ახალი ამბები

ბათუმის შოთა რუსთაველის სახელმწიფო უნივერსიტეტში საქართველოს ინოვაციებისა და ტექნოლოგიების სააგენტოსთან გაფორმებული თანამშრომლობის მემორანდუმის ფარგლებში სამრეწველო ინოვაციების ლაბორატორია გაიხსნა. ფაბლაბი ხელს შეუწყობს ინოვაციების, საინფორმაციო ტექნოლოგიების სფეროში ბიზნესისა და აკადემიური სექტორის დაახლოებას, გააღრმავებს სტუდენტების სამუშაო გამოცდილებას და აამაღლებს მათი დასაქმების შანსს. ინოვაციური ლაბორატორიის გახსნის ცერემონიას უნივერსიტეტის რექტორის მოვალეობის შემსრულებელი მერაბ ხალვაში, აჭარის ა.რ. მთავრობის თავმჯდომარე არჩილ ხაბაძე, საქართველოს ეკონომიკის მინისტრი დიმიტრი ქუმსაშვილი, აჭარის ა.რ. ეკონომიკისა და ფინანსთა მინისტრი დავით ბალაძე, აჭარის ა.რ. უმაღლესი საბჭოს თავმჯდომარე ავთანდილ ბერიძე, ქალაქ ბათუმის მერი გიორგი ერმაკოვი, პროფესორ-მასწავლებლები და სტუდენტები ესწრებოდნენ.

აჭარის ა.რ. ეკონომიკისა და ფინანსთა მინისტრი დავით ბალაძე ბათუმის შოთა რუსთველის სახელმწიფო უნივერსიტეტის რექტორის მოვალეობის შემსრულებელს მერაბ ხალვაშს, ეკონომიკისა და ბიზნესის ფაკულტეტის სტუდენტებსა და პროფესორ-მასწავლებლებს შეხვდა. უწყების პირველმა პირმა მომავალ ეკონომისტებს სამინისტროს პროექტები და სამომავლო პერსპექტივები გააცნო. ბათუმში საქართველოს ფინანსთა სამინისტროს აკადემიის ფილიალის ბაზაზე შეიქმნება გადამზადების პროგრამა, სადაც ეკონომიკის მიმართულებისა და სხვადასხვა სპეციალობის სტუდენტები საჯარო სექტორში დასაქმებისათვის საჭირო თეორიულ და პრაქტიკულ კურსს გაივლიან. შეხვედრის ფარგლებში ეკონომიკისა და ბიზნესის ფაკულტეტის დეკანმა ვლადიმერ ღლონტმა და აჭარის ა.რ. ეკონომიკისა და ფინანსთა მინისტრმა დავით ბალაძემ თანამშრომლობის მემორანდუმს მოაწერეს ხელი.

„სტუდენტური ასოციაციის“ ორგანიზებითა და სტუდენტთა სამეცნიერო ცენტრის მხარდაჭერით ბათუმის შოთა რუსთაველის სახელმწიფო უნივერსიტეტში ჰუმანიტარულ მეცნიერებათა ფაკულტეტის ისტორიის სპეციალობის სტუდენტების ფოტოგამოფენა გაიხსნა. ახალგაზრდებმა დამთვალიერებელს საველე პრაქტიკის დროს, ფიჭვნარის, გონიოსა და სხვა არქეოლოგიური საველე გათხრების წარმოებისას აღმოჩენილი მასალების ამსახველი 50-მდე ფოტო წარუდგინეს.

ფრანგული ინსტიტუტის ატაშე საუნივერსიტეტო და სამეცნიერო თანამშრომლობის საკითხში კოლა კაბრიელი საქართველოს ფრანგული ინსტიტუტის ლინგვისტური და საგანმანათლებლო პროგრამების კოორდინატორ ქეთევან ქურციკიძესთან ერთად ბათუმის შოთა რუსთველის სახელმწიფო უნივერსიტეტს ეწვია. რექტორის მოვალეობის შემსრულებელთან მერაბ ხალვაშთან, საერთაშორისო ურთიერთობათა და სტრატეგიული განვითარების სამსახურის უფროსთან ნანა ყურშუბაძესთან, ჰუმანიტარულ მეცნიერებათა ფაკულტეტის დეკანთან მარინა გიორგაძესთან და ფრანგული ფილოლოგიის მიმართულების ხელმძღვანელთან ნატალია სურგულაძესთან გამართულ შეხვედრაზე სტუმარმა სამომავლო გეგმებზე ისაუბრა. დაიგეგმა გაცვლითი პროგრამებისა და მობილობის ხელშეწყობა, ერასმუს+-ის პარტნიორ უნივერსიტეტებთან თანამშრომლობის დამყარება და საფრანგეთის უნივერსიტეტებთან მემორანდუმის გაფორმება. მხარეთა შეთანხმებით, სამაგისტრო პროგრამების ყველა მიმართულების სტუდენტებისათვის ამოქმედდება საფრანგეთის მთავრობის მიერ გამოყოფილი სტიპენდიები, შემუშავდება და განხორციელდება ერთობლივი პროექტები.

ბათუმის შოთა რუსთაველის სახელმწიფო უნივერსიტეტის სტუდენტური თეატრის დასმა მაყურებელს მორიგი სპექტაკლი შესთავაზა. უნივერსიტეტის სცენაზე ფრანგული პიესის „ოჯახური იდილიის“ პრემიერა შედგა. რეჟისორები გიორგი ფირცხალაიშვილი და როინ დვალი პიესაზე არაპროფესიონალ მსახიობებთან ერთად ორი თვის განმავლობაში მუშაობდნენ. სხვადასხვა ფაკულტეტის სტუდენტებმა: მარიამ ქიქავამ, თამუნა გორგოშაძემ, ნინო ჩხიკვაძემ, მიხეილ ჯინჭარაძემ და ირაკლი ქათამაძემ ერთმოქმედებიან პიესაში ფრანგული ოჯახის სასიყვარულო ისტორიები წარმოადგინეს. სპექტაკლი ბსუ-ს სტუდენტთა მომსახურებისა და მხარდაჭერის სამსახურის კულტურის ცენტრის ორგანიზებით გაიმართა.