ახალი ამბები

თანამშრომლობის მემორანდუმი გაფორმდა ბათუმის შოთა რუსთაველის სახელმწიფო უნივერსიტეტსა და თურქ ბიზნესმენთა ასოციაციას შორის. დოკუმენტი მიზნად ისახავს გაცვლითი პროგრამების ამოქმედებას, სასწავლო-სამეცნიერო პროექტების განხორციელებას და უმაღლესი საგანმანათლებლო დაწესებულების კურსდამთავრებულთა დასაქმებას. მხარეთა შეთანხმებით, ჩატარდება სამეცნიერო კონფერენციები, საზაფხულო სკოლები და სემინარები. ასოციაციის ხელშეწყობით, ჰუმანიტარულ მეცნიერებათა ფაკულტეტის აღმოსავლეთმცოდნეობის დეპარტამენტი და თურქოლოგიის მიმართულების აუდიტორიები აღიჭურვება კომპიუტერული აპარატურით, მეთოდოლოგიური ლიტერატურით, სახელმძღვანელოებით და წარჩინებული სტუდენტებისათვის დაწესდება სტიპენდიები.

ბათუმის შოთა რუსთაველის სახელმწიფო უნივერსიტეტი მწუხარებას გამოთქვამს 13 ნოემბერს, პარიზში მომხდარი ტრაგედიის გამო და თანაგრძნობას უცხადებს საფრანგეთსა და დაღუპულთა ოჯახებს. უნივერსიტეტის რექტორის მოვალეობის შემსრულებელმა მერაბ ხალვაშმა, პროფესორ-მასწავლებლებმა, მკვლევრებმა, ადმინისტრაციის თანამშრომლებმა და სტუდენტებმა უმაღლეს საგანმანათლებლო დაწესებულებაში გამართულ სოლიდარობის აქციაზე დაგმეს საფრანგეთში განხორციელებული ტერორისტული აქტები და პატივი მიაგეს დაღუპულთა ხსოვნას.

ბათუმის შოთა რუსთაველის სახელმწიფო უნივერსიტეტს თურქეთის გენერალური კონსული ბათუმში იასინ თემიზქანი და ევრაზიის უნივერსიტეტის რექტორი, პროფესორი აშქინ ასანი ეწვია დელეგაციასთან ერთად. უნივერსიტეტის რექტორის მოვალეობის შემსრულებელთან მერაბ ხალვაშთან გამართულ შეხვედრაზე მხარეებმა ორი ქვეყნის კულტურულ-საგანმანათლებლო ურთიერთობებსა და სამომავლო გეგმებზე ისაუბრეს. ვიზიტისას ასევე დაიგეგმა თანამშრომლობის მემორანდუმით გათვალისწინებული ერთობლივი სასწავლო-სამეცნიერო პროექტებისა და გაცვლითი პროგრამების განხორციელების პირობები.

მეცნიერებისა და ინოვაციების საერთაშორისო კვირეულის ეგიდით, ბათუმის შოთა რუსთაველის სახელმწიფო უნივერსიტეტში საჯარო ლექციები ტარდება. სტუდენტებისა და პროფესორ-მასწავლებლებისათვის ფიტოპათოლოგიისა და ბიომრავალფეროვნების ინსტიტუტის გამძლეობის გენეტიკის განყოფილების უფროსმა ზოია სიხარულიძემ ლექცია წაიკითხა თემაზე: „ფიტოპათოლოგიური კვლევები - გუშინ, დღეს, ხვალ“, აგრარული და მემბრანული ტექნოლოგიების ინსტიტუტის დირექტორმა რაულ გოცირიძემ - „ფიტოპათოლოგიური კვლევები - გუშინ, დღეს, ხვალ“, ხოლო ნიკო ბერძენიშვილის ინსტიტუტის დირექტორმა როინ მალაყმაძემ და ინსიტუტის ფოლკლორისა და დიალექტოლოგიის განყოფილების უფროსმა შუშანა ფუტკარაძემ - „სტამბოლის ქართული კულტურის სავანე“. საჯარო ლექციები პროფესორ ალეკო კალანდიას მოხსენებით „საკვები-სარგებელი და საფრთხე“ დასრულდება.

ბათუმის შოთა რუსთაველის სახელმწიფო უნივერსიტეტი „სტუდენტ–ახალგაზრდული დღეების“ გამარჯვებულია. ახალგაზრდებმა საკუთარი შესაძლებლობები შემოქმედებით, კულტურულ და სპორტულ შეჯიბრებებში წარმოაჩინეს. უმაღლესი საგანმანათლებლო დაწესებულების გუნდებმა პირველი ადგილი დაიკავეს მხიარულ სტარტებსა და მინიფეხბურთში. კომპეტენტურმა ჟიურიმ ბათუმის საზაფხულო თეატრში გამართულ დასკვნით კონცერტზე გრან-პრის მფლობელად ბსუ დაასახელა. ახალგაზრდული ფესტივალი ბათუმის მერიის სპორტისა და ახალგაზრდობის განყოფილების ორგანიზებით ჩატარდა და მასში ქვეყნის ათი უნივერსიტეტის სტუდენტები მონაწილეობდნენ. გამარჯვებული გუნდის წევრები შემოქმედებითი ტურით ტაო-კლარჯეთში გაემგზავრებიან. დასკვნითი ღინისძიება ჯგუფ „ფრანის“ კონცერტით დასრულდა.