საბუნებისმეტყველო მეცნიერებათა და ჯანდაცვის ფაკულტეტის ბიოლოგიის დეპარტამენტის ასოცირებული პროფესორების ნინო ლომთათიძის, ნანი გვარიშვილისა და ასისტენტ პროფესორ გუგული დუმბაძის ორგანიზებით მსოფლიო ტექნოგენური კატასტროფების რისკის პრობლემებისადმი მიძღვნილი დისკუსია ჩატარდა. ღონისძიებაზე ეკოლოგიის და ეკოლოგიის minor-ის სპეციალობის III და IV კურსის სტუდენტებმა ნაშრომები წარმოადგინეს აქტუალურ საკითხებზე. ეკოლოგიის IV კურსის სტუდენტმა ნათია ფხაკაძემ მოხსენება წაიკითხა თემაზე: „საქართველოში მომხდარი მნიშვნელოვანი ბუნებრივი კატასტროფები და მათი რისკის შემცირების ღონისძიებები“, ეკოლოგიის minor-ის სპეციალობის III კურსის სტუდენტმა გალინა ფუტკარაძემ - „მსოფლიოს მნიშვნელოვანი ტექნოგენური კატასტროფები“, ეკოლოგიის მაგისტრატურის I კურსის სტუდენტმა გიული აბულაძემ - „ტექნოგენური კატასტროფების კლასიფიკაცია და მათი გამომწვევი ძირითადი მიზეზები“ და ეკოლოგიის III კურსის სტუდენტმა ხატია მესხიძემ - „საქართველოში მომხდარი მნიშვნელოვანი მიწისძვრები და მათი შედეგები“.

ბათუმის შოთა რუსთაველის სახელმწიფო უნივერსიტეტში დიაბეტის საერთაშორისო დღისადმი მიძღვნილი აქცია „ცხოვრება დიაბეტის გარეშე“ გაიმართა. უმაღლესი საგანმანათლებლო დაწესებულების სასწავლო ცენტრის ბაზაზე საბუნებისმეტყველო მეცნიერებათა და ჯანდაცვის ფაკულტეტის კლინიკური თერაპიის დეპარტამენტის პროფესორ-მასწავლებლების ინიციატივით მსურველებს გაუკეთდა გლუკოზის განსაზღვრა სისხლში, მიეცათ შესაბამისი დიეტური და საჭიროების სამკურნალო რეკომენდაციები. აქციის ფარგლებში სტუდენტებისთვის ჩატარდა მასტერკლასი დიაბეტის დიაგნოსტიკისა და პრევენციის საკითხებზე.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის ასოცირებული პროფესორის ნათელა ვარშანიძისა და ასისტენტ პროფესორის ინგა დიასამიძის ხელმძღვანელობით სტუდენტებს ღია ლექცია და საველე ექსპედიცია ჩაუტარდათ მტირალას ეროვნულ პარკში. ბიოლოგიის მაგისტრანტები და დოქტორანტები გაეცნენ მტირალას ეროვნული პარკის ფლორას, სამკურნალო, იშვიათ და ქრობად სახეობათა მრავალფეროვნებას. ექსპედიციის დასასრულს დაიგეგმა ex situ და in situ კონსერვაციის ღონისძიებები.

ქირურგთა სამეცნიერო კონფერენცია გაიმართა შოთა რუსთველის დარბაზში. ერთდღიან სამეცნიერო სესიაზე ქირურგებმა დარგის აქტუალურ საკითხებზე იმსჯელეს და ბოლო პერიოდში წარმოებული კვლევა-ძიების შედეგები შეაჯამეს. სხვადასხვა წამყვანი კლინიკებისა და საავადმყოფოების ექიმებმა მოხსენებები წარმოადგინეს ისეთ მნიშვნელოვან თემებზე, როგორიცაა: „საქართველოში ღვიძლის პირველი ტრანსპლანტაციის გამოცდილება“, „ღვიძლის ჰემაგიომების ქირურგიული მკურნალობის გამოცდილება“, „პანკრეატო - დუედონალური რეზექციები და მისი ვარიანტები“ და „ღვიძლის ქირურგიული ანატომია“. სამეცნიერო კონფერენცია ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტისა და საქართველოს აკადემიკოს გრიგოლ მუხაძის სახელობის ქირურგთა სამეცნიერო საზოგადოების ორგანიზებით ჩატარდა.

შავი ზღვის დაცვის საერთაშორისო დღესთან დაკავშირებით ბიოლოგიისა და ეკოლოგიის სპეციალობის სტუდენტები ასისტენტ პროფესორ ლალი ჟღენტისა და ასისტენტ პროფესორ ინგა დიასამიძის ხელმძღვანელობით ბათუმის აკვარიუმს და ოკეანარიუმს ეწვივნენ. დელფინარიუმის წამყვანმა სპეციალისტმა ტარიელ წეროძემ ახალგაზრდებს ჩაუტარა ღია ლექცია ზღვის ცხოველთა ბიოლოგიაზე, მათი ქცევის თავისებურებებზე, ეკოლოგიურ სტატუსსა და მათი დაცვის აუცილებლობაზე. ღონისძიების დასრულების შემდეგ სტუდენტებმა დაათვალიერეს აკვარიუმი და გაეცნენ ზღვის ძუძუმწოვრებისა და თევზების მრავალგვარობას.