ახალი ამბები

დამდეგი შობა-ახალი წელი ბათუმის შოთა რუსთაველის სახელმწიფო უნივერსიტეტში ტრადიციული საახალწლო ღონისძიებით აღინიშნა. სტუდენტებსა და პროფესორ-მასწავლებლებს დღესასწაული უმაღლესი საგანმანათლებლო დაწესებულების რექტორის მოვალეობის შემსრულებელმა მერაბ ხალვაშმა მიულოცა, წარმატებები უსურვა და განვლილი წელი შეაჯამა. სტუდენტებისა და აკადემიური პერსონალის ერთობლივ საახალწლო კონცერტზე უნივერსიტეტის ანსამბლმა „ტბეთმა“ ქორეოგრაფ ზურაბ სვანაძის მიერ დადგმული ფოლკლორული ცეკვები: „აჭარული“, „ხორუმი“, „თუშური“, „აფხაზური“ და „მთიულური“ შეასრულა.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის საგანმანათლებლო პროგრამებში მნიშვნელოვანი სიახლეა, მომავალი სასწავლო წლიდან სტუდენტებს საშუალება ექნებათ აირჩიონ და შეისწავლონ აფხაზური ენა. ამჟამად მიმდინარეობს მუშაობა აფხაზური ენის სასწავლო კურსის სილაბუსებზე, რეგულარულად იმართება სამუშაო შეხვედრები, რაშიც ფაკულტეტის პროფესორ-მასწავლებლებთან ერთად აქტიურადაა ჩართული ბათუმის მკვიდრი, აფხაზი ადა ქუთელია. დაგეგმილია უმაღლეს საგანმანათლებლო დაწესებულებაში აფხაზური ენის კაბინეტის გახსნა.

ბათუმის შოთა რუსთაველის სახელმწიფო უნივერსიტეტი ორგანიზაციამ „შეზღუდული შესაძლებლობების მქონე პირთა უფლებისათვის“ წლის საუკეთესო პარტნიორად დაასახელა. შოთა რუსთაველის დარბაზში გამართულ შეხვედრაზე ორგანიზაციის ხელმძღვანელმა თამაზ მჟავანაძემ უმაღლეს საგანმანათლებლო დაწესებულების რექტორის მოვალეობის შემსრულებელს მერაბ ხალვაშს, პროფესორ-მასწავლებლებს, სტუდენტებს მადლობა გადაუხადა ნაყოფიერი თანამშრომლობისა და თანადგომისათვის.

შოთა რუსთაველის დარბაზში დიპლომირებული მედიკოსის ერთსაფეხურიან ინგლისურენოვან საგანმანათლებლო პროგრამაზე ჩარიცხულ უცხოელ სტუდენტებთან შეხვედრა გაიმართა. მომავალ მედიკოსებს სწავლის დაწყება მოულოცეს და წარმატებები უსურვეს ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელმა მერაბ ხალვაშმა, აჭარის ა.რ. ჯანმრთელობისა და სოციალური დაცვის მინისტრის მოადგილემ ლევან გორგილაძემ, საბუნებისმეტყველო მეცნიერებათა და ჯანდაცვის ფაკულტეტის დეკანმა მარინა ქორიძემ და პროგრამის ხელმძღვანელმა სოფიო ბერიძემ.

ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელმა მერაბ ხალვაშმა და საქართველოს იუსტიციის მინისტრმა თეა წულუკიანმა თანამშრომლობის მემორანდუმს მოაწერენ ხელი. ხელშეკრულების მიზანია უმაღლესი საგანმანათლებლო დაწესებულების სამართლმცოდნეობის მიმართულების საგანმანათლებლო პროგრამის სტუდენტთა პროფესიული მომზადების ხელშეწყობა, სამეცნიერო-საგანმანათლებლო მეთოდური სიახლეების დანერგვა, საჯარო ლექციების ჩატარება და სხვადასხვა სახის კვლევითი და სამეცნიერო პროექტების ერთობლივი განხორციელება. მემორანდუმის ფარგლებში იურიდიული ფაკულტეტის სტუდენტები პრაქტიკასა და სტაჟირებას გაივლიან პარტნიორი დაწესებულების შესაბამის სტრუქტურულ ერთეულებში.