ახალი ამბები

შოთა რუსთაველის დარბაზში საერთაშორისო კონფერენცია დაიწყო თემაზე: „დავების ალტერნატიული გადაწყვეტის (ADR) საშუალებათა როლი სამხრეთ კავკასიის ქვეყნების წარმომადგენელთა მონაწილეობით არსებულ კერძო სამართლებრივ დავებში“. ქართველი, გერმანელი, ყაზახი, უკრაინელი, პოლონელი, თურქი, აზერბაიჯანელი, სომეხი არბიტრები და მოქმედი ადვოკატები ერთმანეთს ორი დღის განმავლობაში არბიტრაჟისა და მედიაციის სფეროში არსებულ გამოცდილებას გაუზიარებენ და ერთობლივი მუშაობის საკითხებზე შეთანხმდებიან. ფორუმი ხელს შეუწყოს სხვადასხვა ქვეყანაში დავების წარმოებისათვის დამახასიათებელი, კანონში არსებული თავისებურებებისა და სირთულეების გაცნობას, საზოგადოებაში არბიტრებისა და მედიატორის როლის გაზრდას, საქართველოს თანამედროვე საარბიტრაჟოს სისტემაში ჩართვას, არბიტრაჟის კოლეგიაში სხვადასხვა ეროვნების წარმომადგენლების შეყვანას და სხვადასხვა ქვეყანაში არსებული პრობლემების ერთობლივად მოგვარებას.

ცნობილი მათემატიკოსები თანამედროვე ალგებრის სამეცნიერო კვლევის შედეგებსა და პრობლემებზე სამუშაოდ საერთაშორისო სამეცნიერო კონფერენციაზე ,,თანამედროვე ალგებრა და მისი გამოყენება“ მეორედ შეიკრიბნენ. საერთაშორისო კონფერენცია შოთა რუსთაველის სახელმწიფო უნივერსიტეტში საზეიმოდ გაიხსნა და მონაწილეებს აჭარის უმაღლესი საბჭოს თავმჯდომარე, პროფესორი მიხეილ მახარაძე, უნივერსიტეტის რექტორი, პროფესორი ალიოშა ბაკურიძე და დარგის წამყვანი მეცნიერები მიესალმენ. ერთკვირიანი სამეცნიერო ფორუმი, რომელშიც 12 ქვეყნის 60 მკვლევარი მონაწილეობს, საქართველოს ეროვნული სამეცნიერო ფონდის მიერ დაფინანსებული სამეცნიერო გრანტების (GNSF/STO8/3-383 და GNSF/STO8/3-396) ფარგლებში იმართება. საერთაშორისო სამეცნიერო კონფერენციაზე წარმოდგენილი მოხსენებები ორ ტომად გამოიცემა.

შოთა რუსთაველის სახელმწიფო უნივერსიტეტის რექტორი, პროფესორი ალიოშა ბაკურიძე სტუდენტებს შეხვდა და ახალი, 2011-2012 სასწავლო წლის სიახლეები გააცნო. უნივერსიტეტში სწავლება განახლებული საგანმანათლებლო პროგრამებით დაიწყო. ცვლილებებია სტუდენტთა რეგისტრაციის, სტიპენდიების გაცემისა წესსა და შეფასების კრიტერიუმებში. პირველად სტიპენდიას პირველკურსელებთან ერთად 81 ქულიანი შეფასების მქონე სტუდენტებიც მიიღებენ. შეხვედრა კითხვა-პასუხის რეჟიმში წარიმართა, რექტორმა, პროფესორმა ალიოშა ბაკურიძემ ახალგაზრდების აქტუალურ შეკითხვებს უპასუხა.

ზღვისპირა ქალაქების განვითარების სპეციფიკას, ნაპირდაცვის პრობლემებს, ისტორიული უბნების აღდგენისა და ტურისტული ინფრასტრუქტურის განვითარების საკითხებს ეძღვნება შოთა რუსთაველის სახელმწიფო უნივერსიტეტში გამართული საერთაშორისო არქიტექტორული საზაფხულო სკოლა “არქიტექტურა და ბუნებრივი ფაქტორები”. ქვეყნის სხვადასხვა უმაღლესი სასწავლებლის სტუდენტები 10 დღის განმავლობაში თანამედროვე არქიტექტურის განათლებისა და ახალი ტექნოლოგიების მნიშვნელოვან სიახლეებს შეისწავლიან. საზაფხულო სკოლის მიზანია ხელი შეუწყოს ქართული არქიტექტორული განათლების დონის ამაღლებას, სასწავლო პროცესში საერთაშორისო სტანდარტების დამკვიდრებას, უმაღლეს სასწავლებლებს, სამთავრობო და არასამთავრობო ორგანიზაციებს შორის თანამშრომლობის გაღრმავებას.

აჭარის მთავრობის თავმჯდომარე ლევან ვარშალომიძე, შოთა რუსთაველის სახელმწიფო უნივერსიტეტის რექტორი, პროფესორი ალიოშა ბაკურიძე და ადმინისტრაციის ხელმძღვანელი დავით ლეკვეიშვილი რსუ-ს სამეცნიერო ცენტრის მეცნიერ-თანამშრომლებს შეხვდნენ და სამეცნიერო ცენტრის ხელმძღვანელი ემზარ ძირკვაძე წარუდგინეს. მკვლევრები შეხვედრაზე დაგეგმილ სიახლეებსა და სამეცნიერო მიმართულებების პრიორიტეტებსაც გაეცნენ. სამეცნიერო-კვლევითი ინსტიტუტების რეორგანიზაციის შედეგად ჩამოყალიბებული შოთა რუსთაველის სახელმწიფო უნივერსიტეტის სამეცნიერო ცენტრი ქობულეთში, ფიტო-პათოლოგიის მიმართულების შენობაში განთავსდება. აჭარის მთავრობის გადაწყვეტილებით გამოიყო თანხა, რომელიც სამეცნიერო ცენტრის ინფრასტრუქტურის განვითარებას, მატერიალურ-ტექნიკური ბაზის სრულყოფასა და სამეცნიერო კვლევა-ძიების მასშტაბების გაზრდას მოხმარდება.