ბათუმის შოთა რუსთაველის სახელმწიფო უნივერსიტეტში პროფესორ დავით გოცირიძის 70 წლის იუბილესადმი მისღვნილი საერთაშორისო სამეცნიერო კონფერენცია „ინტერდისციპლინარული კვლევების ახალი ჰორიზონტები“ გაიხსნა. ორდღიან კონფერენციაში მონაწილეობენ საქართველოს შვიდი უნივერსიტეტისა და ექვსი უცხოური უნივერსიტეტის ასამდე წარმომადგენელი. ლინგვისტიკის ახალი ჰორიზონტების, თარგმანის და კულტურათაშორისი კომუნიკაციის და ლიტერატურული თეორია და კომპარატივისტიკის სექციებში პროფესორ-მასწავლებლები და მკვლევრები ბოლო პერიოდში განხორციელებული კვლევების შედეგებს წარმოადგენენ და ჰუმანიტარულ მეცნიერებათა აქტუალურ საკითხებზე იმსჯელეებენ.

ბათუმის შოთა რუსთაველის სახელმწიფო უნივერსიტეტის მიერ დაფინანსებული მიზნობრივი სამეცნიერო პროექტის ფარგლებში გამოიცა ასოცირებულ პროფესორ ირაკლი ბარამიძის, ასოცირებულ პროფესორ ხათუნა დიასამიძისა და ისტორიის დოქტორ ოლეგ ჯიბაშვილის მონოგრაფია „ბათუმი ბრიტანეთის ვიცე-კონსულების ანგარიშებში (XIX საუკუნის 30-50-იანი წლები)“. წიგნში წარმოდგენილია ბათუმში ოსმალეთის მმართველობის ის პერიოდი, რომელზეც საინტერესო ცნობები მოიპოვება დიდი ბრიტანეთის ვიცე-კონსულების – ჯ. ბრანტის, ფ. გუარაჩინოსა და უ. ჰოლმსის ანგარიშებში. სამეცნიერო წრეებისათვის ფაქტობრივად უცნობი მასალების, ასევე, მოგზაურ-მკვლევართა ჩანაწერების საფუძველზე განხილულია ბათუმში მიმდინარე სოციალურ-პოლიტიკური და სავაჭრო-ეკონომიკური პროცესები, მოსახლეობის ყოფითი პრობლემები, ყურის მიმართულებით საქალაქო ცენტრის გადანაცვლების მიზეზები და სხვა საკითხები. წიგნი განკუთვნილია სპეციალისტებისა და ბათუმის ისტორიით დაინტერესებული პირებისათვის.

შოთა რუსთაველის საქართველოს ეროვნული სამეცნიერო ფონდის მიერ დაფინანსებული პროექტის ფარგლებში მკითხველმა მიიღო მონოგრაფია „კათოლიკობა და კათოლიკეები საქართველოში XIX-XXI სს. (ისტორია, კულტურა, თანამედროვეობა)“. წიგნის ავტორები არიან: პროფესორი კახაბერ სურგულაძე, ასოცირებული პროფესორი ირაკლი ბარამიძე, ასოცირებული პროფესორი ხათუნა დიასამიძე და ისტორიის დოქტორი ტატიანა კოპალეიშვილი. სახელმძღვანელოში შესწავლილია კათოლიკობის ისტორია საქართველოში შუა საუკუნეებიდან დღემდე, ყურადღება გამახვილებულია XIX-XX საუკუნეების ქართველ კათოლიკე მოღვაწეებსა და მათ დამსახურებაზე ქვეყნისა და რელიგიის წინაშე. აქვე წარმოდგენილია სტამბოლის კათოლიკური სავანის, ბათუმის კათოლიკური ეკლესიის ისტორია და სხვა მნიშვნელოვანი საკითხები. წიგნი განკუთვნილია სპეციალისტებისა და ფართო მკითხველი საზოგადოებისთვის.

ბათუმის შოთა რუსთაველის სახელმწიფო უნივერსიტეტის თანადაფინანსებით ჰუმანიტარულ მეცნიერებათა ფაკულტეტის ასოცირებულმა პროფესორმა ხათუნა დიასამიძემ სახელმძღვანელო „ევროპისა და ამერიკის ქვეყნების ახალი ისტორია“ გამოსცა, რომელშიც წარმოდგენილია ევროპისა და ამერიკის წამყვანი სახელმწიფოების სოციალურ-ეკონომიკური და პოლიტიკური ცხოვრების მნიშვნელოვანი ასპექტები, სახელმწიფოთაშორისი ურთიერთობები და საზოგადოებრივი განვითარების დინამიკა XVII საუკუნიდან პირველ მსოფლიო ომამდე. სახელმძღვანელო განკუთვნილია სტუდენტებისა და ფართო მკითხველი საზოგადოებისთვის.

ბსუ-ს ჰუმანიტარულ მეცნიერებათა ფაკულტეტის ფილოსოფიის დეპარტამენტის ასოცირებულმა პროფესორმა ვარდო ბერიძემ გამოსცა ნარკვევების კრებული „მეცნიერება, ხელოვნება, ეთიკა“. კრებულში შესულია ავტორის მიერ სხვადასხვა დროს გამოქვეყნებული სტატიისა და კვლევის შედეგები. ავტორის პრიორიტეტულ კვლევით სფეროს წარმოადგენს მეცნიერების ფილოსოფია, ეთიკა (გამოყენებითი ეთიკა), ფილოსოფიური ანთროპოლოგია. წიგნიში ამ მიმართულებით იკვეთება მეცნიერების ფილოსოფიისა და ეთიკის კავშირის გამომხატველ საკითხთა განსხვავებულ სპექტრზე ორიენტირება, კერძოდ, მეცნიერებისა და ეთიკის, მეცნიერებისა და ხელოვნების ურთიერთმიმართების ჭრილში. ნარკვევი განკუთვნილია ფილოსოფიის მიმართულების სტუდენტებისა და ფილოსოფიის პრობლემატიკით დაინტერესებული მკითხველთათვის.