ახალი ამბები

ბათუმის შოთა რუსთაველის სახელმწიფო უნივერსიტეტის სააქტო დარბაზში DAAD-ის სტიპენდიის - პროგრამა საქართველოსთვის 2019/2020 წარდგენა გაიმართა. DAAD-ის წარმომადგენელმა ბერთოლდ ლინდერმა სტუდენტებსა და პროფესორ-მასწავლებლებს პროგრამაში მონაწილეობის წესები და პირობები გააცნო. გერმანული აკადემიური გაცვლის სამსახური სტუდენტებსა და აკადემიურ პერსონალს სთავაზობს შემდეგ გერმანულენოვან და ინგლისურენოვან პროგრამებს: საზაფხულოს კურსი გერმანიის უმაღლეს სასწავლებლებში, სტიპენდია სტუდენტური ჯგუფებისათვის, სამაგისტრო სტიპენდია ყველა სპეციალობის სტუდენტისათვის, კვლევითო სტიპენდია დოქტორანტებისა და ახალგაზრდა კვალიფიცირებული მეცნიერებისათვის, კვლევითი სტაჟირება უმაღლეს სასწავლებლებსა და კვლევით ინსტიტუტში მოღვაწე მეცნიერებისათვის, მეცნიერთა ორმხრივი გაცვლა.

არასამთავრობო ორგანიზაციის „საბჭოთა წარსულის კვლევის ლაბორატორიის“ (SovLab) წარმომადგენელმა დავით ჯიშკარიანმა ბათუმის შოთა რუსთაველის სახელმწიფო უნივერსიტეტის სტუდენტებისათვის საჯარო ლექცია წაიკითხა საბჭოთა ისტორიის მნიშვნელოვანი ეტაპების და პროცესების შესახებ. მომხსენებელმა ახალგაზრდებს ღონისძიების ფარგლებში SovLab-ისა და სახალხო უნივერსიტეტთა გერმანული ასოციაციის საერთაშორისო თანამშრომლობის ინსტიტუტის (DVV International) ერთობლივი პროექტი წარუდგინა და მასში მონაწილეობა შესთავაზა. პროექტი მიზნად ისახავს „ტერორის ტოპოგრაფიის” ტურის შექმნას ბათუმსა და ქუთაისში. საგანმანათლებლო, საფეხმავლო ტურების საშუალებით მსმენელები მოისმენენ დაფარულ ისტორიებს და გააცოცხლებენ მეოცე საუკუნის ქალაქის ყოფის თავისებურებებს.

დედაენის დღისადმი მიძღვნილი კვირეული ბათუმის შოთა რუსთაველის სახელმწიფო უნივერსიტეტში რამდენიმე ღონისძიებით დასრულდა. პროფესორმა მურმან გორგოშაძემ ბსუ-ს მიზნობრივი სამეცნიერო პროექტის - „აჭარის ავტონომიურ რესპუბლიკაში საჯარო ინფორმირებისათვის სახელმწიფო ენის გამოყენების პრაქტიკის კვლევა“ შედეგები წარმოადგინა. ქართული ენის აქტუალურ საკითხებზე მრგვალი მაგიდა გაიმართა, რომელშიც ბსუ-ს პროფესორ-მასწავლებლებთან ერთად, მონაწილეობა მიიღეს რექტორმა მერაბ ხალვაშმა, საქართველოს ენის სახელმწიფო დეპარტამენტის თავმჯდომარემ გიორგი ალიბეგაშვილმა და სახელმწიფო ენის დეპარტამენტის სამსახურის უფროსმა თინათინ ბოლქვაძემ.

საქართველოს პარლამენტის გარემოს დაცვისა და ბუნებრივი რესურსების კომიტეტის თავმჯდომარე კახა კუჭავამ ბათუმის შოთა რუსთაველის სახელმწიფო უნივერსიტეტის სხვადასხვა ფაკულტეტის სტუდენტებისათვის საჯარო ლექცია წაიკითხა თემაზე: „იზრუნე გარემოზე უკეთესი მომავლისათვის“. პარლამენტარმა ახალგაზრდებს დარგის აქტუალურ საკითხებთან ერთად პარლამენტის გარემოს დაცვისა და ბუნებრივი რესურსების კომიტეტის სტრატეგიული მიზნები და მისია გააცნო. ღონისძიება მიზნად ისახავდა ახალგაზრდებში გარემოს დაცვის პოპულარიზაციასა და ცნობიერების ამაღლებას.

ბათუმის შოთა რუსთაველის სახელმწიფო უნივერსიტეტის რექტორის მოადგილე, პროფესორი ნათია წიკლაშვილი ერასმუს+-ის პროგრამის ფარგლებში ალკალას უნივერსიტეტში იმყოფებოდა. ვიზიტის ფარგლებში პროფესორი ნათია წიკლაშვილი შეხვდა უნივერსიტეტის პრორექტორს საერთაშორისო ურთიერთობის დარგში პროფესორ მიგელ ანგელ სოტელო ვაზგეს, ეკონომიკის, ბიზნესის და ტურიზმის ფაკულტეტის ადმინისტრაციას, პროფესორებს და დაიგეგმა სამომავლო თანამშრომლობა. ასევე მონაწილეობა მიიღო ეკონომიკის, ბიზნესის და ტურიზმის ფაკულტეტის სამეცნიერო სემინარის მუშაობაში, მოხსენება წაიკითხა შრომის ბაზრის პრობლემებზე და ლექციების კურსი ჩაატარა გამოყენებითი ეკონომიკის სამაგისტრო პროგრამის სტუდენტებთან.