21-25 მაისს, ბათუმის შოთა რუსთაველის სახელმწიფო უნივერისტეტის საბუნებისმეტყველო მეცნიერებათა და ჯანდაცვის ფაკულტეტის ორგანიზებით „ერაზსმუს+“-ის პროექტის ფარგლებში „აკადემიური შესაძლებლობების განვითარება გლობალურ ჯანმრთელობაში აღმოსავლეთ ევროპის და ცენტრალური აზიის რეგიონში“ შეხვედრა გაიმართა. ღონისძიებაში მონაწილეობა მიიღეს ჩრდილოეთ არქტიკის, ტრომსოს (ნორვეგია), კიევის ეროვნული უნივერსიტეტის (უკრაინა), ივან ჰორბაჩევსკის ტერნოპილის ეროვნული სამედიცინო უნივერსიტეტის (უკრაინა), ასტანას სამედიცინო უნივერსიტეტის (ყაზახეთი), ალ-ფარაბის სახელობის, ყაზახეთის ეროვნული უნივერსიტეტის, თბილისის სახელმწიფო უნივერსიტეტისა და საქართველოს უნივერსიტეტის პროფესორ-მასწავლებლებმა. შეხვედრის მიზანი იყო პროექტით გათვალისწინებული გლობალური ჯანდაცვის კურსის „კვლევის მეთოდები და სამეცნიერო წერა’’ შედეგების განხილვა და კურსის იმპლემენტაციის შესაძლებლობების განსაზღვრა.

ქიმიის დღე ბათუმის შოთ რუსთაველის სახელმწიფო უნივერსიტეტში რამდენიმე ღონისძიების აღინიშნა. თემურ ზაქარაძის სახელობის ქედის მუნიციპალიტეტის სოფელ ხარაულის საჯარო სკოლის X-XI კლასის მოსწავლეები ქიმია-ბიოლოგიის წამყვანის მასწავლებელის, მაია ხარაძის ხელმძღვანელობით საბუნებისმეტყველო მეცნიერებათა და ჯანდაცვის ფაკულტეტის ქიმიის დეპარტამენტსა და დასავლეთ საქართველოს ქრომატოგრაფიის ცენტრს ეწვივნენ. მოსწავლეები დაესწრნენ ქიმიის პოპულარიზაციის მიზნით ჩატარებულ ქიმიის სახალისო ექსპერიმენტებს. ქიმიის დეპარტამენტის პროფესორებმა ჩაატარეს თავისუფალი ლექცია ქიმიის თანამედროვე გამოწვევებსა და მიმდინარე ქიმიურ კვლევებზე, მათ შორის ვაზისა და ღვინის მიმართულებით. მოსწავლეებმა ნახეს ღვინის სტანდარტული ანალიზების: ღვინოში ალკოჰოლის, ნარჩენი შაქრის, აქტიური მჟავიანობის - pH-სა და ტიტრული მჟავიანობის განსაზღვრის მეთოდები.

ბიომრავალფეროვნების საერთაშორისო დღე საბუნებისმეტყველო მეცნიერებათა და ჯანდაცვის ფაკულტეტის ეკოლოგიისა და ბიოლოგიის მიმართულების სტუდენტებმა და პროფესორ-მასწავლებლებმა მტირალას ეროვნულ პარკში ეკოტურით აღნიშნეს. მტირალას ეროვნული პარკის ადმინისტრაციის ბუნებრივი რესურსების უფროსმა სპეციალისტმა ნინო ფუტკარაძემ სტუდენტებს გააცნო მტირალას ეროვნული პარკის ბიომრავალფეროვნება და ესაუბრა მათი მნიშვნელობის შესახებ. ღონისძიება ამ დღის აღნიშვნა მიზნად ისახავს, ხელი შეუწყოს ბიომრავალფეროვნების დაცვას და საზოგადოების, განსაკუთრებით კი ახალგაზრდა თაობის ინფორმირებულობას ფლორისა და ფაუნის ბიომრავალფეროვნების მნიშვნელობის შესახებ.

ბსუ-ს ფიზიკური მედიცინისა და სამედიცინო რეაბილიტაციის საგანმანათლებლო პროგრამის სტუდენტები პროგრამის ხელმძღვანელ პროფესორ ნერიმან ცინცაძესთან და პრაქტიკის ხელმძღვანელ პროფესორ თამარ ჩილინგარაშვილთან ერთად გაცნობითი სამუშაო ვიზიტით იმყოფებოდნენ კურორტ ციხისძირში. თანამედროვე, საერთაშორისო სტანდარტებით შექმნილ სასტუმრო კომპლექსსა და სპა-ველნეს ცენტრში სრულყოფილად არის წარმოდგენილი როგორც ქართული, ისე ფრანგული თალასოთერაპიული პროდუქცია და პროცედურები. სტუდენტები დიდი ინტერესით გაეცნენ პროცედურებს. სამომავლოდ ისინი შეძლებენ მასტერ-კლასის გავლას და დასაქმებას როგორც რეაბილიტოლოგებად, ასევე ველნეს-თერაპევტებად, რაც ხელს შეუწყობს მათ პროფესიულ წინსვლას და დასაქმების არეალის გაფართოებას. შეიქმნა წინაპირობა ამ კომპლექსის საუნივერსიტეტო ბაზად ჩამოყალიბების, რასაც როგორც ფაკულტეტის ასევე კასტელო მარეს ადმინისტრაცია დადებითად შეხვდა.

ბსუ-ს დიპლომირებული მედიკოსის ინგლისურენოვანი საგანმანათლებლო პროგრამის უცხოელმა სტუდენტებმა AGNI FEST-თან დაკავშირებით უნივერსიტეტის ეზოში ფლეშმობი მოაწყვეს. AGNI FEST-ი ინდურ კულტურაში, ცეცხლის დღესასწაულს ნიშნავს და იგი სიწმინდის სიმბოლოა. ფესტივალის მიზანია სტუდენტების გაერთიანება და მეგობრული კავშირების დამყარება. დღეს გაიმართა ფესტივალის გახსნის ცერემონია. მომდევნო დღეების განმავლობაში, უნივერსიტეტში სტუდენტთა მონაწილეობით, გაიმართება სხვადასხვა ღონისძიება, შეჯიბრება მათ შორის, სპორტისა და ხელოვნების მიმართულებით.