ახალი ამბები

ცნობილი შვედი დიპლომატისა და საზოგადო მოღვაწის რაულ ვალენბერგის ხსოვნის საღამო გაიმართა. შედგა შვედი გმირისადმი მიძღვნილი დოკუმენტური ფილმის ჩვენება და გაიხსნა მისივე ცხოვრების ამსახველი პოსტერების გამოფენა. უნგრეთის რესპუბლიკის საგანგებო და სრულუფლებიანმა ელჩმა სანდორ სზაბორმა, ბათუმის ვიცე-მერმა ნათია სურგულაძემ და აჭარის ქართულ-ებრაული ასოციაციის ხელმძღვანელმა ერიკ კრუპნიკმა გმირის ცხოვრებასა და მოღვაწეობაზე ისაუბრეს. უნგრეთის საელჩოს და აჭარის ქართულ-ებრაულ ასოციაციის ორგანიზებული საღამოს მონაწილეებმა პატივი მიაგეს შვედი დიპლომატის ხსოვნას და გმირის სურათთან სანთლები დაანთეს. რაულ ვალენბერგმა მეორე მსოფლიო ომის დროს შვედური პასპორტების გაცემითა და თავშესაფრების - „შვედური სახლების“ საშუალებით ათიათასობით ებრაელი სიკვდილს გადაარჩინა. ღონისძიებას უნივერსიტეტის სტუდენტები, პროფესორ-მასწავლებლები, დიპლომატიური კორპუსისა და საზოგადეობის წარმომადგენლები.

სააქტო დარბაზში ბათუმის შოთა რუსთაველის სახელმწიფო უნივერსიტეტის სტუდენტებისათვის Speak Up in Georgia-ს პროგრამის წარდგინება გაიმართა. ინგლისური ენისა და ლიდერის უნარ-ჩვევების განმავითარებელი ორთვიანი კურსი მთელი ქვეყნის მასშტაბით საქართველოს სპორტისა და ახალგაზრდობის საქმეთა სამინისტროს დაფინანსებით ხორციელდება. სასწავლო პროგრამა ისეთ მნიშვნელოვან საკითხებს მოიცავს, როგორიცაა საჯარო გამოსვლა, რეზიუმეს წერა/ინტერვიუები, ინგლისური ენის სწავლების ეფექტური გზები, ბრენდინგის ხელოვნება, ლიდერობა ახალგაზრდებში. პროგრამის მონაწილეები კონკურსის წესით შეირჩევიან.

გერმანიის ეკონომიკური თანამშრომლობისა და განვითარების მინისტრი დირკ ნიბელი დელეგაციის წევრებთან ერთად ბათუმის შოთა რუსთაველის სახელმწიფო უნივერსიტეტს ეწვია. სტუმარი უმაღლესი საგანმანათლებლო დაწესებულების რექტორის მოადგილეებს, ადმინისტრაციის ხელმძღვანელსა და ტრენინგის „ტურიზმი მედიებში“ მონაწილე სტუდენტებს შეხვდა. მინისტრი მედია-ტრენინგის მუშაობის შედეგებს გაეცნო და პროექტის ფარგლებში ტურიზმის თემატიკაზე მომზადებული რეპორტაჟი შეაფასა. ხუთდღიანი სწავლება ,,დოიჩე ველეს“ აკადემიის ორგანიზებით ჩატარდა და III საერთაშორისო სამეცნიერო-პრაქტიკულ კონფერენციას ,,მდგრადი ტურიზმი: ეკონომიკა და ბიზნესი“ ეძღვნებოდა.

საპასუხო ვიზიტით უნივერსიტეტის რექტორი, პროფესორი ალიოშა ბაკურიძე იულიხის სამეცნიერო ცენტრსა და ლიუბლიანას უნივერსიტეტს ეწვია. ხუთი დღის განმავლობაში უმაღლესი სასწავლებლის პირველი პირი სლოვენიის უმაღლესი საგანმანათლებლო დაწესებულების რექტორს, საგარეო ურთიერთობათა დეპარტამენტის, ფარმაციის ფაკულტეტისა და გერმანიის სხვადასხვა კვლევითი ინსტიტუტის წარმომდგენლებს შეხვდა. 13-17 აგვისტოს ბათუმის შოთა რუსთაველის სახელმწიფო უნივერსიტეტში იულიხის სამეცნიერო ცენტრის ორგანიზებით საბუნებისმეტყველო, საინჟინრო, აგრარული მეცნიერებების ათი მიმართულებით საზაფხულო სკოლა გაიმართება, რომელშიც მონაწილეობის მიღება სტუდენტებთან ერთად პროფესორ-მასწავლებლებსაც შეეძლებათ. გერმანიის კვლევით ცენტრთან სამომავლო თანამშრომლობა მემორანდუმით განისაზღვრება, რომელსაც ზაფხულში მოეწერება ხელი. 2012-2013 სასწავლო წლის დასაწყისში ქიმიის სპეციალობის მაგისტრანტი ლიუბლიანას უნივერსიტეტში გაემგზავრება სასწავლო კურსის გასავლელად.

ტურიზმის განვითარების აქტუალურ საკითხებს ეძღვნება III საერთაშორისო სამეცნიერო-პრაქტიკული კონფერენცია ,,მდგრადი ტურიზმი: ეკონომიკა და ბიზნესი“. საქართველოსა და უცხოეთის წამყვანი უნივერსიტეტების პროფესორ-მასწავლებლები, მკვლევრები და ტურიზმის დარგის წარმომადგენლები ორი დღის განმავლობაში 100–ზე მეტ მოხსენებას წარმოადგენენ. ქართველი, გერმანელი, ამერიკელი, თურქი, ლატვიელი, ნორვეგიელი, ბელორუსი, უნგრელი და ყირგიზი სპეციალისტები მდგრად ტურიზმზე, ტურისტული ბაზრის განვითარების პერსპექტივებზე, მასთან დაკავშირებულ ეკონომიკურ-სოციალურ ფაქტორებზე და სხვა მნიშვნელოვან საკითხებზე იმსჯელებენ. საერთაშორისო კონფერენცია ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტისა და აჭარის არ ტურიზმისა და კურორტების დეპარტამენტის ორგანიზებით იმართება.