ახალი ამბები

სამხრეთ-დასავლეთ საქართველოს ოსმალთაგან განთავისუფლების ბრძოლის წინამძღოლის სელიმ ხიმშიაშვილის ტრაგიკული აღსასრულიდან 200 წლისადმი მიძღვნილი საერთაშორისო სამეცნიერო კონფერენცია გაიხსნა ბათუმის შოთა რუსთაველის სახელმწიფო უნივერსიტეტში. სესიის მონაწილეებს უნივერსიტეტის რექტორის მოვალეობის შემსრულებელი, ასოცირებული პროფესორი მერაბ ხალვაში, საქართველოს მეცნიერებათა ეროვნული აკადემიის ვიცე-პრეზიდენტი, აკადემიკოსი როინ მეტრეველი, აკადემიკოსი გურამ ლორთქიფანიძე, ნიკო ბერძენიშვილის ინსტიტუტის დირექტორი როინ მალაყმაძე, სტამბოლის ქართველთა კულტურის ცენტრის თავმჯდომარე სეზენ-გონენჩ ოქჩანი, სტამბოლის ქართველთა სათვისტომოს წარმომადგენელი მუსტაფა იაქუთი (გურამ ხიმშიაშვილი) და ქუთაისის აკაკი წერეთლის სახელმწიფო უნივერსიტეტის პროფესორი ავთანდილ ნიკოლაიშვილი მიესალმნენ. კონფერენციაზე ქართველმა და თურქმა მკვლევრებმა მოხსენებები წარმოადგინეს სელიმ ხიმშიაშვილი ცხოვრებასა და მოღვაწეობაზე.

პენსილვანიის უნივერსიტეტის პროფესორმა დონოვან რიპკემამ ბათუმის შოთა რუსთაველის სახელმწიფო უნივერსიტეტში ამერიკის საელჩოს მოწვევით საჯარო ლექცია წაიკითხა თემაზე: „კულტურული მემკვიდრეობა, როგორც ეკონომიკური რესურსი“. დოქტორი დონოვან რიპკემა არის კულტურული მემკვიდრეობის დაცვის სახელმძღვანელოს - „მემკვიდრეობის დაცვის ეკონომიკა“ - ავტორი, აღიარებული სპეციალისტი ისტორიული ნაგებობების დაცვის ეკონომიკის სფეროში და ორგანიზაციის - „მემკვიდრეობის საერთაშორისო სტრატეგიები“ - დამფუძნებელი. მეცნიერმა ლექციაზე კულტურული მემკვიდრეობის დაცვა განიხილა იმ თვალსაზრისით, რომ ისტორიული ქალაქები ან უბნები არ უნდა შენარჩუნდეს მხოლოდ მუზეუმების სტატუსით. მისი აზრით, ისტორიული ნაგებობების დაცვა–შენარჩუნება ამავდროულად წარმოადგენს ეკონომიკური განვითარების მძლავრ ფაქტორს.

ტემპუსის პროექტის „სამაგისტრო პროგრამა განათლების მენეჯმენტში: ლიდერების აღზრდა საგანმანათლებლო რეფორმებისათვის - MAHATMA“ ფარგლებში ბათუმის შოთა რუსთაველის სახელმწიფო უნივერსიტეტს საერთაშორისო ექსპერტთა ჯგუფი ეწვია. ორდღიანი ვიზიტი მიზნად ისახავდა სამაგისტრო პროგრამის "განათლების მენეჯმენტი" თვითშეფასების მონიტორინგსა და  ექსპერტიზას. ინგლისელი და სომეხი ექსპერტები ქართველ კოლეგებთან ერთად შეხვდნენ უნივერსიტეტის რექტორის მოვალეობის შემსრულებელს, ასოცირებულ პროფესორ მერაბ ხალვაშს, აკადემიურ პერსონალს, სტუდენტებს, ხარისხის უზრუნველყოფის სამსახურის წარმომადგენლებს, ადმინისტრაციის თანამშრომლებსა და პოტენციურ დამსაქმებლებს. ექსპერტთა ჯგუფმა  სამაგისტრო პროგრამა დადებთად შეაფასა და რეკომენდაციები შეიმუშავა.

დასრულდა საპლაჟო ფეხბურთის ჩემპიონატი უმაღლეს საგანმანთლებლო დაწესებულებებს შორის. ფინალურ შეხვედრაში ბათუმის შოთა რუსთველის სახელმწიფო უნივერსიტეტის გუნდს ბათუმის საზღვაო აკადემიის გუნდი დაუპირისპირდა. ჩემიონატი უნივერსიტეტელების გამარჯვებით, ანგარიშით 4:3 დასრულდა. ტურნირის საუკეთესო ფეხბურთელი ბსუ-ს სოციალურ და პოლიტიკურ მეცნიერებათა ფაკულტეტის საერთაშორისო ურთიერთობების სპეციალობის I კურსის სტუდენტი გიორგი მამულაძე გახდა. პირველობა საპლაჟო ფეხბურთის ფედერაციის ორგანიზებით გაიმართა და მასში რეგიონში არსებული ყველა უმაღლესი სასწავლებელი მონაწილეობდა. გამარჯვებულ გუნდს საპლაჟო ფეხბურთის სტუდენტური ლიგის აჭარის თასი, სერტიფიკატები და სამახსოვრო საჩუქრები გადაეცა.

სტუდენტთა სამეცნიერო კონფერენციისა და რეფერატულ ნაშრომთა კონკურსის მონაწილეთა დაჯილდოება გაიმართა ბათუმის შოთა რუსთაველის სახელმწიფო უნივერსიტეტში. ტრადიციული სამეცნიერო სესია 15 სექციაში ჩატარდა და მასში სხვადასხვა ფაკულტეტის II, III, IV კურსის 150-მდე სტუდენტმა წარმოადგინა მოხსენება. რეფერატულ ნაშრომთა კონკურსში საკუთარი შესაძლებლობები 120-მდე პირველკურსელმა წარმოადგინა. სამეცნიერო სესიისა და რეფერატულ ნაშრომთა კონკურსის მონაწილეებს წარმატებები უსურვეს და სერტიფიკატები გადასცეს უნივერსიტეტის რექტორის მოვალეობის შემსრულებელმა, ასოცირებულმა პროფესორმა მერაბ ხალვაშმა, რექტორის მოადგილემ, პროფესორმა ნათია წიკლაშვილმა, ფაკულტეტების დეკანებმა, სტუდენტთა მხარდაჭერისა და მომსახურების სამსახურისა და პრესსამსახურის უფროსებმა. სამეცნიერო კონფერენცია და რეფერატულ ნაშრმოთა კონკურსი სტუდენტთა სამეცნიერო ცენტრის ორგანიზებით ჩატარდა.