ახალი ამბები

საქართველოს ვიცე-პრემიერი, საგარეო საქმეთა მინისტრი მიხეილ ჯანელიძე ნატოს დღეების ფარგლებში, ბათუმის შოთა რუსთაველის სახელმწიფო უნივერსიტეტში რექტორს მერაბ ხალვაშს, ადგილობრივი ხელისუფლების წარმომადგენლებს, პროფესორ-მასწავლებლებს, სტუდენტებსა და არასამთავრობო სექტორს შეხვდა. საგარეო საქმეთა მინისტრმა შეხვედრაზე საქართველოს ევროატლანტიკური ინტეგრაციის პროცესის მიმდინარეობაზე, პრიორიტეტებზე, არსებულ პროგრესზე ისაუბრა და ნატოსა და საქართველოს შორის არსებული მჭიდრო ურთიერთობები მიმოიხილა. ღონისძიებაზე მისასალმებელი სიტყვით წარსდგნენ აჭარის ა.რ. მთავრობის თავმჯდომარე ზურაბ პატარაძე, ბათუმის შოთა რუსთაველის სახელმწიფო უნივერსიტეტის რექტორი მერაბ ხალვაში და ნატოსა და ევროკავშირის შესახებ საინფორმაციო ცენტრის დირექტორი ნინო ბოლქვაძე.

ბათუმის შოთა რუსთაველის სახელმწიფო უნივერსიტეტში დედამიწის საერთაშორისო დღისადმი მიძღვნილი სამეცნიერო კონფერენცია გაიმართა თემაზე: „ნარჩენების მართვა და მისი გამოწვევები“. სესია მიზნად ისახავდა ახალგაზრდებში გარემოს დაცვის საკითხებში, ნარჩენების მართვის საკითხებში ცნობიერების ამაღლებას. კონფერენციაში მონაწილეობა მიიღეს კონკურსის წესით შერჩეულმა აჭარის სკოლების X-XII კლასის მოსწავლეებმა და სტუდენტებმა.

ბათუმის შოთა რუსთაველის სახელმწიფო უნივერსიტეტში მოსწავლეთა სამეცნიერო კონფერენცია ჩატარდა თემაზე: „ახლო აღმოსავლეთი და საქართველო“. სესიის მუშაობა წარიმართა შემდეგი სექციების მიმართულებით: ახლო აღმოსავლეთისა და საქართველოს ისტორიული ურთიერთობები და ახლო აღმოსავლეთისა და საქართველოს კულტურული, ენობრივი და ლიტერატურული ურთიერთობები.

აჭარის დასაქმების სააგენტოს „სტუდენტური დასაქმების ხელშეწყობის’’ პროგრამის პრეზენტაცია ჩატარდა ბათუმის შოთა რუსთაველის სახელმწიფო უნივერსიტეტში. საპილოტე პროგრამის ფარგლებში ახალგაზრდები ახალ პროფესიულ უნარებს სწავლასთან თავსებადი გრაფიკით დაეუფლებიან. სტუდენტებისთვის შემუშავებული მოკლევადიანი სასწავლო მოდული მოიცავს: თეორიულ და პრაქტიკულ კურსს პროფესიული მიმართულებით, უცხო ენის ცოდნის დონის ამაღლებას პროფესიისათვის საჭირო ტერმინოლოგიით და სამუშაო გამოცდილების მიღებას საწარმოო პრაქტიკით. სტუდენტები პრეზენტაციის უნარ-ჩვევების განვითარების მიზნით, დამატებით გაივლიან მოკლევადიან სპეციალიზებულ სასწავლო კურსს რეზიუმეს, სამოტივაციო წერილის შედგენისა და გასაუბრებაზე მოქცევის წესების შესახებ.

ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და ქართულ-ესპანური კვლევითი და საკონსულტაციო ცენტრის „კვლევა და ინოვაცია ბიზნეს გადაწყვეტილებებისათვის“ დირექტორმა ვალერი გულბანმა თანამშრომლობის მემორანდუმს მოაწერეს ხელი. მხარეთა შეთანხმებით, ბსუ-ში შეიქმნება განათლებისა და კულტურის ესპანური ცენტრი Iberia, სადაც ამოქმედდება ესპანური ენის შემსწავლელი და სხვა სახის სასერტიფიკაციო კურსები. მემორანდუმის ფარგლებში ასევე ჩატარდება ერთობლივი საერთაშორისო კონფერენციები, ფორუმები, ტრენინგები და გაცვლითი პროგრამებთან ერთად განხორციელდება საგანმანათლებო და კვლევით პროექტები.