ახალი ამბები

ბათუმის შოთა რუსთაველის სახელმწიფო უნივერსიტეტმა და ბსუ-ს ტურიზმის ფაკულტეტმა შვერინის ბალტიკის კოლეჯთან მემორანდუმი გააფორმა. ხელშეკრულების ფარგლებში ტურიზმის ფაკულტეტის 12 სტუდენტი სასტუმროების და სარესტორნო მენეჯმენტის სამთვიან პრაქტიკულ კურსს მიუნხენში გაივლის. ახალგაზრდები უცო ენის ცოდნის, აკადამიური მოსწრებისა და სამუშაო გამოცდილების საფუძველზე შეირჩნენ. ხელშეკრულება მიზნად ისახავს ერთობლივი საგანმანათლებლო პროგრამებისა და სამეცნიერო პროექტების განხორციელებას, პროფესორ-მასწავლებლებისა და სტუდენტების გაცვლითი პროგრამების ამოქმედებას. დოკუმენტი ასევე ითვალისწინებს კონფერენციების, სიმპოზიუმებისა და სემინარების ჩატარებას, გამოცდილების გაზიარებასა და პარტნიორი უნივერსიტეტის ბაზაზე სტუდენტების პრაქტიკის გავლას. ტურიზმის ფაკულტეტის 12 სტუდენტი გერმანიაში 15 აგვისტოს გაემგზავრება.

უნივერსიტეტის რექტორის მოადგილე ირაკლი ბარამიძე და ადმინისტრაციის ხელმძღვანელი ედიშერ ჩავლეიშვილი ევროკავშირის პროექტ „MEMORYROW”-ის კოორდინატორს, გრაცის უნივერსიტეტის პროფესორ კარლ კასერს, პროექტის ქართველ, ავსტრიელ, ბულგარელ, ბერძენ, რუს და მაკედონელ წარმომადგენლებს შეხვდნენ. საერთაშორისო პროექტის მონაწილეებმა ბოლო ორი წლის განმავლობაში წარმოებული კვლევა-ძიების შედეგები შეაფასეს და სამომავლო ორწლიანი გეგმა განიხილეს. ასევე ისაუბრეს პროექტში ჩართულ უმაღლეს საგანმანათლებლო დაწესებულებებთან თანამშრომლობის მემორანდუმის გაფორმების აუცილებლობაზე. შეხვედრაზე ბათუმის შოთა რუსთაველის სახელმწიფო უნივერსიტეტსა და ჩრდილოეთ კავკასიის უნივერსიტეტს შორის დადებული ხელშეკრულება წარმოადგინეს პროფესორებმა: ტატიანა ნევსკაიამ, ალია კონდრაშევამ და ტატიანა კორჩაგინამ. მემორანდუმი გაფორმებულია აგრეთვე ბლაგოევგრადის სამხრეთ-დასავლეთის ნეოფიტ რილსკის უნივერსიტეტთან.

ბათუმის შოთა რუსთაველის სახელმწიფო უნივერსიტეტისა და გრაცის (ავსტრია) უნივერსიტეტის ერთობლივი საერთაშორისო საზაფხულო სკოლა ,,ევროპული სამართალი სამხრეთ კავკასიაში“ (EULISC) გაიხსნა. ერთკვირიან საზაფხულო სკოლაში სამართლის, პოლიტიკურ მეცნიერებათა და საერთაშორისო ურთიერთობათა მიმართულების ქართველი, ავსტრიელი, სომეხი, რუსი, ბელორუსი, აზერბაიჯანელი ბაკალავრები და მაგისტრანტები მონაწილეობენ. საერთაშორისო საზაფხულო სკოლის მიზანია განიხილოს ევროპული კანონის შესაბამისობა სამხრეთ კავკასიის სახელმწიფოების სამართლებრივ და პოლიტიკურ გარემოსთან. სტუდენტებს მოხსენებებს წაუკითხავენ ბათუმის, გრაცის, ერევნისა და ბაქოს სახელმწიფო უნივერსიტეტების პროფესორ-მასწავლებლები. ევროპელი და ადგილობრივი ექსპერტები ერთობლივად წარმოადგენენ ევროკავშირის სტრატეგიის ისეთ ასპექტებს რეგიონთან მიმართებაში, როგორიცაა: დემოკრატიის გაძლიერების ხელშეწყობა, მხარდაჭერა კონფლიქტების მშვიდობიანად მოგვარების საკითხებში და ა.შ. ყურადღება გამახვილდება იმ პოლიტიკური და სამართლებრივი ინსტრუმენტების გაცნობაზე, რომელსაც იყენებს ევროკავშირი აღმოსავლეთ სამეზობლო პოლიტიკის გატარებისას.

უნივერსიტეტის რექტორის მოადგილემ ირაკლი ბარამიძემ, ადმინისტრაციის ხელმძღვანელმა ედიშერ ჩავლეიშვილმა და მიკროსაფინანსო ორგანიზაცია სს „ლაზიკა კაპიტალის“ გენერალურმა დირექტორმა ბესიკ შენგელიამ თანამშრომლობის მემორანდუმს მოაწერეს ხელი. ხელშეკრულება ითვალისწინებს შესაბამისი სპეციალობის სტუდენტთა სასწავლო და პროფესიული პრაქტიკისა და სტაჟირების გავლას, რაც ხელს შეუწყობს ახალგაზრდებში პროფესიული და ანალიტიკური უნარ-ჩვევების ჩამოყალიბებასა და თეორიული ცოდნის პრაქტიკული საქმიანობით განმტკიცებას. მემორანდუმი მიზნად ისახავს ასევე უმაღლესი საგანმანათლებლო დაწესებულების კურსდამთავრებულთა დასაქმებას, უნივერსიტეტის თანამშრომლებისა და სტუდენტებისათვის კომპანიის პროდუქციისა და მომსახურების მიწოდებას სპეციალური პირობებით.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის 5 სტუდენტი აგვისტოში გერმანიაში გაემგზავრება. პროექტის მონაწილეები გერმანული ენის ცოდნისა და აკადემიური მოსწრების საფუძველზე შეირჩნენ. ახალგაზრდები 3 თვის განმავლობაში გერმანიის სხვადასხვა სარესტორნო ქსელში ტურიზმისა და მენეჯმენტის მიმართულებით სასწავლო პრაქტიკას გაივლიან. სტუდენტებს გერმანული სარესტორნო ქსელის "ჰაინრიტცის" დირექტორმა რაინერ ფაშტეტერმა კომპანიის მუშაობის მეთოდები და მიღწევები გააცნო. პროექტი "მაკდონალდსის" სარესტორნო ქსელის კომპანია "ჰაინრიტცის" ორგანიზებით ხორციელდება.