ახალი ამბები

ბათუმის შოთა რუსთაველის სახელმწიფო უნივერსიტეტის სტუდენტებმა და პროფესორ-მასწავლებლებმა 1989 წლის 9 აპრილს დაღუპული გმირების ხსოვნას პატივი მიაგეს. 24 წლის წინ განვითარებულ მოვლენებს მიეძღვნა სტუდენტთა მომსახურებისა და მხარდაჭერის სამსახურისა და სტუდენტთა სამეცნიერო ცენტრის ორგანიზებით გამართული სამეცნიერო სესია „1989 წლის 9 აპრილის მოვლენები და საქართველოს სახელმწიფოებრივი დამოუკიდებლობის აღდგენის აქტი". მომხსენებლებმა 1989 წლის 8-9 აპრილს მომხდარი ისტორიული ფაქტები შეაფასეს და მის მნიშვნელობაზე ისაუბრეს. 9 აპრილს დაღუპულთა მემორიალთან ასევე გაიმართა ტრაგიკული მოვლენების ამსახველი ფოტოქრონიკის ჩვენება, სტუდენტებმა და პროფესორ-მასწავლებლებმა კიდევ ერთხელ გაიხსენეს ტრაგიკულ ღამეს დაღუპული გმირები, სანთლები დაანთეს და მემორიალი ყვავილებით შეამკეს. ღონისძიების ფარგლებში მსვლელობა მოეწყო ეროვნული გმირის მერაბ კოსტავას ძეგლის მიმართულებით.

ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის, არასამთავრობო ორგანიზაციების: „ტფილისის ჰამქარის“, „ბათუმისა“ და „ICOMOS”-ს ორგანიზებით გაიმართა კონფერენცია თემაზე: „კულტურული მემკვიდრეობის დაცვის პრობლემები“. ხელოვნებათმცოდნეებმა და არქიტექტორებმა კონფერენციაზე ქალაქების იდენტობის განმსაზღვრელ ფაქტორებზე, კულტურული მემკვიდრეობის შენარჩუნების ფაქტორებზე, ურბანულ ცვლილებებზე, გამოწვევებზე და სახელმწიფო რეაბილიტაციის პროცესებზე იმსჯელეს. კონფერენციის ფარგლებში ასევე გაიმართა ფოტოხელოვან შოთა გუჯაბიძის ძველი ბათუმის ამსახველი ფოტოების გამოფენა.

შოთა რუსთაველის ეროვნულმა სამეცნიერო ფონდმა ფუნდამენტური და გამოყენებითი კვლევებისთვის სახელმწიფო გრანტების კონკურსის შედეგები გამოაქვეყნა. 2012 წლის საგრანტო კონკურსში გამარჯვება მოიპოვა ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებისა და მკვლევრების სამმა სამეცნიერო პროექტმა: „კლარჯეთი“ (სამეცნიერო პროექტის ხელმძღვანელი, სრული პროფესორი მამია ფაღავა), „გარემოს რადიო სპექტრალური დიაგნოსტიკა სიგნალისა და გარემოს დისპერსიულ მახასიათებლებს შორის კორელაციური ურთიერთკავშირის საფუძველზე“ (სამეცნიერო ხელმძღვანელი, ასისტენტ პროფესორი იზოლდა ჯაბნიძე) და „მცენარეთა პათოგენური მიკროორგანიზმების კულტურათა ეროვნული კოლექციის შექმნა“(სამეცნიერო ხელმძღვანელი ზოია სიხარულიძე

შოთა რუსთაველის დარბაზში პრაქტიკული სემინარი ჩატარდა თემაზე: „ფერმერული მეურნეობებისა და გადამამუშავებელი ორგანიზაციების არსებული მდგომარეობა, მათი რეაბილიტაციისა და განვითარების პერსპექტივები აჭარაში“. ბათუმის შოთა რუსთაველის სახელმწიფო უნივერსიტეტის აგრარული და მემბრანული ტექნოლოგიების ინსტიტუტის მეცნიერ-თანამშრომლებმა და აჭარის სოფლის მეურნეობის სამინისტროს წარმომადგენლებმა ფერმერული და კვების პროდუქტთა წარმოების სექტორებში მომუშავეთ დარგის სიახლეები, სამომავლო გეგმები და პროექტები გააცნეს. მომხსენებლებმა ასევე ისაუბრეს ისეთ საკითხებზე, როგორიცაა: „სასათბურე ტექნოლოგიები, მასალები და მოწყობილობები“, „მცირე სიმძლავრის გადამამუშავებელი ტექნოლოგიური ხაზები და ტექნოლოგიები“ და „ფერმერული გაერთიენებების ჩამოყალიბების მიზანშეწონილობა“. პრაქტიკული სემინარი უმაღლესი საგანმანათლებლო დაწესებულების სამეცნიერო-კვლევითი ცენტრის ორგანიზებით გაიმართა და მომავალშიც გაგრძლდება.

გერმანიის ფედერაციული რესპუბლიკის ბრანდენბურგის მიწის პარლამენტის მეცნიერების, კვლევისა და კულტურის კომისიის თავმჯდომარე იენს ლიპსდორფი, ქალაქ კოტბუსის თავისუფალ დემოკრატთა პარტიის ფრაქციის თავმჯდომარე, განათლების, სკოლების, სპორტისა და კულტურის კომისიის თავმჯდომარე სილკე ლუთერთი და თავისუფალ დემოკრატთა პარტიის წევრი მაიკე ჰოლთში ბათუმის შოთა რუსთაველის სახელმწიფო უნივერსიტეტს ეწვივნენ. უნივერსიტეტის რექტორთან, პროფესორ ალიოშა ბაკურიძესთან, აჭარის უმაღლესი საბჭოს განათლების, მეცნიერების, კულტურისა და სპორტის საკითხთა კომისიის თავმჯდომარესთან გიორგი მასალკინთან, ადმინისტრაციის ხელმძღვანელთან ედიშერ ჩავლეიშვილთან, ფაკულტეტების დეკანებთან და ადმინსტრაციის წარმომადგენლებთან გამართულ შეხვედრაზე დელეგაციის წევრებმა თანამშრომლობის მიმართულებებსა და სამომავლო გეგმებზე ისაუბრეს. მხარეებმა ყურადღება გაამახვილეს სტუდენტთა გაცვლითი პროგრამების განხორციელებაზე, პროფესორ-მასწავლებელთა კვალიფიკაციის ამაღლებაზე, გადამზადებასა და სტაჟირებაზე. იგეგმება რეგიონში ქართულ-გერმანული პროფესიული სასწავლებლის გახსნა და ენების ცენტრის დაფუძნება.