ახალი ამბები

ბათუმის შოთა რუსთაველის სახელმწიფო უნივერსიტეტი შეუერთდა აჭარის ტელევიზიის "დილის ტალღის" აქციას „გაიღე სისხლი - გადაარჩინე სიცოცხლე“. სისხლის გადასხმის საქველმოქმედო აქციაში ბსუ-ს რექტორი მერაბ ხალვაში, სტუდენტები, პროფესორ-მასწავლებლები და ადმინისტრაციის წარმომადგენლები მონაწილეობდნენ. ღონისძიების მიზანია დახმარება გაუწიოს იმ პირებს, რომელთაც სისხლი ესაჭიროებათ, თითოეული ადამიანისგან უსასყიდლოდ გაღებული სისხლი მათ სიცოცხლეს გაუხანგრძლივებს. უნივერსიტეტისთვის საქველმოქმედო აქციები სისხლის ბანკის შესავსებად ტრადიციად იქცა და მომავალშიც გაგრძელდება. უნივერსიტეტი ლ. საყვარელიძის დაავადებათა კონტროლისა და საზოგადოებრივი ჯანმრთელობის ცენტრისგან სისხლის უსაფრთხოებისა და უანგარო დონორობის რეგულარული მხარდაჭერისათვის მადლობის სიგელითაა დაჯილდოებული.

დღეს, ბათუმის შოთა რუსთაველის სახელმწიფო უნივერსიტეტში საქართველოს ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ვიქტორ დოლიძე უნივერსიტეტის სტუდენტებს და პროფესორ-მასწავლებლებს შეხვდა.
შეხვედრას, რომელიც ევროკავშირში უვიზო მიმოსვლასთან დაკავშირებულ საკითხებს შეეხებოდა ბსუ-ს რექტორი მერაბ ხალვაში და აჭარის ა.რ განათლების, კულტურისა და სპორტის მინისტრი ინგა შამილიშვილი ესწრებოდნენ.

ევროკავშირის სადამკვირვებლო მისიის საინფორმაციო ანალიტიკური ანგარიშების განყოფილების ხელმძღვანელმა დოქტორმა კაუპო კანდიმ ბათუმის შოთა რუსთაველის სახელმწიფო უნივერსიტეტის სტუდენტებისათვის საჯარო ლექცია წაიკითხა. საუბარი ევროკავშირის სადამკვირვებლო მისიის საქმიანობას, მანდატის ფარგლებში განხორციელებულ საქმიანობას და სამომავლო გეგმებს შეეხებოდა.

პოლონეთის რესპუბლიკის ელჩი საქართველოში მარიუშ მაშკიევიჩი ბათუმის შოთა რუსთაველის სახელმწიფო უნივერსიტეტს ეწვია. დიპლომატმა უმაღლესი საგანმანათლებლო დაწესებულების რექტორთან მერაბ ხალვაშთან გამართულ შეხვედრაზე საქართველოსა და პოლონეთს შორის არსებულ ურთიერთობებზე ისაუბრა. დაიგეგმა ერთობლივი საგანმანათლებლო-სამეცნიერო პროექტებისა და გაცვლითი პროგრამების განხორციელება. მხარეთა შეთანხმებით, ბსუ-ში გაიხსნება ქართულ-პოლონური ურთიერთობების კაბინეტი და უნივერსიტეტის პოლონელი არქიტექტორის ალექსანდრე შიმკევიჩის სახელობის მემორალური დაფა გაიხსნება.

ბათუმის შოთა რუსთაველის სახელმწიფო უნივერსიტეტმა ინტელექტუალურ შეჯიბრს „Quidditch: Intellectual Competition for Schools“ უმასპინძლა. სკოლის მოსწავლეებს ბსუ-ს რექტორი მერაბ ხალვაში და აჭარის განათლების, კულტურისა და სპორტის მინისტრი ინგა შამილიშვილი მიესალმნენ და წარმატებები უსურვეს. შეჯიბრი ინგლისურ ენაზე კომპანიის „ინგლისური წიგნი საქართველოში“ ორგანიზებით მიმდინარეობს და რეგიონების მიხედვით სამი სერიისაგან შედგება. თითოეული სკოლა წარმოდგენილია ერთი ან რამდენიმე გუნდით, რომელიც დაკომპლექტებულია X-XII კლასის ხუთი მოსწავლისგან. თითოეული სერიის გამარჯვებული გუნდის ყველა წევრს კომპანია „ინგლისური წიგნი საქართველოში“ გადასცემს ელექტრონულ მკითხველებს. ასევე თამაშის პროცესში მონაწილეები დაჯილდოვდებიან წამახალისებელი პრიზებით. სუპერ პრიზი „საზაფხულო სკოლა დიდ-ბრიტანეთში“ გადაეცემა სუპერ ფინალის გამარჯვებულ გუნდს, რომელიც გაიმართება 25 მარტს თბილისში.