სემინარი მომზადდა სამეცნიერო კვლევითი პროექტი „ცოდნის გაცვლის და აკადემიური კულტურა ჰუმანიტარულ მეცნიერებებში - შავი ზღვის რეგიონი და ევროპა“ ფარგლებში.
თანამედროვე სამყარო წარმოუდგენელია იმ მეცნიერული მიღწევების გარეშე, რომელიც ჩვენი ყოველდღიური ცხოვრების განუყოფელ ნაწილს წარმოადგენენ. გლობალიზაციის პირობებში ეს მეცნიერული სიახლეების გაზიარება, დისტანციური სწავლება, საერთაშორისო კონფერენციები შესაძლებელია იმიტომ, რომ თანამედროვე ერები აქტიურად იყენებენ ლინგვა ფრანკას, რომლის როლსაც ამ ეტაპზე ინგლისური ენა ასრულებს. საუკუნეების წინ ეს პროცესი ან წარმოუდგენელი იყო, და კიდევ ძალიან შენელებული, მაგრამ მიუხედავად ყველა წინაღობისა ქვეყნები ახერხებდნენ მრავალფეროვანი ურთიერთობების დამყარებას მათო შორის მეცნიერების დარგში. მეცნიერები და ისტორიკოსები მოგზაურობდნენ, თარგმნიდნენ, ეზიარებოდნენ სხვა მეცნიერთა ცოდნას და ეს პროცესი საუკუნეებია გრძელდება. მართალია, ეს პროცესი ბოლო საუკუნეებში უფრო გააქტიურდა, მაგრამ წარსულის ენთუზიასტი მთარგმნელების, მათი მფარველი მეცენატების და კულტურული კერების შექმნის გარეშე მეცნიერება არასოდეს მიაღწევდა არსებულ დონეს. პროექტის მიზანია სისტემატურად შეისწავლოს ცოდნის და კულტურული გამოცილების გაცვლის პროცესი ევროპის ქვეყნებსა და შავი ზღვის ქვეყნებს, ჩვენი სემინარის შემთხვევაში კი საქართველოს, შორის.

საინფორმაციო სივრცეში უსაფრთხოების უზრუნველყოფის სირთულეებს საზღვრები არ გააჩნია. ყველა ქვეყანა და შესაბამისი სამსახურები ცდილობს ეს საკითხი გადაჭრას დამოუ¬კიდებლად, რის გამოც საჭირო ზომები და ღონისძიებები ხშირ შემთხვევაში არ არის საკმარისი. არსებობს უამრავი სირთულე როგორც კიბერუსაფრთხოების სირთულეების ჩვენეულ გაგებაში, ისე სახელმწიფო პოლიტიკაში და ტექნიკურ შესაძლებლობებში, რომლებიც აუცილებელია მოცემული საკითხების გადასაჭრელად.

ინკლუზიური განათლება თანდათან ინერგება სკოლამდელი, ზოგადი და პროფესიული განათლების საფეხურებზე. მართალია, ხარისხიანი განათლების მიღება და შესაძლებლობების ფარგლებში შშმ/სსსმ პირთა განვითარება ჯერ კიდევ პრობლემად რჩება განათლების დასახელებულ საფეხურებზე, თუმცა გარკვეული სახის წარმატებები ფიქსირდება და არის მზაობა იმისა, რომ გაიზიარონ წარმატებული ქვეყნების გამოცდილება და მიაღწიონ უკეთეს შედეგებს.

თანამედროვე ეტაპზე ლიტერატურის ფუნქციების ახლებურმა გააზრებამ გამოიწვია ლიტერატურული პროცესის ხასიათისა და შემადგენელი ელემენტების ცვლილება, ტრანსფორმაცია. შეიცვალა თავად კითხვის ხასიათი, ის უფრო ინფორმაციული, პრაგმატული გახდა. XXI საუკუნის დასაწყისში მოთხოვნადი გახდა ე.წ. მასობრივი ლიტერატურა, რომელიც ერთგვარად ფსიქოლოგიური განტვირთვისა და დასვენების საშუალებად იქცა. შესაბამისად, შეიცვალა მკითხველის ტიპი და მისი კომპეტენციის დონე. ე.წ. „ელიტარული“, სერიოზული ლიტერატურა მკითხველისაგან მოითხოვს არა მარტო შრომას, აქტიურ აზროვნებას, არამედ მკითხველის კომპეტენციის (მომზადების) მაღალ დონესაც. XX საუკუნის დასაწყისისა და XXI-ს დასაწყისის მასობრივ მკითხველს კი სჭირდება ერთგვარი საშუალება, რომელიც დააკმაყოფილებს მის პირველად კულტურულ-ფსიქოლოგიურ მოთხოვნებს - ეს არის დასვენება, პრობლემებისაგან თავის დაღწევა, ყოველდღიური მონოტონური რუტინისაგან თავისდაღწევა. „მასობრივი“ ლიტერატურა იქცა იმ საშუალებად, რომელსაც რთული ინტელექტუალური პრობლემები დაჰყავს პრიმიტიულ ოპოზიციებამდე („კარგი-ცუდი“, „სიკეთე-ბოროტება“...). ამგვარი გამარტივება მასობრივ მკითხველს საშუალებას აძლევს თავიდან აიცილოს სოციალური პასუხისმგებლობა და პირადი არჩევანის გაკეთების აუცილებლობა. შესაბამისად, თანამედროვე მასობრივი ლიტერატურის მკითხველისადმი უფრო ნაკლები მოთხოვნებია.

რომაული სიბრძნე – თუ გინდა მშვიდობა, ემზადე ომისათვის (Si vis pacem, para bellum), ერთდროულად მოიცავს ურთიერთსაწინააღმდეგო სხვა და სხვა მოსაზრებებს და ერთი შეხედვით პარადოქსულად ჟღერს, მაგრამ, ყოფიერების კანონზომიერებიდან გამომდინარე, მაინც შეიცავს გარკვეულ ლოგიკას – დემოკრატიული, მშვიდობიანი სახელმწიფოს სათანადო სამხედრო მზადყოფნა და მაღალი თავდაცვისუნარიანობა, დიდი საერთაშორისო ავტორიტეტი, პოტენციურ აგრესორს თავდასხმას გადააფიქრებინებს, უკარგავს შეიარაღებული აგრესიისა და სამხედრო ინტერვენციის განხორციელების სურვილს და შედეგად, მოსალოდნელი ომის საფრთხე იკლებს. ეს კი ომის პრევენციისა და მშვიდობის შენარჩუნების ერთერთი საშუალებაა.