ახალი ამბები

ბათუმის შოთა რუსთაველის სახელმწიფო უნივერსიტეტის რექტორმა, პროფესორმა მერაბ ხალვაშმა 2019 წლის სტუდენტური სამეცნიერო კონფერენციის გამარჯვებულ სტუდენტებს სტუდენტთა სამეცნიერო შრომების კრებული გადასცა. კრებული მრავალდარგობრივია და მასში ეკონომიკის, სამართალმცოდნეობის, პოლიტიკურ და სოციალურ მეცნიერებათა, საბუნებისმეტყველო, მედიცინის, გეოგრაფიის, აგრარულ, ზუსტ მეცნიერებათა, ასევე ისტორიის, აღმოსავლეთმცოდნეობის, ეთნოგრაფიის, არქეოლოგიის, ლიტერატურათმცოდნეობის, ფოლკლორის, ენათმეცნიერების მიმართულებით შექმნილი სამეცნიერო შრომებია წარმოდგენილი.

ბათუმის შოთა რუსთაველის სახელმწიფო უნივერსიტეტში გაიმართა საინფორმაციო შეხვედრა „საქართველოს მკვლევართა მობილობის პროგრამის“ შესახებ. ევროკავშირის პროგრამის ჯგუფის ხელმძღვანელმა პიტერ დებრეცენმა და ჯგუფის ხელმძღვანელის მოადგილემ ნინო გაჩეჩილაძემ ბსუ-ს პროფესორ-მასწავლებლებს და მკვლევრებს საგრანტო კონკურსში მონაწილეობის პირობები გააცნო. „საქართველოს მკვლევართა მხარდაჭერის პროგრამას“ ევროკავშირის ფინანსური მხარდაჭერით ახორციელებს გერმანიის აკადემიური გაცვლის სამსახური (DAAD). პროექტი მიზნად ისახავს საქართველოს მეცნიერების, ტექნოლოგიებისა და ინოვაციების სექტორის ინტერნაციონალიზაციის ხელშეწყობას საერთაშორისო კავშირების დამყარების პროცესში საქართველოს მკვლევართა მხარდაჭერის გზით. პროექტი ითვალისწინებს მკვლევართა და ინოვატორთა კვლევითი ვიზიტის დაფინანსებას ევროკავშირის წევრ ქვეყნებში.

ბათუმის შოთა რუსთაველის სახელმწიფო უნივერსიტეტის ჟან მონეს კათედრის ორგანიზებით ევროპის დღე აღინიშნა. ღონისძიებაში მონაწილეობა მიიღეს იურიდიული და სოციალურ მეცნიერებათა ფაკულტეტის სხვადასხვა სპეციალობის სტუდენტებმა. შეხვედრის მონაწილეებს ევროპული ღირებულებებისა და ევროკავშირში საქართველოს გაწევრიანების შესახებ ესაუბრა ჟან მონეს კათედრის ხელმძღვანელი პროფესორი მალხაზ ნაკაშიძე. ევროპის დღის აღსანიშნავად გაიმართა ევროკავშირის შესახებ დოკუმენტური ფილმის ჩვენება და დისკუსია.

ბათუმის შოთა რუსთაველის სახელმწიფო უნივერსიტეტმა სხვადასხვა საჯარო სკოლის მოსწავლეებს უმასპინძლა. მომავალ სტუდენტებს რექტორის მოადგილე თამარ სირაძე შეხვდა და უნივერსიტეტის ისტორია, საგანმანათლებლო პროგრამები, მიღწევები, სტუდენტური ცხოვრება და სამომავლო გეგმები დეტალურად გააცნო. აბიტურიენტებმა უმაღლესი საგანმანათლებლო დაწესებულების მატერიალურ-ტექნიკური ბაზა და კაბინეტ-ლაბორატორიები დაათვალიერეს. სკოლის მოსწავლეებმა პროფესორ-მასწავლებლებთან და სტუდენტებთან ერთად სადემონსტრაციო ცდები ჩაატარეს ფიზიკის, იმუნოგენეტიკის, კრიმინალისტიკისა და სინქრონული თარგამნის ლაბორატორიებში.

3-5 მაისს, ბელგიის ქალაქ გენტში, ლუვენის კათოლიკური უნივერსიტეტის ტექნოლოგიურ კამპუსში შედგა სასწავლო ვიზიტი „ერაზმუს+“-ის საგრანტო პროექტის „საქართველოსა და უკრაინის უსდ-ების როლის გაძლიერება ინდუსტრიულ ტრანსფორმაციაში ინდუსტრიული პარადიგმა 4.0-ის მეშვეობით - HEIn4“ ფარგლებში. ბათუმის უნივერსიტეტიდან ვიზიტში მონაწილეობდა პროექტის მენეჯერი და მკლევარი, ზუსტ მეცნიერებათა და განათლების ფაკულტეტის დეკანი, პროფესორი ლელა თურმანიძე, ხარისხის უზრუნველყოფის სამსახურის ხელმძღვანელი, პროფესორი ვლადიმერ ღლონტი და მკვლევარი, ასოცირებული პროფესორი ნანა მაზმიშვილი.