ახალი ამბები

ბსუ-ში ახალი „თავისუფალი სივრცე“ ოთარ იოსელიანის ფილმის „იყო შაშვი მგალობელი“ ჩვენებით გაიხნა. ფილმის დასრულების შემდეგ განხილვა და დისკუსია შედგა, რომელიც წარმართა ბსუ-ს კინოკლუბის წამყვანმა, ასოცირებულმა პროფესორმა გიორგი მასალკინმა. შეხვედრა ბსუ-ს სტუდენტთა კარიერული განვითარების, კულტურისა და სპორტის დეპარტამენტის ორგანიზებით გაიმართა.
ბსუ-ს ახალი „თავისუფალი სივრცე“ უმასპინძლებს კინოჩვენებებს, ლიტერატურულ საღამოებს, გამოფენებს, შეხვედრებს ცნობილ ადამიანებთან და სხვადასხვა სახის ღონისძიებებს.

ბათუმის შოთა რუსთაველის სახელმწიფო უნივერსიტეტის სააქტო დარბაზში საქართველოს სახალხო არტისტის ლეო ანთაძის მონოსპექტაკლი „ბახტრიონი“ გაიმართა. ლეო ანთაძე 64 წელია კოტე მარჯანიშვილის სახელობის სახელმწიფო აკადემიურ დრამატულ თეატრში მოღვაწეობს. მონოსპექტაკლი მსახიობმა და რეჟისორმა ვაჟა-ფშაველას გარდაცვალებიდან მე-100 წლისთავთან დაკავშირებით პოემის „ბახტრიონი“ მიხედვით მოამზადა. საქართველოს სახალხო არტისტს საავტორო სპექტაკლის დადგმისთვის ვაჟა-ფშაველას სახელობის პრემია მიენიჭა

„ერაზმუს +“- ის ეროვნული ოფისის კოორდინატორმა ლიკა ღლონტმა ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: "პლაგიატის პრობლემა და მასთან ბრძოლის პრაქტიკა". ლიკა ღლონტმა სტუდენტებს ქართულ აკადემიურ სივრცეში არსებული პლაგიატის შესწავლის პრობლემები, მასთან ბრძოლის და პრევენციის შემუშავების მეთოდები გააცნო და ხარისხის უზრუნველყოფის მნიშვნელობასა და განათლების ინტერნაციონალიზაციაზე ესაუბრა. საჯარო ლექცია ბსუ-ს სტუდენტური პროექტების კონკურსის - „სტუდენტები აკადემიური განვითარებისთვის" ფარგლებში ჩატარდა.

ბათუმის შოთა რუსთაველის სახელმწიფო უნივერსიტეტში აუტიზმის ცნობადობის ამაღლების საერთაშორისო დღე აღინიშნა. ბიოლოგიის საგანმანათლებლო პროგრამის I კურსის და ფსიქოლოგიის საგანმანათლებლო პროგრამის II კურსის სტუდენტებმა საინფორმაციო შეხვედრა გამართეს. ღონისძიებაზე სტუდენტებმა თემატური პრეზენტაციები და ვიდეორგოლები წარმოადგინეს აუტიზმის გენეტიკის, აუტიზმის სპექტრის დიაგნოსტირებისა და მკურნალობის გზებზე. 2007 წელს გაეროს გენერალური ასამბლეის გადაწყვეტილებით 2 აპრილი აუტიზმის ინფორმაციის გავრცელების მსოფლიო დღედ გამოცხადდა.

"სტუდენტთა სამეცნიერო საზოგადოება ბსუ"-ს ორგანიზებით სტუდენტური პროექტის: "სტუდენტები აკადემიური განვითარებისთვის" წარდგინება გაიმართა. პროექტის ფარგლებში, ბათუმის შოთა რუსთაველის სახელმწიფო უნივერსიტეტის რექტორი, მერაბ ხალვაში სტუდენტებს შეხვდა. რექტორმა ყურადღება გაამახვილა სამეცნიერო კვლევების მნიშვნელობაზე, ამ მიმართულებით მიმდინარე გამოწვევებზე და სტუდენტების აქტუალურ შეკითხვებს უპასუხა. ღონისძიებას პროექტის ფარგლებში შერჩეული სხვადასხვა საგანმანათლებლო პროგრამის სტუდენტები ესწრებოდნენ.