ახალი ამბები

NATO-ს ეგიდით, ბათუმის შოთა რუსთაველის სახელმწიფო უნივერსიტეტში შავი ზღვის ღრმა ფენების გოგირდწყალბადის ეკოლოგიურად უსაფრთხო ენერგეტიკული ათვისების თემაზე სამეცნიერო ვორქშოფი გაიხსნა. სამი დღის განმავლობაში ქართველი, ამერიკელი, ინგლისელი, უკრაინელი, სერბი, თურქი, ერაყელი, სომეხი და აზერბაიჯანელი მეცნიერები ახალი ალტერნატიული ენერგეტიკული წყაროების მოძიებისა და წყალბადის ენერგეტიკის განვითარებაზე იმსჯელებენ. მკვლევრები ასევე განიხილავენ შავი ზღვის პოტენციალის სრულად და უსაფრთხოდ გამოყენების საკითხებს. სემინარი მაიამის უნივერსიტეტთან არსებული ”წყალბადის ენერგეტიკის განვითარების, მსოფლიო ცენტრის” დამაარსებელისა და ხელმძღვანელის, პროფესორ ნეჯატ ვეზირ ოგლუსა და მისი თანადირექტორის, საქართველოს ეკოლოგიურ-მეცნიერებათა აკადემიის პრეზიდენტის, პროფესორ მარატი ციცქიშვილის ხელმძღვანელობით იმართება.

მედიცინის განვითარებისა და ქართული სამედიცინო მიღწვების საერთაშორისო ასპარეზზე გატანის საქმეში შეტანილი წვლილისთვის ნობელის პრემიის ლაურეატს, ბიოქიმიის დოქტორ აარონ ჩეხანოვერსა და საქართველოს მეცნიერებათა ეროვნული აკადემიის აკადემიკოსს რევაზ სეფიაშვილს ბათუმის შოთა რუსთაველის სახელმწიფო უნივერსიტეტის აკადემიური საბჭოს გადაწყვეტილებით, საპატიო დოქტორის წოდება მიენიჭათ. დაჯილოდოების ცერემონიამდე, ცნობილმა მეცნიერმა აარონ ჩეხანოვერმა სასტუმრო "შერატონში" გამართული კონგრესის "ჯანმრთელობა და წამალი" ფარგლებში, 21-ე საუკუნის მედიცინის ერთ-ერთი მთავარი მიმართულების, კიბოს მკურნალობის ახალი მეთოდის შესახებ ლექცია წაიკითხა. როგორც ნობელის პრემიის ლაურეატი თვლის, კიბოს განკურნებისას არსებითია არა ზოგადად დაავადების წინააღმდეგ ბრძოლა, არამედ ცალკეული პაციენტის მკურნალობის ინდვიდუალური სტრატეგიის შემუშავება

გერმანიისა და საქართველოს ორმხრივი ურთიერთობის 20 წლის იუბილესადმი მიძღვნილი „გერმანული დღეები“ ბათუმის შოთა რუსთაველის სახელმწიფო უნივერსიტეტში რამდენიმე ღონისძიებით აღინიშნა. უმაღლეს საგანმანათლებლო დაწესებულებას გერმანიის ფედერაციული რესპუბლიკის ელჩის საქართველოში ორთვინ ჰენინგის ხელმძღვანელობით, რეგენისა და როსტოკის დელეგაცია ეწვია. შედგა პოპულარული გერმანული ფილმის „მშვიდობით, ლენინ!“ ჩვენება, DAAD-ის, გოეთეს ინსტიტუტისა და გერმანიის საელჩოს სასტიპენდიო პროგრამების პრეზენტაცია. დუსელდორფის ჰაინრიხ ჰაინეს უნივერსიტეტის პროფესორმა საბილე შონბორნიმ ლექცია წაიკითხა თემაზე: „საქართველო გერმანელ მოგზაურთა ჩანაწერებში“, ხოლო ტურიზმის განვითარების აქტუალურ საკთხებზე, მრვალი მაგიდა გაიმართა. უნივერსიტეტის განვითარებაში შეტანილი წვლილისათვის საერთაშორისო კორპორაციის (GIZ) ტურიზმის ექსპერტს, ბათუმის შოთა რუსთაველის სახელმწიფო უნივერსიტეტისა და გერმანიის (დრეზდენი/ბერლინი) ევროპული ბიზნესკოლეჯის ლექტორს კურტ ჰაინც რაიცს რსუ-ს აკადემიური საბჭოს გადაწყვეტილებით, საპატიო დოქტორის წოდება მიენიჭა.

ბათუმის შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ და ნახიჭევანის სახელმწიფო უნივერსიტეტის რექტორმა, პროფესორმა ისა ხაბიბეილიმ აჭარისა და ნახიჭევანის ავტონომიური რესპუბლიკების მეგობრობის აუდიტორია გახსნეს. რეგიონებსა და უმაღლეს საგანმანათლებლო დაწესებულებებს შორის თანამშრომლობის მემორანდუმი სამი თვის წინ გაფორმდა და ამ დროის განმვლობაში რამდენიმე საგანმანათლებლო და სამეცნიერო პროექტი უკვე განხორციელდა. ქართველი პროფესორ-მასწავლებლები აქტიურად იყვნენ ჩართული ნახიჭევანის სახელმწიფო უნივერსიტეტის სამეცნიერო კონფერენციების მუშაობაში, ათმა აზერბაიჯანელმა სტუდენტმა მონაწილეობა მიიღო რსუ-ში გამართულ, ორკვირიან საზაფხულო სკოლაში და ოთხიც სხვადასხვა მიმართულებით ერთსემესტრიან სასწავლო პროგრამას ეუფლება. სასწავლო წლის მეორე სემეტრში, გაცვლითი პროგრამის ფარგლებში ქართველი სტუდენტები სასწავლებლად ნახიჭევანში გაემგზავრებიან. უმაღლესი სასწავლებლების ხელმძღვანელებმა თანამშრომლობა დადებითად შეაფასეს და სამომავლო გეგმებზე ისაუბრეს.

შოთა რუსთაველის ეროვნული სამეცნიერო ფონდისა და ბათუმის შოთა რუსთაველის სახელმწიფო უნივერსიტეტის ორგანიზებით, ერთი წლის განმავლობაში უცხოეთის უმაღლეს საგანმანათლებლო დაწესებულებების წარმატებული ქართველი პროფესორ-მასწავლებლები ლექციებს წაიკითხავენ. რსუ-ს პირველ ეტაპზე ამერიკის შეერთებულ შტატებში მოღვაწე პროფესორები ნინო ტაბატაძე და თამარ ჭყონია ეწვივნენ. ნეიროფიზიოლოგმა ნინო ტაბატაძემ ლექცია წაიკითხა თემაზე: „მეხსიერება და მისი მოლეკულური საფუძველი“, ხოლო ბიოლოგმა თამარ ჭყონიამ - „დაბერება და მისი მექანიზმები“.