ახალი ამბები

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის ბიოლოგიის დეპარტამენტის ორგანიზებით, აჭარის ა.რ განათლების, კულტურისა და სპორტის სამინისტროს დაფინანსებითა და ქალაქ ბათუმის მერიის თანადაფინანსებით საერთაშორისო საზაფხულო სკოლა „ეკოლოგიური ცნობიერება და გარემოსდაცვითი განათლება“ იმართება. საზაფხულო სკოლის ფარგლებში ლექციები და პრაქტიკული მეცადინეობები ჩატარდება ისეთ აქტუალურ თემებზე, როგორიცაა: გენმოდიფიცირებული პროდუქტების წარმოება და მოსალოდნელი რისკები, ევროკავშირის გამოცდილება ნარჩენების მართვაში, სამეცნიერო კვლევები ნარჩენების მართვის მიმართულებით, შავი ზღვის ეკოლოგიური პრობლემები და ჩამდინარე წყლების მართვა

ტემპუსის პროექტის „უმაღლესი საინჟინრო განათლების მოდერნიზაცია ტექნოლოგიების გამოწვევების შესაბამისად უკრაინაში, საქართველოსა და უზბეკეთში (ENGITEC)“ დასკვნით კონფერენციას და შემაჯამებელ საორგანიზაციო შეხვედრას მასპინძლობს ბათუმის შოთა რუსთაველის სახელმწიფო უნივერსიტეტი. სამი დღის განმავლობაში კონფერენციის მონაწილეები პროექტის ფარგლებში წარმოებულ კვლევასა და შემდგომი თანამშრომლობის პერსპექტივებს შეაჯამებენ.

ბათუმის შოთა რუსთაველის სახელმწიფო უნივერსიტეტში V საერთაშორისო სკოლა-სემინარი „ბიომედიცინის აქტუალური საკითხები’’გაიხსნა. 10 ქართველი და უცხოელი პროფესორი ოთხი დღის განმავლობაში ჩაატარებს ლექციებს, მასტერ-კლასებსა და ლაბორატორიულ მეცადინეობებს დარგის აქტუალურ საკითხებზე. საქართველოს უმაღლესი სასწავლებლების ბიოლოგიური და სამედიცინო პროფილის 60-მდე სტუდენტი, დოქტორანტი და რეზიდენტი გაეცნობა ცხოვრების ჯანსაღ წესს, ბიოსუფრთხოებას, ბიოეთიკური პრინციპებისა და ნორმების დაცვის მნიშვნელობას ბიოსამედიცინო საქმიანობაში, ადამიანთა პოპულაციების ბიოლოგიური ბანკების შექმნის მნიშვნელობას ფუნდამენტური კვლევებისა და პერსონალიზებული მედიცინის განვითარებისათვის და ეთნობოტანიკური კვლევების მნიშვნელობას ბიომედიცინაში.

ორგანიზაციის „შეზღუდული შესაძლებლობების მქონე პირთა უფლებებისათვის” ორი წლის იუბილესადმი მიძღვნილი ღონისძიება გაიმართა ბათუმის შოთა რუსთაველის სახელმწიფო უნივერსიტეტის სააქტო დარბაზში. ორგანიზაციის წევრებს მნიშვნელოვანი თარიღი ბსუ-ს რექტორის მოადგილემ ნათია წიკლაშვილმა, ქალაქ ბათუმის მერმა გიორგი ერმაკოვმა, სტუდენტებმა, პროფესორ-მასწავლებლებმა, საზოგადოების წარმომადგენლებმა მიულოცეს და მათი მიღწევები შეაფასეს. ღონისძიების დასასრულს სხვადასხვა შემოქმედებითი ჯგუფის მონაწილეობით კონცერტი გაიმართა. „შეზღუდული შესაძლებლობების მქონე პირთა უფლებებისათვის” იუბილე უნივერსიტეტის სტუდენტური თვითმმართველობის მხარდაჭერით ჩატარდა.

საქართველოს განათლებისა და მეცნიერების მინისტრი თამარ სანიკიძე და აჭარის ა.რ. განათლების, კულტურისა და სპორტის მინისტრი გიორგი თავამაიშვილი ბათუმის შოთა რუსთაველის სახელმწიფო უნივერსიტეტს ეწვივნენ. თამარ სანიკიძე უნივერსიტეტის რექტორის მოვალეობის შემსრულებელ, ასოცირებულ პროფესორ მერაბ ხალვაშთან და ადმინისტრაციის ხელმძღვანელ ჯემალ ანანიძესთან ერთად, უმაღლესი სასწავლებლის აგრარული და მემბრანული ტექნოლოგიების ინსტიტუტში მიმდინარე სარემონტო სამუშაოებს გაეცნო და მკვლევრებს შეხვდა. ვიზიტის ფარგლებში მინისტრს მეცნიერებმა განხორციელებული პროექტები და სამომავლო გეგმები წარუდგინეს. ინსტიტუტში სარემონტო სამუშაოები საქართველოს განათლებისა და მეცნიერების სამინისტროს დაფინანსებით ტარდება.