ბათუმის შოთა რუსთაველის სახელმწიფო უნივერსიტეტის ბიზნესის ადმინისტრირებისა და ფინანსები და საბანკო საქმის სამაგისტრო საგანმანათლებლო პროგრამებმა წარმატებით გაიარა პროგრამული აკრედიტაცია. ვულოცავთ ეკონომიკისა და ბიზნესის ფაკულტეტის სტუდენტებსა და პროფესორ-მასწავლებლებს ამ მნიშვნელოვან გამარჯვებას.
ბათუმის შოთა რუსთველის სახელმწიფო უნივერსიტეტში 9 ნოემბერს სტუდენტური თვითმმართველობის თავმჯდომარის არჩევნები ჩატარდა. კენჭისყრაში მონაწილეობის მისაღებად უნივერსიტეტის სტუდენტური თვითმმართველობის ერთი მესამედის მიერ ცენტრალურ საარჩევნო კომისიაში წარმოდგენილი იყო ორი კანდიდატი, ტურიზმის ფაკულტეტის სტუდენტი ირაკლი კოჩალიძე და ზუსტ მეცნიერებათა და განათლების ფაკულტეტის სტუდენტი შალვა ილარიშვილი. არჩევნების პირველ ტურში კანდიდატებმა 94-წევრიანი სტუდენტური თვითმართველობის უმრავლესობის მხარდაჭერა ვერ მოიპოვეს და კენჭისყრის მეორე ტური 16 ნოემბერს გაიმართა. საარჩევნო კომისიის პირველადი ინფორმაციით, სტუდენტური თვითმმართველობის თავმჯდომარე 48 ხმით ირაკლი კოჩალიძე გახდა.
ბათუმის შოთა რუსთაველის სახელმწიფო უნივერსიტეტში სახალხო დაფინანსების პლათფორმის InvestMe დამფუძნებლებმა ზურაბ კაზალიშვილმა და შალვა ოთანაძემ, ასევე USAID - ის პროგრამის G4G წარმომადგენელმა თამარ ჯულაყიძემ სტარტაპ კონკურსთან Kick Challenge დაკავშირებით სტუდენტებთან საინფორმაციო შეხვედრა გამართეს.
ბათუმის შოთა რუსთაველის სახელმწიფო უნივერსიტეტს პოეტი დავით მაღრაძე ეწვია. საქართველოს ჰიმნის ავტორმა სტუდენტებს და პროფესორ-მასწავლებლებს ახლახან გამოცემული ლექსების კრებული „უსადაურო“ წარუდგინა და მწერლობის დანიშნულებაზე ესაუბრა. შეხვედრა კითხვა-პასუხის რეჟიმში წარიმართა და პოეტმა აქტუალურ შეკითხვებს უპასუხა. დავით მაღრაძემ საუბრისას ყურადღება გაამახვილა ასევე ქვეყანაში მიმდინარე კულტურულ, საზოგადოებრივ და პოლიტიკურ მოვლენებზე.
„სოციალური პოლიტიკა საქართველოში: არსებული პრობლემები და საჭიროებები“ - თემაზე ბათუმის შოთა რუსთაველის სახელმწიფო უნივერსიტეტში საჯარო დისკუსია გაიმართა. სხვადასხვა ფაკულტეტის სტუდენტები საქართველოში არსებული სოციალური პოლიტიკის აქტუალურ საკითხებს გაეცნენ და საკუთარი მოსაზრებები წარმოადგინეს. ღონისძიების ფარგლებში „ადამიანის უფლებების სწავლებისა და მონიტორინგის ცენტრის (EMC)" კრიტიკული პოლიტიკის მიმართულების პროექტების კოორდინატორმა თამუნა ქებურიამ მოხსენება „ბუნებრივი წიაღი და მისი მოპოვება თანამედროვე დროში – წყევლა თუ გამართლება?” წაიკითხა, ხოლო EMC-ის პროექტების სამართალწარმოების იურისტმა ლელა გვიშიანმა ნაშრომი „სოციალური დაცვის სისტემაში არსებული პრობლემური საკითხები (მიზნობრივი სოციალური დახმარების მაგალითზე)” წარმოადგინა.
