ახალი ამბები

პროფესორმა ტარიელ ფუტკარაძემ შოთა რუსთაველის დარბაზში ლექცია წაიკითხა თემაზე: „საქართველოს სახელმწიფო ენა, ე. წ. რეგიონული ენები, რეგიონალიზმი და საქართველოს უსაფრთხოების კონცეფცია“. ენათმეცნიერმა საქართველოს ენობრივ-ეთნიკური დინამიკა წარმოადგინა, ისაუბრა როგორ განიხილება ეს საკითხი თანამედროვე მსოფლიოსთან მიმართებაში. მკვლევარმა ლექციაზე განმარტა ტერმინები „რეგიონი“, „რეგიონალიზმი“ და „ევროპული ქარტიის“ ტერმინი „რეგიონული ენა ან უმცირესობის ენა“. ასევე განიხილა საქართველოს უსაფრთხოების კონცეფცია ქართულ ენასთან მიმართებაში და ყურადღება გაამახვილა კონცეფციაში შესატან დამატებით პუნქტებზე, რათა თავიდან ავიცილოთ ქართული ენის ენობრივ-ეთნიკური დანაწევრება და მისი თანმდევი მძიმე მოვლენები. საჯარო ლექციას უნივერსიტეტის რექტორი, პროფესორი ალიოშა ბაკურიძე, პროფესორ-მასწავლებლები, სტუდენტები, მწერალთა კავშირის აჭარის ორგანიზაციის წევრები და საზოგადოების წარმომადგენლები ესწრებოდნენ.

ბათუმის შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ და შავი ზღვის საერთაშორისო უნივერსიტეტის რექტორმა, პროფესორმა შევქეთ ერჯან თუნჩიმ მეგობრობის ენათა ცენტრი გახსნეს. ცენტრის მიზანია სტუდენტებსა და პროფესორ-მასწავლებლებს უფასოდ შეასწავლოს თურქული ენა. სასწავლო წლის ბოლოს წარჩინებული სტუდენტები თურქეთის 19 მაისის უნივერსიტეტის საზაფხულო სკოლაში თურქული ენის შემსწავლელ კურსებს გაივლიან. მსმენელებს შესაძლებლობა მიეცემათ წელიწადში ორჯერ იმოგზაურონ თურქეთის რესპუბლიკაში, გაეცნონ თურქეთის კულტურასა და ტრადიციას.

სტუდენტური თვითმმართველობის არჩევნების პირველადი შედეგების მიხედვით, ბათუმის შოთა რუსთაველის სახელმწიფო უნივერსიტეტის სტუდენტური თვითმმართველობის 79 მაჟორიტარი წევრის ვინაობა ცნობილია. უმაღლესი საგანმანათლებლო დაწესებულების ცენტრალურ საარჩევნო კომისიაში შესული საჩივრების საფუძველზე, სოციალურ მეცნიერებათა, ბიზნესისა და სამართალმცოდნეობის ფაკულტეტის პირველი კურსის კენჭისყრის შედეგები გაუქმდა და 5 წევრს სტუდენტები 18 აპრილს დაგეგმილ შუალედურ არჩევნებზე აირჩევენ. გარდა ამისა, ექვსმა კანდიდატმა თანაბარი რაოდენობის ხმები დააგროვა, რომელთაგან სამი გამარჯვებული სტუდენტური თვითმმართველობის ორგანოში 19 აპრილს, პირველ სხდომაზე გამართული კენჭისყრის შედეგების მიხედვით გამოვლინდება. სტუდენტური თვითმმართველობის წევრები ამავე შეკრებაზე აირჩევენ თავმჯდომარეს, რომელთა კანდიდატები არჩევნებში მონაწილე სტუდენტური კოალიციების ლიდერები არიან. ცესკოს ინფორმაციით, არჩევნებში მონაწილე სუბიექტებს შორის სტუდენტური გაერთიანება „აპოლიტიკა“ ლიდერობს.

დედაენის დღესთან დაკავშირებით ბათუმის შოთა რუსთაველის სახელმწიფო უნივერსიტეტის სტუდენტებმა, პროფსორ-მასწავლებლებმა და ადმინისტრაციის წარმომადგენლებმა უნივერსიტეტიდან ილია ჭავჭავაძის ძეგლის მიმართულებით მსვლელობა მოაწყვეს. ღონისძიების მონაწილეებმა გაიხსენეს 1978 წლის 14 აპრილს, რუსთაველის გამზირზე გამართული საპროტესტო აქცია და ქართული ენის დამცველის, ეროვნულ-განმათავისუფლებელი მოძრაობის ლიდერის ძეგლი გვირგვინით შეამკეს. უმაღლესი საგანმანათლებლო დაწესებულების პროფესორ-მასწავლებლებმა აჭარის განათლების, კულტურისა და სპორტის სამინისტროს საქველმოქმედო აქციაში მიიღეს მონაწილეობა და წმ. ეკატერინეს სახელობის სათნოების სავანეს საჩუქრად მხატვრული ლიტერატურა გადასცეს

უნივერსიტეტის ილია ჭავჭავაძის ბიბლიოთეკაში ამერიკის შეერთებულ შტატებში განხორციელებული გაცვლითი პროგრამების წარდგინება გაიმართა. პროექტების მონაწილეებმა პროფესორ-მასწავლებლებს მიღებული გამოცდილება და მათი შემდგომი გამოყენების პერსპექტივები გააცნეს. ამერიკის სახელმწიფო დეპარტამენტის საგანმანათლებლო და კულტურული საკითხების ბიუროს საერთაშორისო ვიზიტორთა პროექტის „ლიდერთა ვიზიტორობის საერთაშორისო პროგრამის“ ფარგლებში ბსუ-ს ბიბლიოთეკის დირექტორი ლელა თურმანიძე აშშ საუნივერსიტეტო ბიბლიოთეკებს ეწვია. განათლებისა და მეცნიერებათა ფაკულტეტის დეკანის მოადგილე ინგა შამილიშვილი აშშ განათლების სახელმწიფო დეპარტამენტის, საერთაშორისო განათლების ინსტიტუტისა და საქართველოში ამერიკის შეერთებული შტატების საელჩოს პროგრამის ,,international visitor leadership programm”-ის ეგიდით გაეცნო ინდაუმენტის სისტემას აშშ-ს უნივერსიტეტებში, ხოლო ბსუ-ს შეფასებისა და გამოცდების ცენტრის ხელმძღვანელმა ივდით დიასამიძემ აშშ კონგრესის ბიბლიოთეკის პროფესიული განვითარების პროგრამის „ღია სამყაროს“ ხელშეწყობით ამერიკის უმაღლეს სასწავლებელთა მენეჯმენტის მოდელი შეისწავლა