ახალი ამბები

დედა ენის დღისადმი მიძღვნილი ღონისძიებების ფარგლებში ბათუმის შოთა რუსთაველის სახელმწიფო უნივერსიტეტში პროფესორ მალხაზ ჩოხარაძის დოკუმენტური ფილმის „ამბავი თორმეტი სავანისა“ პრემიერა გაიმართა. ფილმში ასახულია კლარჯეთის „ათორმეტ სავანეთა“ მხარის წარსული და თანამედროვეობა, ქართველებისა და ქართული ენის მდგომარეობა ისტორიულ სამხრეთ საქართველოში - ტაოში, კლარჯეთსა და შავშეთში. სცენარის სამეცნიერო საფუძველია მონოგრაფია „ხანძთა და ათორმეტ სავანეთა მხარის ძველი სალოცავები. ფილმში გამოყენებულია 2005-2018 წლების სამეცნიერო ექსპედიციების საველე ვიდეომასალა: პროფესორ მალხაზ ჩოხარაძის და ბსუ-ს ჰუმანიტარულ მეცნიერებათა ფაკულტეტის ქართველოლოგიის ცენტრის ვიდეოარქივი.

ბათუმის შოთა რუსთაველის სახელმწიფო უნივერსიტეტში აჭარის დასაქმების სააგენტოს „სტუდენტთა დასაქმების ხელშეწყობის“ პროგრამის წარდგენა გაიმართა. პროგრამა ხორციელდება სპეციალურად სტუდენტებისთვის შემუშავებული მოკლევადიანი სასწავლო მოდულით, რომელიც მოიცავს თეორიულ და პრაქტიკულ კურსს პროფესიული მიმართულებით, უცხო ენის ცოდნის დონის ამაღლებას პროფესიისათვის საჭირო ტერმინოლოგიითა და სამუშაო გამოცდილების მიღებას საწარმოო პრაქტიკის უზრუნველყოფის გზით. სწავლების ფარგლებში, სტუდენტები პრეზენტაციის უნარ-ჩვევების განვითარების მიზნით, დამატებით გაივლიან მოკლევადიან სპეციალიზირებულ ტრენინგ კურსს შემდეგი მიმართულებით - რეზიუმეს, სამოტივაციო წერილის შედგენა და გასაუბრებაზე მოქცევის წესები.

აკადემიკოსს, თბილისის ივანე ჯავახიშვილის სახელობის სახელმწიფო უნივერსიტეტის პროფესორს, გამოყენებითი ეკონომიკის კვლევის ცენტრის დირექტორს, საქართველოს სახელმწიფო პრემიის ლაურეატ ვლადიმერ პაპავას ბათუმის შოთა რუსთაველის სახელმწიფო უნივერსიტეტის აკადემიურმა საბჭომ საპატიო დოქტორის წოდება მიანიჭა. აკადემიკოს ვლადიმერ პაპავას დიდი წვლილი მიუძღვის ქართული ეკონომიკური მეცნიერების განვითარებაში, ბსუ-ს ეკონომიკისა და ბიზნესის მიმართულების საგანმანათლებლო პროგრამების განხორციელებასა და მომავალი თაობების აღზრდაში. იგი 261 სამეცნიერო ნაშრომის, სახელმძღვანელოს, მონოგრაფიის, ლიცენზიისა და პატენტის ავტორია.

ბსუ-ს სტუდენტთა თავისუფალი და სამეცნიერო პროექტების კონკურსის გამარჯვებული პროექტი „ეკონომიკური დებატები - ბსუ 2019“ დაიწყო. სტუდენტური ინიციატივა მიზნად ისახავს სხვადასხვა უნივერსიტეტის ეკონომიკის მიმართულების სტუდენტებს შორის ფორმალური დებეტების საშუალებით ცოდნის გაზიარების ხელშეწყობას, საჯარო გამოსვლებისა და აუდიტორიასთან კომუნიკაციის უნარ-ჩვევების გამომუშავებას. პროექტის ავტორია ეკონომიკისა და ბიზნესის ფაკულტეტის სტუდენტი ნესტან ვარშანიძე. პროგრამა ითვალისწინებს საჯარო ლექციების, ტრენინგებისა და დებატების ტურნირის ჩატარებას. აკადემიკოსმა ვლადიმერ პაპავამ პროექტის ფარგლებში საჯარო ლექცია წაიკითხა თემაზე: „საქართველოს ეკონომიკის გამოწვევები და განვითარების პერსპექტივები“, ხოლო ტურიზმის ინსტიტუტის დირექტორმა მამუკა ბერძენიშვილმა მოხსენება - „ტურიზმის პოლიტიკა - არასეზონურობა“ წარადგინა.

9 აპრილის ტრაგედიიდან 30 წელი გავიდა. ბათუმის შოთა რუსთაველის სახელმწიფო უნივერსიტეტის სტუდენტები, რექტორი, პროფესორ-მასწავლებლები, აჭარის მთავრობისა და საზოგადოების წარმომადგენლები გმირთა ხეივანში შეიკრიბნენ, მემორიალი ყვავილებით შეამკეს და საქართველოს დამოუკიდებლობისთვის დაღუპულთა ხსოვნას პატივი მიაგეს.