ახალი ამბები

ქობულეთში ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების კვლევითი ინსტიტუტის ახალი, თანამედროვე სტანდარტების კვლევითი ცენტრის მშენებლობა დაიწყო. აჭარის ა.რ. მთავრობის თავმჯდომარემ ზურაბ პატარაძემ, ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა, აჭარის ა.რ. განათლების, კულტურისა და სპორტის მინისტრმა ინგა შამილიშვილმა, აჭარის ა.რ. უმაღლესი საბჭოს თავმჯდომარემ დავით გაბაიძემ მშენებლობის სერტიფიკატს მოაწერეს ხელი და საძირკველს საზეიმოდ ჩაუყარეს საფუძველი. მშენებლობისთვის უნივერსიტეტის ბიუჯეტიდან ერთი მილიონ 578 ათასი ლარია გათვალისწინებული, საიდანაც აჭარის ავტონომიური რესპუბლიკის 2018 წლის ბიუჯეტიდან პროგრამული დაფინანსებით 800 ათასი ლარი ჩაირიცხება.

ძლიერმა ქარმა და წვიმამ ბათუმის შოთა რუსთაველის სახელმწიფო უნივერსიტეტის ხუთსართულიან კორპუსს სახურავი გადახადა. დაზიანებულია თუნუქის საერთო ფართის 1/4. მთელი ღამის განმავლობაში მობილიზებული იყო უნივერსიტეტის პერსონალი, რომლის ძალისხმევით მოხერხდა ბიბლიოთეკის წიგნადი ფონდის შენარჩუნება. წვიმას არ ჩამოუღწევია აუდიტორიებში და სასწავლო პროცესი დილის 9:00 საათზე ჩვეულებრივ განახლდა. მიმდინარეობს სტიქიის შედეგად მიყენებული ზარალის დათვლა და სარეაბილიტაციო სამუშაოების მოსამზადებელი ეტაპი.

საქართველოს ცენტრალური საარჩევნო კომისიისა და საარჩევნო სისტემების განვითარების, რეფორმებისა და სწავლების ცენტრის პროექტის „ინფორმირებული ახალგაზრდა ამომრჩეველი“ ფარგლებში, ბათუმის შოთა რუსთაველის სახელმწიფო უნივერსიტეტში ტრენინგი ჩატარდა. უმაღლესი საგანმანათლებლო დაწესებულების სხვადასხვა ფაკულტეტის I-II კურსის სტუდენტები არჩევნებს არსს, მის მნიშვნელობას, ამომრჩეველის როლს, საარჩევნო პროცესსა და სხვა აქტუალურ საკითხებს გაეცნენ. პროექტი მიზნად ისახავდა ახალგაზრდებში არჩევნების პოპულარიზაციას, საარჩევნო უფლებების გაცნობას, სამოქალაქო ცნობიერების ამაღლებასა და არჩევნებში ახალგაზრდა ამომრჩევლების აქტიური მონაწილეობის ხელშეწყობას.

დღეს, ბათუმის შოთა რუსთაველის სახელმწიფო უნივერსიტეტში პერსონალურ მონაცემთა დაცვის ინსპექტორის აპარატის წარმომადგენლებმა აჭარის საგანმანათლებლო დაწესებულების წარმომადგენლებთან გამართეს შეხვედრა. შეხვედრაზე სტუდენტებსა და უნივერსიტეტის წარმომადგენლებს უფლებები, მოვალეობები და ინსპექტორის უახლესი რეკომენდაცია გააცნეს რომელიც უმაღლეს საგანმანათლებლო დაწესებულებებში პერსონალურ მონაცემთა დაცვას ეხება.

ბათუმის შოთა რუსთაველის სახელმწიფო უნივერსიტეტში ჰუმანიტარულ მეცნიერებათა ფაკულტეტთან არსებული არაფორმალური განათლების ცენტრის პროექტის „უნივერსიტეტი - სკოლა“ წარდგინება გაიმართა. პროექტის ფარგლებში, აჭარის რეგიონის 110 აბიტურიენტი უფასოდ გაივლის ზოგადი უნარების მოსამზადებელ კურსს ეროვნული გამოცდებისათვის. ახალგაზრდებს მოამზადებენ ბსუ-ს ფილოსოფიის საბაკალავრო პროგრამისა და სოციოლოგიის სამაგისტრო პროგრამის ის სტუდენტები, რომლებიც ლოგიკის სასწავლო კურსის დასრულების შემდეგ, წარმატებულად გაივლიან ტრენინგს ზოგადი უნარების მომზადების მეთოდოლოგიაში ასოცირებული პროფესორის ლალი ანთიძის ხელმძღვანელობით.