ახალი ამბები

საზაფხულო სკოლა "კვლევები სოციალურ მეცნიერებებში" ტარდება ბათუმის შოთა რუსთაველის სახელმწიფო უნივერსიტეტში. ერთკვირიანი სწავლების მიზანია, ხელი შეუწყოს სოციალურ მეცნიერებებში მოღვაწე პროფესორ–მასწავლებლებსა და მკვლევარებს პროფესიული უნარების სრულყოფაში, რაც აუცილებელია კვლევითი და პედაგოგიური საქმიანობის გაუმჯობესებისთვის. სკოლა ემსახურება საქართველოში საერთაშორისო სტანდარტებთან ადაპტირებული ერთიანი სამეცნიერო სივრცის შექმნას, რომლის ცენტრიც აჭარის ავტონომიურ რესპუბლიკაში იქნება განთავსებული. საზაფხულო სკოლის მომზადებასა და განხორციელებაში ჩართული აკადემიური და სამეცნიერო თანამდებობის მქონე პირები იმუშავებენ ერთიანი გეგმის შედგენაზე.

ბათუმის შოთა რუსთაველის სახელმწიფო უნივერსიტეტს ბელარუსიის რესპუბლიკის მოგილევის რეგიონის დელეგაცია ეწვია. სტუმრები რექტორთან მერაბ ხალვაშთან, აჭარის განათლების, კულტურისა და სპორტის მინისტრთან ინგა შამილიშვილთან, რექტორის მოადგილესთან ნათია წიკლაშვილთან და მკვლევრებთან გამართულ შეხვედრაზე უნივერსიტეტის სასწავლო პროგრამებს, საერთაშორისო ურთიერთობებსა და ბსუ-ს სამეცნიერო ინსტიტუტების მიერ განხორციელებული სამეცნიერო პროექტების შედეგებს გაეცნენ. ვიზიტის ფარგლებში, ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა და ბელარუსიის სოფლის მეურნეობის სახელმწიფო აკადემიის რექტორმა პაველ სასკევიჩმა თანამშრომლობის მემორანდუმს მოაწერეს ხელი.

დღეს, ბათუმის შოთა რუსთაველის სახელმწიფო უნივერსიტეტის ორგანიზებით საერთაშორისო საზაფხულო სკოლა გაიხსნა სახელწოდებით - „ევროკავშირის სამართალი და ევროპული ინტეგრაცია“. საზაფხულო სკოლის მიზანია, აჭარის რეგიონი იქცეს ევროკავშირის სამართლის სწავლების ტრადიციულ ცენტრად, სადაც თავს მოიყრიან, როგორც ევროკავშირის სამართლის სპეციალისტები და მკვლევარები, ასევე სტუდენტები.

საქართველოს მათემატიკოსთა კავშირის VIII ყოველწლიური საერთაშორისო კონფერენცია ტარდება ბათუმის შოთა რუსთაველის სახელმწიფო უნივერსიტეტში. ხუთდღიან სამეცნიერო ფორუმში მსოფლიოს სხვადასხვა ქვეყნის 200-მდე მეცნიერი მონაწილეობს და მიზნად ისახავს მათემატიკის უახლესი სამეცნიერო მოღწევების წარდგინებას. თანამედროვე მათემატიკის აქტიურად განვითარებადი დარგების პრობლემატიკაზე 11 სექცია იმუშავებს. სამეცნიერო კონფერენცია ბათუმის შოთა რუსთაველის სახელმწიფო უნივერსიტეტისა და საქართველოს მათემატიკოსთა კავშირის ორგანიზებით იმართება.

დღეს, ბათუმის შოთა რუსთაველის სახელმწიფო უნივერსიტეტმა „ბათუმობა 2017’’-ის დღესასწაულში მიიღო მონაწილეობა. უნივერსიტეტი ბათუმელებისა და ტურისტების წინაშე ფაბ ლაბ ბსუ-ში დამზადებული ტექნოლოგიური ფაკულტეტის სტუდენტების მიერ შექმნილი ნამუშევრებით წარსდგა. დამთვალიერებელთა განსაკუთრებული მოწონება ბათუმის ღირსშესანიშნაობების მაკეტებმა დაიმსახურა.