ახალი ამბები

USAID-ის საქართველოს წარმომადგენლობისა და ბათუმის შოთა რუსთაველის სახელმწიფო უნივერსიტეტის ჯანდაცვის მიმართულების ინიციატივით რეგიონში ექიმთა დიპლომამდელი და დიპლომისშემდგომი განათლების ხარისხის გაუმჯობესებისა და მედიკოსთა პროფესიული განვითარების ხელშეწყობის პროგრამა ხორციელდება, რომლის ფარგლებში რსუ-ს განათლებისა და მეცნიერებათა ფაკულტეტს საჩუქრად შვიდი საფანტომე მულაჟი გადაეცა. პროგრამის ეგიდით ჯანდაცვის მიმართულების პროფესორ-მასწავლებლებს ორდღიანი ტრენინგი ჩაუტარდათ თემაზე ,,მტკიცებითი მედიცინა და სწავლების თანამედროვე მეთოდები სამედიცინო განათლებაში“.

ახალშენის ყოვლადწმიდა სამების მშენებარე სამონასტრო კომპლექსის გაწმენდით სამუშაოებში რამდენიმე დღეა აქტიურად მონაწილეობენ ბათუმის შოთა რუსთაველის სახელმწიფო უნივერსიტეტის სტუდენტები. სტუდნტური თვიმმართველობის მიერ ორგანიზებული საქველმოქმედო აქცია შაბათს, 3 ნოემბერს განახლდება და მასში მონაწილეობის მიღება ნებისმიერ მსურველს შეეძლება. ბოლო ერთი წლის განმავლობაში სტუდენტები და პროფესორ-მასწავლებლები 12 ეკლესია-მონასტრის მშენებლობასა და გაწმენდით სამუშაოებში იყვნენ ჩართული.

ბათუმის შოთა რუსთაველის სახელმწიფო უნივერსიტეტს ამერიკის შეერთებული შტატების ელჩი საქართველოში რიჩარდ ნორლანდი ეწვია. დიპლომატიური კორპუსის წარმომადგენელმა უმაღლესი საგანმანათლებლო დაწესებულების ამერიკის შესწავლის ცენტრი, განათლების საერთაშორისო ცენტრი, ბიბლიოთეკა მოინახულა და შოთა რუსთაველის დარბაზში სტუდენტებს, პროფესორ-მასწავლებლებსა და ადმინისტრაციის წარმომადგენლებს შეხვდა. ამერიკის შეერთებული შტატების ელჩმა საქართველოში რიჩარდ ნორლანდმა აშშ-სა და საქართველოში ჩატარებული არჩევნები შეაფასა, მის მნიშვნელობაზე ისაუბრა, ორი ქვეყნის დიპლომატიური ურთიერთობები მიმოიხილა და სტუდენტების შეკითხვებს უპასუხა.

ტემპუსის საგრანტო პროექტის ,,სტუდენტთა კარიერული განვითარების ხელშეწყობა საქართველოში" ფარგლებში ბათუმის შოთა რუსთაველის სახელმწიფო უნივერსიტეტში ვორკშოფი გაიმართა. დიდი ბრიტანეთის, ლიტვის, უნგრეთის, რსუ-სა და თსუ-ს პროფესორ-მასწავლებლებისაგან დაკომპლექტებული სამუშაო ჯგუფი სამი დღის განმავლობაში კონცეფციისა შემუშავებასა და იმ კომპეტენციათა განსაზღვრაზე მუშაობდა, რომლებიც არსებითი მნიშვნელობისაა კურსდამთავრებულთა დასაქმების ხელშეწყობისათვის. საგრანტო პროექტი ორწლიანია და მიზნად ისახავს სტუდენტთა კარიერული განვითარების ხელშეწყობას. პროგრამა ითვალისწინებს უმაღლესი საგანმანათლებლო დაწესებულების ბაზაზე ტრენერთა მომზადებას, რომლებიც სტუდენტებს დაეხმარებიან სამსახურის არა ერთჯერადად მოძებნაში, არამედ დამსაქმებლებთან სწორი კომუნიკაციის წარმოებაში, საკუთარი შესაძლებლობების წარმოჩენაში, კარიერის უკეთ დაგეგმვაში, გუნდური მუშაობის, საქმიანი კომუნიკაციისა და გასაუბრებისათვის საჭირო უნარ-ჩვევების შეძენაში.

სტუდენტური თვიმმართველობის ხელშეწყობითა და გივი ნახუცრიშვილის ხელმძღვანელობით სტუდენტები დოკუმენტურ ფილმს „სელიმ ხიმშიაშვილს“ იღებენ. ფილმზე მუშაობისას 8 სტუდენტისაგან დაკომპელქტებული გადამღები ჯგუფი დამატებითი მასალის მოსაპოვებლად სხალთის ხეობაში მესამედ გაემგზავრა. ახალგაზრდებს ექსპედიციის მიმდინარეობისას მასპინძლობას სელიმ ხიმშიაშილის თანამებრძოლის შთამომავალი და ხეობის მკვიდრი ამირან გაბაიძე უწევდა. მოსახლეობასთან გამართულ შეხვედრაზე სტუდენტებმა უმაღლესი საგანმანათლებლო დაწესებულების ფოტო-ვიდეო სტუდიისა და სტუდენტური თვიმმართველობის მიერ გადაღებული დოკუმენტური ფილმების: „სხალთის მონასტრისა“ და ხიხანის ციხის“ ჩვენება მოაწყვეს.