ახალი ამბები

ბათუმის შოთა რუსთაველის სახელმწიფო უნივერსიტეტში სტუდენტებისა და მოსწავლეებისათვის საგანმანათლებლო შეხვედრა გაიმართა. აშშ-ს მთავრობის გაცვლითი პროგრამების საქართველოს მონაწილეთა ასოციაციის წევრებმა ახალგაზრდებს სოციალური ქსელი და მისი როლი, ინტერნეტში ინფორმაციის განთავსების რისკები, ე.წ. ციფრული ანაბეჭდები და სხვა აქტუალური საკითხები გააცნეს. ღონისძიების ფარგლებში, ასევე შედგა ამერიკის მთავრობის გაცვლითი პროგრამები წარდგენა. შეხვედრა ბსუ-სა და აშშ-ს მთავრობის გაცვლითი პროგრამების საქართველოს მონაწილეთა ასოციაციის ორგანიზებით ჩატარდა.

ბათუმის შოთა რუსთაველის სახელმწიფო უნივერსიტეტს სან დიეგოს უნივერსიტეტის პრეზიდენტი ადელა დე ლა ტორე და სან დიეგოს სახელმწიფო უნივერსიტეტის დეკანი საქართველოში ჰალილ გუვენი ეწვივნენ. უნივერსიტეტის რექტორთან მერაბ ხალვაშთან და ტექნოლოგიური ფაკულტეტის დეკანთან გიზო ფარცხალაძესთან გამართულ შეხვედრაზე დაიგეგმა ერთობლივი საგანმანათლებლო პროგრამების განხორციელება და გაცვლითი პროგრამების ამოქმედება ბათუმის შოთა რუსთაველის სახელმწიფო უნივერსიტეტისა და სან დიეგოს უნივერსიტეტის სტუდენტებისათვის. ვიზიტის ფარგლებში სტუმრები ბსუ-ს ქრომატოგრაფიული ცენტრის მუშაობის სპეციფიკას და ტექნოლოგიურ ფაკულტეტთან არსებულ სამრეწველო ინოვაციების ლაბორატორიას გაეცნენ.

ბათუმის შოთა რუსთაველის სახელმწიფო უნივერსიტეტში ქიმიის ფესტივალი გაიმართა. ბსუ-ს საბუნებისმეტყველო მეცნიერებათა და ჯანდაცვის ფაკულტეტის სტუდენტებმა ღონისძიება ფლეშმობით გახსნეს. ქიმიის დეპარტამენტის პროფესორებმა და პირველი კურსის სტუდენტებმა სკოლის მოსწავლეებისთვის ინტერაქციული გამოფენა მოაწყვეს. ღონისძიების ფარგლებში მოსწავლეებმა 20-მდე ქიმიური ექსპერიმენტის ჩატარებაში მიიღეს მონაწილეობა. ქიმიის ფესტივალი ბსუ-ს საბუნებისმეტყველო მეცნიერებათა და ჯანდაცვის ფაკულტეტის ქიმიის დეპარტამენტის ორგანიზებით გაიმართა.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და ზურაბ ჟვანიას სახელობის სახელმწიფო ადმინისტრირების სკოლის დირექტორმა ქეთევან ჯაყელმა თანამშრომლობის მემორანდუმს მოაწერეს ხელი. ხელშეკრულება მიზნად ისახავს ერთობლივი საგანმანათლებლო პროექტების განხორციელებას. მემორანდუმის ფარგლებში გაიმართება კონფერენციები, სესიები, საზაფხულო სკოლები, ტრენიბგები და სემინარები. მხარეები ასევე ხელს შეუწყობენ საკვალიფიკაციო კურსების ჩატარებას და პრაქტიკული სამეცნიერო-კვლევითი სამუშაოების წარმოებას.

ლატვიის რესპუბლიკის ელჩი საქართველოში ინგრიდა ლევრენცე ბათუმის შოთა რუსთაველის სახელმწიფო უნივერსიტეტს ეწვია. დიპლომატიური კორპუსის წარმომადგენელმა უნივერსიტეტის რექტორთან მერაბ ხალვაშთან გამართულ გაცნობითი ხასიათის შეხვედრაზე სამომავლო თანამშრომლობასა და ორ ქვეყანას შორის არსებულ მეგობრულ ურთიერთობებზე ისაუბრა. მხარეთა შეთანხმებით, დაიგეგმა ლატვიის უმაღლეს საგანანმანათლებლო დაწესებულებებთან თანამშრომლობის გამყარება, ტურიზმის მიმართულებით ერთობლივი საგანმანათლებლო პროგრამების განხორციელება, ერაზმუს+-ის გაცვლითი პროგრამის ფარგლებში სტუდენტებისა და პროფესორ-მასწავლებლების მობილობა და კულტურული ღონისძიებების ჩატარება. 10 ივლისს, ბსუ-ში მოეწყობა ლატვიის რესპუბლიკის დღისადმი მიძღვნილი გამოფენა.