ახალი ამბები

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და ზურაბ ჟვანიას სახელობის სახელმწიფო ადმინისტრირების სკოლის დირექტორმა ქეთევან ჯაყელმა თანამშრომლობის მემორანდუმს მოაწერეს ხელი. ხელშეკრულება მიზნად ისახავს ერთობლივი საგანმანათლებლო პროექტების განხორციელებას. მემორანდუმის ფარგლებში გაიმართება კონფერენციები, სესიები, საზაფხულო სკოლები, ტრენიბგები და სემინარები. მხარეები ასევე ხელს შეუწყობენ საკვალიფიკაციო კურსების ჩატარებას და პრაქტიკული სამეცნიერო-კვლევითი სამუშაოების წარმოებას.

ლატვიის რესპუბლიკის ელჩი საქართველოში ინგრიდა ლევრენცე ბათუმის შოთა რუსთაველის სახელმწიფო უნივერსიტეტს ეწვია. დიპლომატიური კორპუსის წარმომადგენელმა უნივერსიტეტის რექტორთან მერაბ ხალვაშთან გამართულ გაცნობითი ხასიათის შეხვედრაზე სამომავლო თანამშრომლობასა და ორ ქვეყანას შორის არსებულ მეგობრულ ურთიერთობებზე ისაუბრა. მხარეთა შეთანხმებით, დაიგეგმა ლატვიის უმაღლეს საგანანმანათლებლო დაწესებულებებთან თანამშრომლობის გამყარება, ტურიზმის მიმართულებით ერთობლივი საგანმანათლებლო პროგრამების განხორციელება, ერაზმუს+-ის გაცვლითი პროგრამის ფარგლებში სტუდენტებისა და პროფესორ-მასწავლებლების მობილობა და კულტურული ღონისძიებების ჩატარება. 10 ივლისს, ბსუ-ში მოეწყობა ლატვიის რესპუბლიკის დღისადმი მიძღვნილი გამოფენა.

ბათუმის შოთა რუსთაველის სახელმწიფო უნივერსიტეტში საქართველოში ირანის ისლამური რესპუბლიკის საელჩოს კულტურის განყოფილების და ბათუმში ირანის ისლამური რესპუბლიკის გენერალური საკონსულოს ორგანიზებით ირანის კულტურის დღეები დაიწყო. ღონისძიება უნივერსიტეტის რექტორმა მერაბ ხალვაშმა, ირანის ისლამური რესპუბლიკის პრეზიდენტის მრჩეველმა კულტურის დარგში ალი ჯანათიმ, ირანის ისლამური რესპუბლიკის გენერალური საკონსულოს მეთაურის მოვალეობის შემსრულებელმა აჰმად მადფამ და ირანის ისლამური რესპუბლიკის გენერალური საელჩოს კულტურის განყოფილების ხელმძღვანელმა ჰამიდ მოსტაფავიმ გახსნეს. ირანის კულტურის დღეების ფარგლებში მოეწყო ირანელი მხატვრების ჰურა ფიშყადამისა და რანა საიდის ნამუშევრების გამოფენა და ფილმების ჩვენება.

გარემოს დაცვის საერთაშორისო დღე ბათუმის შოთა რუსთველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის პროფესორ-მასწავლებლებმა, სტუდენტებმა და ბათუმის №1 საჯარო სკოლის მოსწავლეებმა ბულვარის მიმდებარე ტერიტორიაზე შავი ზღვის სანაპირო ზოლის დასუფთავების აქციით აღნიშნეს. ღონისძიება USAID-ის და CENN-ის ერთობლივი პროგრამის „ნარჩენების მართვის ტექნოლოგია რეგიონებში, ფაზა II-ის“ (WMTR II) ფარგლებში ჩატარდა. 5 ივნისი გარემოს დაცვის დღედ გაეროს გენერალურმა ასამბლეამ 1972 წლის 15 დეკემბერს გამოაცხადა.

საქართველოს სახალხო დამცველი ნინო ლომჯარია ბათუმის შოთა რუსთაველის სახელმწიფო უნივერსიტეტს ეწვია. ომბუდსმენმა სხვადასხვა ფაკულტეტის სტუდენტებთან გამართულ შეხვედრაზე ადამიანის უფლებების დაცვის მიმართულებით არსებულ გამოწვევებზე, რეფორმებზე, სიახლეებზე ისაუბრა და ახლაგაზრდებს სახალხო დამცველის საქმიანობის პრინციპები გააცნო. შეხვედრა კითხვა-პასუხის რეჟიმში წარიმართა და სახალხო დამცველმა ნინო ლომჯარიამ სტუდენტების აქტუალურ შეკითხვებს უპასუხა.