებასა და მეცნიერებაში შეტანილი განსაკუთრებული წვლილისათვის მიიღეს. უნივერსიტეტის რექტორატი, აკადემიური პერსონალი და ადმინისტრაცია დამსახურებულ მოღვაწეებს ულოცავს წარმატებას.