ახალი ამბები

ლატვიის სიცოცხლის შემსწავლელ მეცნიერებათა და ტექნოლოგიების უნივერსიტეტის რექტორი ირინა პილვერე, საველე კვლევებისა და ტრეინინგების დირექტორი მერაბ ქათამაძე და საერთაშორისო ურთიერთობების ცენტრის უფროსი ვოლდემარს ბარისი ბათუმის შოთა რუსთაველის სახელმწიფო უნივერსიტეტის რექტორს მერაბ ხალვაშს შეხვდნენ. ვიზიტი მიზნად ისახავდა უმაღლეს საგანმანათლებლო დაწესებულებებს შორის თანამშრომლობის გაღრმავებას და სამომავლო გეგმების შემუშავებას. მხარეთა შეთანხმებით, განხორციელდება ერთობლივი სასწავლო-სამეცნიერო პროგრამები და ჩატარდება კონფერენციები. ერაზმუს+-ის საერთაშორისო გაცვლითი პროგრამის ეგიდით დაიგეგმა პროექტის მომზადება, რომლის ფარგლებში სტუდენტებისა და პროფესორ-მასწავლებლებისათვის პარტნიორ უნივერსიტეტებში ჩატარდება ტრენინგები.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა, აჭარის განათლების კულტურის და სპორტის მინისტრმა ინგა შამილიშვილმა, სსიპ ბათუმის ბულვარის დირექტორმა ირაკლი ჯინჭარაძემ და სოციალური მომსახურების სააგენტოს უფროსმა თემურ ქარცივაძემ თანამშრომლობის მემორანდუმს მოაწერეს ხელი.

ერაზმუს+-ის გაცვლითი პროგრამის პარტნიორობის ფარგლებში ბათუმის შოთა რუსთაველის სახელმწიფო უნივერსიტეტს საფრანგეთის რუანის უნივერსიტეტის საერთაშორისო ურთიერთობების ოფისის წარმომადგენელი, საერთაშორისო პროექტების მენეჯერი აურორა პატეი და მეცნიერერბისა და ენების კომუნიკაციის პროფესორი სალიჰ აქინი ეწვივნენ. ბსუ-ს რექტორის მოადგილესთან თამარ სირაძესთან, სტრატეგიული განვითარებისა და საგარეო ურთიერთობათა დეპარტამენტის წარმომადგენლებთან და პროფესორ-მასწავლებლებთან გამართულ შეხვედრაზე განისაზღვრა სამომავლო თანამშრომლობის მიმართულებები. მხარეთა შეთანხმებით, დაიგეგმა ერაზმუს+-ის ფარგლებში ერთობლივი საზაფხულო სკოლების ჩატარება და საგანმანათლებლო პროექტების განხორციელება.

აჭარის ა.რ. მთავრობის თავმჯდომარის თორნიკე რიჟვაძისა და საქართველო-ჩინეთის მეგობრობის ასოციაციის ორგანიზებით, ბათუმის შოთა რუსთაველის სახელმწიფო უნივერსიტეტს ჩინეთის დელეგაცია ეწვია. ვიზიტის ფარგლებში ბსუ-ს რექტორმა მერაბ ხალვაშმა, საქართველო-ჩინეთის მეგობრობის ასოციაციის დირექტორმა დავით ებრალიძემ და ჩანგშას მეცნიერებისა და ტექნოლოგიების უნივერსიტეტის პროფესორმა ფუ ჰანგუანიმ თანამშრომლობის მემორანდუმს მოაწერეს ხელი. ხელშეკრულება მიზნად ისახავს სტუდენტებისა და პროფესორ-მასწავლებლებისათვის გაცვლითი პროგრამებისა და ერთობლივი სასწავლო-სამეცნიერო პროექტების განხორციელებას. დაიგეგმა ჩინეთის სახალხო რესპუბლიკის „სარტყელი და გზა“ ინიციატივის ფარგლებში, აჭარის ავტონომიური რესპუბლიკიდან, განსაკუთრებით მაღალმთიანი აჭარიდან, 100 სტუდენტის ჩანგშას მეცნიერებისა და ტექნოლოგიების უნივერსიტეტში სასწავლებლად გამგზავრება.

საქართველოს განათლების, მეცნიერების, კულტურისა და სპორტის მინისტრი მიხეილ ბატიაშვილი, აჭარის ა.რ. მთავრობის თავმჯდომარე თორნიკე რიჟვაძე, უნივერსიტეტის რექტორი მერაბ ხალვაში და აჭარის ა.რ. განათლების, კულტურისა და სპორტის მინისტრი ინგა შამილიშვილი ბათუმის შოთა რუსთაველის სახელმწიფო უნივერსიტეტის სტუდენტებსა და პროფესორ-მასწავლებლებს შეხვდნენ. მინისტრმა მიხეილ ბატიაშვილმა შეხვედრაზე უმაღლესი განათლების მიმართულებით დაგეგმილ ახალ ინიციატივებზე ისაუბრა და დადებითად შეაფასა უნივერსიტეტში განხორციელებული სასწავლო-სამეცნიერო და ინფრასტრუქტურული პროექტები.