საქართველოს პარლამენტის წევრი, საგარეო ურთიერთობათა კომიტეტის თავმჯდომარე დიმიტრი ცქიტიშვილი ბათუმის შოთა რუსთაველის სახელმწიფო უნივერსიტეტის სტუდენტებს და უნივერსიტეტის აკადემიურ პერსონალს შეხვდა. დიმიტრი ცქიტიშვილმა საჯარო ლექცია წაიკითხა თემაზე: „საქართველოს საგარეო პოლიტიკის მიმართულებები და პრიორიტეტები“. შეხვედრის დასასრულს პარლამენტარმა სტუდენტების შეკითხვებს უპასუხა.
ბათუმის შოთა რუსთაველის სახელმწიფო უნივერსიტეტის რექტორი, მერაბ ხალვაში კვლევითი ინსტიტუტების წამომადგენლები, ფაკულტეტის დეკანები და სამეცნიერო კვლევების სამსახური მსოფლიო ბანკის წარმომადგენელს პეტერ ლინდოლმს, საქართველოს ინოვაციების და ტექნოლოგიების სააგენტოს თავმჯდომარის მოადგილეს ავთანდილ კასრაძეს და ინოვაციების და კომერციალიზაციის დეპარტამენტის უფროსს სალომე ხაჩიაურს შეხვდნენ.
ბათუმის შოთა რუსთაველის სახელმწიფო უნივერსიტეტს ესტონეთის არასამთავრობო ორგანიზაციის „ქალთა საინფორმაციო რესურს ცენტრის“ (ENUT) წარმომადგენლები ეწვივნენ. ესტონელმა ექსპერტებმა უნივერსიტეტის რექტორის მოადგილესთან თამარ სირაძესთან, პროფესორ-მასწავლებლებთან და ადმინისტრაციის თანამშრომლებთან გამართულ შეხვედრაზე ქალთა ეკონომიკური, სოციალური და პოლიტიკური გაძლიერების მეთოდებზე, მიღწევებსა და გამოწვევებზე ისაუბრეს. ღონისძიება ასოციაციის „ერთმანეთისთვის“ ორგანიზებით საერთაშორისო პროექტის „აჭარის რეგიონში ქალთა და ბავშვთა უფლებების დასაცავად“ ფარგლებში გაიმართა.
ფრანგული ინსტიტუტის დირექტორი საქართველოში ჟან-ივ ლავუარი ბათუმის შოთა რუსთაველის სახელმწიფო უნივერსიტეტის რექტორს მერაბ ხალვაშს, ჰუმანიტარულ მეცნიერებათა ფაკულტეტის დეკანს მარინე გიორგაძესა და პროფესორ-მასწავლებლებს შეხვდა. ვიზიტი მიზნად ისახავდა ბსუ-ს გაწევრიანებას ფრანკოფონიის საერთაშორისო საუნივერსიტეტო სააგენტოში (AUF-Agence universitaire de la Francophonie) და საფრანგეთის უმაღლეს საგანმანათლებლო დაწესებულებებს შორის თანამშრომლობის გაღრმავებას. შეხვედრაზე დაიგეგმა რუანისა და რენის უნივერსიტეტებთან ერთად ერთობლივი პროექტებისა და პროგრამების განხორციელება.
ბათუმის პირველი სეპარაციის სტენდის გახსნაში მონაწილეობა მიიღეს ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა, პროფესორ-მასწავლებლებმა და სტუდენტებმა. ღონისძიება USAID-ისა და CENN–ის „ნარჩენების მართვის ტექნოლოგიები რეგიონებში“ პროგრამის მეორე ფაზის – WMTR II – ფარგლებში გაიმართა. პროგრამა მხარს უჭერს ქვეყნის ნარჩენების მართვის სექტორის მოდერნიზებას, მდგრად განვითარებასა და ინკლუზიურ ეკონომიკურ ზრდას. პროექტი ასევე უზრუნველყოფს ნარჩენების ისეთ მართვას, რომელიც მინიმუმამდე შეამცირებს ნარჩენების მიერ ადამიანის ჯანმრთელობასა და ბუნებრივ რესურსებზე მიყენებულ ზიანს.
