ახალი ამბები

ბსუ-ში დასრულდა ორდღიანი საერთაშორისო სამეცნიერო კონფერენცია „შავიზღვისპირეთი ცივილიზაციათა გზაჯვარედინზე“. შემაჯამებელ სესიაზე მონაწილეებმა სექციური მუშაობის შედეგები წარმოადგინეს და აქტუალურ საკითხებზე იმსჯელეს. კონფერენცია ორი დღის განმავლობაში შერეული ფორმატით მუშაობდა და 14 ქვეყნის 200-ზე მეტმა მონაწილემ სამეცნიერო მოხსენებები წარმოდგინა შავი ზღვის რეგიონის ისტორიის, არქეოლოგიის, ეთნოლოგიის, ფილოლოგიის, ენათმეცნიერების, ტურიზმის, ეკოლოგიის, ტოპონიმიკის, რელიგიათმცოდნეობის, ფილოსოფიის, არქიტექტურის, სამართალის და სხვა მიმართულებით.

ბსუ-ში სამეცნიერო-საგანმანათლებლო ღონისძიება „შავი ზღვის ლურჯი პოლიტიკა“ გაიმართა. ღონისძიება გახსნეს და მონაწილეებს მიესალმნენ ბსუ-ს რექტორი, პროფესორი მერაბ ხალვაში, საქართველოს განათლებისა და მეცნიერების მინისტრის მოადგილე ნუნუ მიცკევიჩი და აჭარის ა.რ. განათლების, კულტურისა და სპორტის მინისტრი მაია ხაჯიშვილი. ღია ცის ქვეშ სამეცნიერო პავილიონების გამოფენაში უმაღლესი საგანმანათლებლო დაწესებულებების, სამეცნიერო-კვლევითი ცენტრებისა და სხვა ორგანიზაციების წარმომადგენლებმა წარმოადგინეს შავი ზღვისა და ზღვისპირა რეგიონის ბიომრავალფეროვნების, ეკოლოგიის, ბუნებრივი რესურსების, კლიმატის, სოციალურ-ეკონომიკური, პოლიტიკური, კულტურულ-ისტორიული და სხვა მიმართულებით არსებული უახლესი სამეცნიერო კვლევების პრეზენტაციები. ასევე მოეწყო გამოფენები, ვორკშოფები, შემეცნებითი ვიქტორინები და ექსპერიმენტები მოსწავლეებისათვის.

ბათუმის შოთა რუსათველის სახელმწიფო უნივერსიტეტში სამეცნიერო-საგანმანათლებლო ღონისძიების „შავი ზღვის ლურჯი პოლიტიკა“ ფარგლებში, ორდღიანი საერთაშორისო სამეცნიერო კონფერენცია: „შავიზღვისპირეთი ცივილიზაციათა გზაჯვარედინზე“ გაიხსნა. სესიაზე წარმოდგენილი იქნება მოხსენებები შავი ზღვის რეგიონის ისტორიის, არქეოლოგიის, ეთნოლოგიის, ფილოლოგიის, ენათმეცნიერების, ფოლკლორის, ტურიზმის, ეკოლოგიის, ტოპონიმიკის, რელიგიათმცოდნეობის, ფილოსოფიის, არქიტექტურის, სამართალის და სხვა მიმართულებით. კონფერენციის მუშაობაში მონაწილეობას იღებს 14 ქვეყნის (აშშ, დიდი ბრიტანეთი, იტალია, გერმანია, პოლონეთი, საბერძნეთი, რუმინეთი, უკრაინა, თურქეთი და სხვ.) 200-ზე მეტი მონაწილე.

უნგრეთის ელჩი საქართველოში ანა მარია შიკო ვიშეგრადის ფესტივალის ფარგლებში ბათუმის შოთა რუსთაველის სახელმწიფო უნივერსიტეტს ეწვია. ბსუ-ს რექტორთან, პროფესორ მერაბ ხალვაშთან გამართულ შეხვედრაზე დიპლომატიური კორპუსის წარმომადგენელმა ორ ქვეყანას შორის არსებულ ურთიერთობებზე ისაუბრა და ერთობლივი საგანმანათლებლო-სამეცნიერო პროექტების განხორციელებაზე გაამახვილა ყურადღება. ელჩი ვიზიტის ფარგლებში ასევე შეხვდა სტუდენტებს და ვიშეგრადის ფესტივალის პროგრამა გააცნო. ფესტივალის ეგიდით პროფესორმა ჩაბა ჰიდნისმა საჯარო ლექცია წაიკითხა თემაზე: „1335 წელს ცენტრალური ევროპის 3 მეფის ვიშეგრადში გამართული შეხვედრა და შუა საუკუნეებში თავდაცვითი შეიარაღების შემოღების საკითხი“, ხოლო პროფესორმა ჯემალ კარალიძემ მოხსენება წარმოადგინა თემაზე: „XIV საუკუნის საქართველოს საერთაშორისო ურთიერთობები“.

ბსუ-ში „ინტელექტუალური ვიქტორინის“ 2022 წლის გაზაფხულის სეზონის გამარჯვებული გუნდების დაჯილდოების ცერემონია გაიმართა. ვიქტორინის მონაწილეებს მისასალმებელი სიტყვით ბსუ-ს რექტორმა, პროფესორმა მერაბ ხალვაშმა მიმართა და წარმატებები უსურვა. გაზაფხულის სეზონში მონაწილე 27 გუნდიდან 10 ფინალისტი გუნდი გამოიკვეთა. პირველ ადგილზე გუნდი „ავე“ გავიდა, მეორე ადგილზე - „უქიმერიონი“ და მესამე ადგილზე - „უნიჭო შოთელები ანუ ტიან-შანი“.