შვერინისა და ბერლინის გამოყენებით მეცნიერებათა უნივერსიტეტის პროფესორი, „სოლუშენზ ჰოლდინგ“-ის აღმასრულებელი დირექტორი, მასპინძლობის ინდუსტრიის გერმანელი ექსპერტი და ბსუ-ს საპატიო დოქტორი შტეფან გერჰარდი ტურიზმის ფაკულტეტის მაგისტრატურის სტუდენტებისთვის მასტერკლასებს ატარებს „საერთაშორისო სასტუმროს მენეჯმენტის” მიმართულებით. ერთი კვირის განმავლობაში გერმანელი ექსპერტი ტურიზმის ფაკულტეტის 14 სტუდენტს შეარჩევს, რომლებიც ივნისში გერმანიაში გაემგზავრებიან და მისივე მხარდაჭერით ერთი კვირის განმავლობაში ბერლინსა და ჰამბურგში ბრენდული სასტუმროების საქმიანობას გაეცნობიან.

გერმანიის შვერინის უმაღლესი სასწავლებლის პროფესორს, „Solutions Holding GmbH“ აღმასრულებელ დირექტორს შტეფან გერჰარდს ბათუმის შოთა რუსთაველის სახელმწიფო უნივერსიტეტის აკადემიურმა საბჭომ საპატიო დოქტორის წოდება მიანიჭა. პროფესორმა შტეფან გერჰარდმა მნიშვნელოვანი წვლილი შეიტანა უნივერსიტეტის განვითარებაში, ტურიზმის მიმართულების საგანმანათლებლო და სამეცნიერო-კვლევითი პროგრამების განხორციელებაში, გერმანიში ბსუ-ს ტურიზმის ფაკულტეტის პროფესორ-მასწავლებლების სტაჟირებასა და სტუდენტების სწავლებაში. ტურისტულ ინდუსტრიაში კონსალტინგური საქმიანობისა და ცენტრალურ ევროპაში სერტიფიცირებული მრჩევლის 30-წლიანი გამოცდილებით პროფესორი შტეფან გერჰარდი ინდუსტრიის აღიარებულია ექსპერტია.

18-22 თებერვალს ბათუმის შოთა რუსთაველის სახელმწიფო უნივერსიტეტს „ერაზმუს+“-ის აკადემიური/ადმინისტრაციული პერსონალის გაცვლითი პროგრამის ფარგლებში ვროცლავის უმაღლესი საბანკო სკოლის (პოლონეთი) დელეგაცია ეწვია. ხუთდღიანი ვიზიტის ფარგლებში პოლონელმა პროფესორებმა სამუშაო შეხვედრები გამართეს ეკონომიკისა და ბიზნესისა და ტურიზმის ფაკულტეტებზე. ეკონომიკისა და ბიზნესის ფაკულტეტის სტუდენტებმა და პროფესორ-მასწავლებლებმა პოლონელ კოლეგებთან ერთად საჯარო ლექციებზე სწავლის/სწავლების თანამედროვე მეთოდები და ევროკომისიის მიერ დაფინანსებული საგრანტო პროექტების წარდგენის პროცედურები განიხილეს.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის სტუდენტებმა 16-23 დეკემბერს, ბერლინსა და ჰამბურგში მონაწილეობა მიიღეს „საერთაშორისო სასტუმროს მენეჯმენტის“ სტაჟირების პროგრამაში. ერთკვირიანი პროგრამის ფარგლებში ბრენდული სასტუმროების (Scandic, Mercure, Henri, Fairmont, Prizeotel) წარმომადგენლებმა სტუდენტებს ჩაუტარეს ინტენსიური ტრენინგი სასტუმრო ინდუსტრიის მენეჯმენტსა და კარიერულ შესაძლებლობებზე.

გლობალური განათლების საერთაშორისო ქსელის (GLEN) უნგრელმა და გერმანელმა სტაჟიორებმა ტურიზმის ფაკულტეტის სტუდენტებთან საინფორმაციო შეხვედრა ჩაატარეს თემაზე: „სტაჟირება და მოხალისეობა საზღვარგარეთ“. GLEN-ის საერთაშორისო ორგანიზაცია აერთიანებს აქტიურ, ახალგაზრდა სტუდენტებსა და პროფესიონალებს, რათა დაგეგმონ და განახორციელონ ერთობლივი მდგრადი პროექტები სამხრეთ-აღმოსავლეთ ევროპის, აზიის, აფრიკისა და კავკასიის რეგიონებში. ტურიზმის ფაკულტეტი GLEN-ის სტაჟიორ სტუდენტებს 2009 წლიდან მასპინძლობს.