ახალი ამბები

ბათუმის შოთა რუსთაველის სახელმწიფო უნივერსიტეტის სტუდენტური თვითმმართველობის თავმჯდომარე უჩა აბრამიშვილი ბათუმის საჯარო სკოლების თვითმმართველობის თავმჯდომარეებს შეხვდა. ახალგაზრდები ერთობლივი საგანმანათლებლო, სამეცნიერო, კულტურული და სპორტული პროექტების განხორციელებაზე შეთანხმდნენ. სკოლის მოსწავლეები უმაღლესი საგანმანათლებლო დაწესებულების სტუდენტების მიერ ჩამოყალიბებულ ახალგაზრდულ ორგანიზაცია ,,აღსდექ საქართველოს“ საქველმოქმედო ღონისძიებების ეგიდით ბათუმის წმიდა გიორგის სახელობის ტაძრის მშენებლობაში მიიღებენ მონაწილეობას.

ბათუმის შოთა რუსთაველის სახელმწიფო უნივერსიტეტის რექტორი, პროფესორი ალიოშა ბაკურიძე საქართველოს პრეზიდენტის მიერ ინიცირებული სტუდენტთა საზაფხულო დასაქმების პროგრამა ”Summer Job”-ის მონაწილე სტუდენტებს შეხვდა და ერთთვიანი მუშაობის შედეგები შეაჯამა. რექტორმა ახალგაზრდებს პირველი ხელფასი მიულოცა, წარმატებები უსურვა და ყველაზე აქტიურ 32 სტუდენტს მადლობის სიგელები გადასცა. აგრარული ტექნოლოგიისა და ეკოლოგიის ფაკულტეტის, სამეცნიერო ცენტრის ფიტოპათოლოგიისა და ბიომრავალფეროვნების მიმართულების საცდელ ნაკვეთებზე 50 სტუდენტი მუშაობდა, ხოლო უნივერსიტეტის ბიბლიოთეკაში - 18. დასაქმების პროგრამა 20 ივლისს ამოქმედდა, რომლის ფარგლებში ქვეყნის ავტორიზებული უმაღლესი სასწავლებლების 25 000 სტუდენტი დასაქმებული იყო სამშენებლო ორგანიზაციებში, იურიდიულ კომპანიებში, მუზეუმებში, ბიბლიოთეკებში, თვითმმართველობის ორგანოებში, უმაღლეს საგანმანათლებლო დაწესებულებებსა და სხვადასხვა სამსახურში.

გერმანიის აკადემიური გაცვლის სამსახურის, DAAD-ის ორგანიზებთ ბათუმის შოთა რუსთაველის სახელმწიფო უნივერსიტეტში საზაფხულო სკოლა „კრეატიული და აკადემიური წერა“ გაიხსნა. ქართველი, სომეხი და აზერბაიჯანელი სტუდენტები ათი დღის განმავლობაში ზაარლანდის უნივერსიტეტის პროფესორის კარმენ ნაისის დახმარებით აკადემიურ ტექსტის სხვადასხვა სახეობასთან მუშაობის წესებსა და უნარ-ჩვევებს დაეუფლებიან. სემინარის მონაწილეებს თეორიული მასალის გაცნობასთან ერთად პრაქტიკულ მეცადინეობები ჩაუტარდებათ. საზაფხულო სკოლაში მიღებული ცოდნა ახალგაზრდებს გერმანულ საუნივერსიტეტო სივრცეში ინტეგრირებასა და კვალიფიკაციის ამაღლებაში დაეხმარება.

აჭარის განათლების, კულტურისა და სპორტის სამინისტრო იწყებს სტუდენტური დახმარების მიზნობრივი პროგრამის განხორციელებას. პროგრამის ფარგლებში, აჭარის ავტონომიური რესპუბლიკის ბიუჯეტიდან სასწავლო გრანტს აკრედიტებულ უმაღლეს საგანმანათლებლო დაწესებულებებში ჩარიცხული სტუდენტები სასწავლო წლის განმავლობაში ორჯერ, სემესტრის მიხედვით მიიღებენ. დაფინანსების მაქსიმალური ოდენობა წლის განმავლობაში 2500 ლარს შეადგენს. 2009, 2010, 2011 წლებში ჩარიცხულმა სტუდენტებმა საბუთები აჭარის განათლების, კულტურისა და სპორტის სამინისტროში უნდა წარადგინონ 2012 წლის 1 აგვისტოდან 20 აგვისტოს ჩათვლით. 2012 წელს ჩარიცხული სტუდენტების საბუთების მიღების ვადა მოგვიანებით განისაზღვრება. დამატებითი ინფორმაციისათვის მიმართეთ ბათუმის შოთა რუსთაველის სახელმწიფო უნივერსიტეტის სტუდენტთა მომსახურებისა და მხარდაჭერის სამსახურს (I კორპუსი, ოთახი №315).

ტურიზმის ფაკულტეტმა ერთობლივი პროექტის ,,ნორვეგიაში, საქართველოსა და ყირგიზეთში ტურიზმის მდგრადი განვითარებისა და ინოვაციების სფეროში განათლება“ განხორციელება დაიწყო. ბათუმის შოთა რუსთაველის სახელმწიფო უნივერსიტეტის 4 სტუდენტი სწავლის გასაგრძლებლად ნორვეგიაში მიემგზავრება. უმაღლესი საგანმანათლებლო დაწესებულების რექტორმა, პროფესორმა ალიოშა ბაკურიძემ და პროფესორ-მასწავლებლებმა ახალგაზრდებს გაცილება მოუწყვეს და წარმატებები უსურვეს. თამაზ მახარაძე, თამთა ქარცივაძე და ეთერ ჯინჭარაძე ტელემარკის უნივერსიტეტში ერთი წლის განმავლობაში ,,ტურიზმის მენეჯმენტის“ სპეციალობას დაეუფლებიან, ხოლო მედეა ბერიძე მაგისტრატურაში ეკოლოგიის სპეციალობით ორწლიან პროგრამას გაივლის.