ახალი ამბები

დასრულდა სტუდენტთა ბიზნეს-ეკონომიკური, ინტელექტუალური თამაში ,,გახდი მენეჯერი სათამაშო მაგიდასთან". სხვადასხვა ფაკულტეტის სტუდენტები ვაჭრობის, საქმიანობის დაგეგმვის, უძრავი ქონების მართვის, განკარგვის, სტრატეგიული ხედვის განვითარების, კონკურენტებთან ურთიერთობისა და საბაზრო ეკონომიკისათვის დამახასიათებელ სხვა ელემენტებისაგან შემდგარი თამაშით მენეჯერისთვის საჭირო უნარ-რჩვევებს რამდენიმე დღის განმავლობაში ივითარებდნენ. 162 სტუდენტიდან ფინალში პირველობისათვის 6 მონაწილე იბრძოდა და გამარჯვება განათლებისა მეცნიერებათა ფაკულტეტის სტუდენტს გიორგი ბუხრიკიძეს ერგო. მეორე ადგილი ამავე ფაკულტეტის სტუდენტმა პაატა ჭახნაკიამ დაიკავა, ხოლო მესამე ადგილი - სოციალურ მეცნიერებათა, ფიზნესისა და სამართალმცოდნეობის ფაკულტეტის სტუდენტმა როლანდ ხომერიკმა. კომპეტენტურმა ჟიურიმ პროექტის საუკეთესო მონაწილეები სხვადასხვა ნომინაციაშიც გამოავლინა. ყველაზე ეფექტური მენეჯერი გულო თურმანიძე გახდა, ინტელექტუალურ მენეჯერად ხატია კონცელიძე დასახელდა, ხოლო რისკიან მენეჯერად - ერეკლე ჭაპანიძე. გამარჯვებულებს ორგანიზატორებმა ფასიანი და სამახსოვრო საჩუქრები გადასცეს.

შავი ზღვის რეგიონის ქვეყნების სასაზღვრო თანამშრომლობის თემაზე ბათუმის შოთა რუსთაველის სახელმწიფო უნივერსიტეტის, საქართველოს პოლიტიკის ინსტიტუტისა და ქალაქ ვენის მერიის ორგანიზებით საერთაშორისო საზაფხულო სკოლა გაიხსნა. ქართველი, უკრაინელი, თურქი, სომეხი, აზერბაიჯანელი, რუსი სტუდენტები ოთხი დღის განმავლობაში ისეთ საკითხებს განიხილავენ, როგორიცაა შავი ზღვის ქვეყნების პოლიტიკა და სწორი მმართველობა, მოსაზღვრე ქვეყნების თანამშრომლობა ევროკავშირთან და მმართველობა ევროპის „ახალი მმართველობის“ მოდელზე. ახალგაზრდები ასევე იმსჯელებენ საზღვრებთან დაკავშირებული საკითხების მოგვარებაზე, კონფლიქტის გადაჭრის საშუალებებზე, კონფლიქტის მქონე საზოგადოებაში მასმედიისა და ადამიანის უფლებების დაცვაზე. საზაფხულო სკოლა მიზნად ისახავს პოლიტიკური ანალიზის ხარისხის გაუმჯობესებას შავი ზღვის ქვეყნებთან ურთიერთობის განვითარების თვალსაზრისით, აკადემიური დისკუსიის ხელშეწყობასა და კოოპერატიული ქსელის შექმნას სამოქალაქო საზოგადოებას და ახალგაზრდა პროფესიონალებს შორის.

აჭარის მკლავჭიდის 2012 წლის ღია პირველობაზე ბათუმის შოთა რუსთაველის სახელმწიფო უნივერსიტეტის განათლებისა და მეცნიერებათა ფაკულტეტის სამკურნალო საქმის მეოთხე კურსის სტუდენტმა დარინა ცეცხლაძემ პირველობა მოიპოვა. შეჯიბრი 5 წონით კატეგორიაში ჩატარდა და მასში 80-მდე მკლავჭიდელი მონაწილეობდა. სპორტსმენმა გამარჯვება აბსოლუტურ წონით კატეგორიაში ევროპის ვიცე-ჩემპიონის მარინა ფუტკარაძის დამარცხებით მოიპოვა. გამარჯვებული უახლოეს მომავალში თურქეთში დაგეგმილ საერთაშორისო ღია პირველობაზე წარმოაჩენს საკუთარ შესაძლებლობებს.

საქართველოს რესპუბლიკის პირველი პრეზიდენტის ვაჟმა რეჯებ ჟორდანიამ საჯარო ლექცია წაიკითხა თემაზე: „საქართველოს პირველი რესპუბლიკა, საქართველოს რესპუბლიკის მემკვიდრეობა და დღევანდელობა“. რეჯებ ჟორდანია სტუდენტებსა და პროფესორ-მასწავლებლებს 1918-21 წლების პერიოდზე ესაუბრა, ქვეყნის დამოუკიდებლობის აღდგენასა და დაკარგვასთან დაკავშირებული ისტორიული მოვლენები გააცნო და სტუდენტების შეკითხვებს უპასუხა. ნოე ჟორდანიას შვილი დაიბადა და გაიზარდა პარიზში. პოლიტიკურ მეცნიერებათა სკოლის სტუდენტი და იელის უნივერსიტეტის კურსდამთავრებული, ცხოვრების სხვადასხვა პერიოდში იყო ჰარიმანის ინსტიტუტის მიწვეული მეცნიერი, პროფესიონალი პიანისტი, კომპოზიტორი, მწერალი, საზღვაო ისტორიის პროფესორი, საზღვაო მუზეუმის დირექტორი, უცხოური ენების სახელმძღვანელოების ავტორი და რედაქტორი. 91 წლის რეჯებ ჟორდანია უნივერსიტეტს მეუღლესთან და ქალიშვილთან ერთად ეწვია.

აკადემიური საბჭოს გადაწყვეტილებით, ნორვეგიის ტელემარკის უნივერსიტეტის ხელოვნებისა და მეცნიერებათა ფაკულტეტის პროფესორს თეიმურაზ აბესაძეს ბათუმის შოთა რუსთაველის სახელმწიფო უნივერსიტეტის განვითარებაში შეტანილი წვლილისათვის საპატიო დოქტორის წოდება მიენიჭა. ქართველი მეცნიერის ხელშეწყობით ტურიზმის ფაკულტეტი ახორციელებს საერთაშორისო პროექტს ,,ნორვეგიაში, საქართველოში და ყირგიზეთში მდგრადი ტურიზმის განვითარებისა და ინოვაციების სფეროში განათლება“. პროექტი ითვალისწინებს ერთობლივი საგანმანათლებლო, სამეცნიერო პროექტების ამოქმედებას და პროფესორ-მასწავლებლების სტაჟირებას. ტურიზმის ფაკულტეტის სტუდენტები გაცვლითი პროგრამების ფარგლებში აგვისტოში ტელემარკის უნივერსიტეტში გაემგზავრებიან. ასევე შემუშავდება კურიკულიმი ინოვაციებისა და სამეწარმეო სწავლების სფეროში. პროფესორ თეიმურაზ აბესაძის ხელშეწყობით მიმდინარეობს ინოვაციური და მდგრადი ტურიზმის განვითარების საკითხების კვლევა.