ახალი ამბები

მასწავლებელთა პროფესიული განვითარების ეროვნული ცენტრის პროგრამის „ასწავლე საქართველოსთვის“ წარდგენა ჩატარდა ბათუმის შოთა რუსთაველის სახელმწიფო უნივერსიტეტში. პროგრამის მენეჯერმა ლალი წიკლაურმა სტუდენტებს პროექტში მონაწილეობის პირობები, არსებული სიახლეები და სამომავლო გეგმები გააცნო. პროგრამის „ასწავლე საქართველოსთვის“ მიზანია მაღალმთიანი და ბარის შორეული სოფლების საჯარო სკოლებში კვალიფიციური კადრების მოზიდვის გზით სწავლა-სწავლების პროცესის ხელშეწყობა, განათლების მიღების თანაბარი შესაძლებლობების უზრუნველყოფა და კვალიფიციური კადრების მასწავლებლის პროფესიით დაინტერესება.

სტუდენტთა სამეცნიერო კონფერენციის მონაწილეების დაჯილდოება გაიმართა ბათუმის შოთა რუსთაველის სახელმწიფო უნივერსიტეტში. ბსუ-ს რექტორმა მერაბ ხალვაშმა და ფაკულტეტების დეკანებმა სესიის მონაწილეებს სერტიფიკატები გადასცეს, გამარჯვება მიულოცეს და წარმატებები უსურვეს. ორდღიან კონფერენციაში ცხრამეტი სექციის მიმართულებით წარმოდგენილი 150 სამეცნიერო მოხსენება პროფესორ-მასწავლებლებთან ერთად, დარგის სპეციალისტებმა შეაფასეს. სტუდენტებს სესიაში მონაწილეობისათვის სერტიფიკატები გადაეცათ, თითოეული სექციის სამ საუკეთესო მონაწილეს - ფულადი ჯილდო, ხოლო სამი საუკეთესო მოხსენების ავტორს სამეცნიერო კონფერენციაში მონაწილეობა დაუფინანსდა.

ბათუმის შოთა რუსთაველის სახელმწიფო უნივერსიტეტში სკოლისა და უნივერსიტეტის თანამშრომლობის კლუბის „სკოლა-უნივერსიტეტი” ფარგლებში, სტუდენტთა და მოსწავლეთა მეშვიდე სამეცნიერო კონფერენცია ჩატარდა. ტრადიციული სამეცნიერო კონფერენციის 9 სექციის მიმართულებით ასზე მეტმა მონაწილემ მოხსენებები წარმოადგინა განათლების, ქართული ენისა და ლიტერატურის, ისტორიის, უცხო ენის, საბუნებისმეტყველო მეცნიერებების აქტუალურ საკითხებზე.

18-23 მაისს, ბათუმის შოთა რუსთაველის სახელმწიფო უნივერსიტეტის სტუდენტურმა ქორეოგრაფიულმა ანსამბლმა „ტბეთმა“ წარმატებით მიიღო მონაწილეობა თურქეთში, ქალაქ გირესუნში გამართულ 42-ე ცეკვის საერთაშორისო ფესტივალში. ანსამბლის ვიზიტს დადებითი გამოხმაურება მოჰყვა ადგილობრივ მედიაში. უნივერსიტეტისა და ანსამბლ „ტბეთის“ ისტორიას მიეძღვნა არაერთი გადაცემა და სტატია. „ტბეთის“ წევრები გირესუნის უნივერსიტეტის სტუდენტებს შეხვდნენ და სასწავლებელში გამართულ კონცერტში მიიღეს მონაწილეობა. ფესტივალის ფარგლებში შეხვედრა გაიმართა ასევე, გირესუნის მერთან, რომელმაც ანსამბლის წევრებს სამახსოვრო საჩუქრები გადასცა.

ბსუ-ს სტუდენტურმა ანსამბლმა ფესტივალში მონაწილეობა გირესუნის ვალისა და მერიის მიწვევით მიიღო.

ბათუმის შოთა რუსთაველის სახელმწიფო უნივერსიტეტში საქართველოს დამოუკიდებლობის დღისადმი მიძღვნილი საჯარო ლექციები ჩატარდა. ჰუმანიტარულ მეცნიერებათა ფაკულტეტის პროფესორმა ოთარ გოგოლიშვილმა ლექცია წაიკითხა თემაზე: „1918 წლის 26 მაისი“, იურიდიული და სოციალურ მეცნიერებათა ფაკულტეტის პროფესორმა მურმან გორგოშაძემ მოხსენება „კანონმდებლობა მშობლიური ენის შესახებ 1918-1921 წლებში“ წარადგინა, ხოლო ბიზნესისა და ეკონომიკის ფაკულტეტის ასოცირებულმა პროფესორმა პაატა აროშიძემ თემაზე - „დემოკრატიული საქართველოს ინსტიტუციური რეფორმები“ ისაუბრა.