ახალი ამბები

ბათუმის შოთა რუსთაველის სახელმწიფო უნივერსიტეტის 50 მოხალისე სტუდენტი თბილისში სტიქიით დაზარალებული მოსახლეობის დასახმარებლად და საყოფაცხოვრებო ნივთების გადასაცემად, აჭარის სპორტისა და ახალგაზრდობის საქმეთა დეპარტამენტის უფროსის მოვალეობის შემსრულებელ დავით მიქელაძესთან ერთად გაემგზავრა. ხუთი დღის განმავლობაში ბსუ-ს სტუდენტური თვითმმართველობის ორგანიზებით სტუდენტებმა პირველადი მოხმარების ნივთები, ტანსაცმელი, მედიკამენტები და პროდუქტები შეაგროვეს.

ბათუმის შოთა რუსთაველის სახელმწიფო უნივერსიტეტსა და საერთაშორისო სტუდენტურ ორგანიზაცია აისეკოსთან თანამშრომლობის ფარგლებში ამერიკის საერთაშორისო განვითარების სააგენტოს პროექტის „მმართველობა განვითარებისთვის“ (G4G) წარმომადგენლები სხვადასხვა სპეციალობის სტუდენტებს შეხვდნენ. G4G-ის ხელმძღვანელმა მაილო სტევანოვიჩმა ახალგაზრდებს პროექტის მიზნები, სტაჟირების პროგრამაში მონაწილეობის პირობები, პერსონალური ბრენდინგი და საკუთარი თავის კარგად წარმოჩენის შესაძლებლობები გააცნო. სასტუმრო ჰილტონის ხელმძღვანელმა სტიუარტ ნელსონმა შეხვედრაზე ბიზნესის მართვასა და წარმატებულ მენეჯმენტზე ისაუბრა, ხოლო პროექტის კომუნიკაციების მენეჯერმა მაიკ მართლმა სტუდენტებს რეზიუმეს, ინტერვიუზე სწორად წარდგენის ტექნიკასა და კარიერის დაგეგმვის წესებზე. პროექტი 4 წლის განმავლობაში გაგრძელდება და ხელს შეუწყობს სტუდენტების განვითარებასა და მათი შესაძლებლობების რეალიზებას.

ბათუმის შოთა რუსთაველის სახელმწიფო უნივერსიტეტში ნატოსა და ევროკავშირის შესახებ საინფორმაციო ცენტრის აჭარის განახლებული ბიურო გაიხსნა. ცერემონიას საქართველოს თავდაცვის მინისტრი თინა ხიდაშელი, საქართველოს საგარეო საქმეთა მინისტრი თამარ ბერუჩაშვილი, ევროპულ და ევროატლანტიკურ სტრუქტურების ინტეგრაციის საკითხებში სახელმწიფო მინისტრი დავით ბაქრაძე, ამერიკის ელჩი საქართველოში რიჩარდ ნორლანდი, უნივერსიტეტის რექტორის მოვალეობის შემსრულებელი, ასოცირებული პროფესორი მერაბ ხალვაში, ნატოსა და ევროკავშირის შესახებ საინფორმაციო ცენტრის დირექტორი ელენე გოცაძე და დიპლომატიური კორპუსის წარმომადგენლები ესწრებოდნენ. ბიუროს მიზანია აჭარის რეგიონში მცხოვრები მოსახლეობის ნატოსა და ევროკავშირის შესახებ ინფორმირება და მათი ევროპული და ევროატლანტიკური სტრუქტურების ინტეგრაციის პროცესში აქტიურად ჩართვა.

სამხრეთ-დასავლეთ საქართველოს ოსმალთაგან განთავისუფლების ბრძოლის წინამძღოლის სელიმ ხიმშიაშვილის ტრაგიკული აღსასრულიდან 200 წლისადმი მიძღვნილი საერთაშორისო სამეცნიერო კონფერენცია გაიხსნა ბათუმის შოთა რუსთაველის სახელმწიფო უნივერსიტეტში. სესიის მონაწილეებს უნივერსიტეტის რექტორის მოვალეობის შემსრულებელი, ასოცირებული პროფესორი მერაბ ხალვაში, საქართველოს მეცნიერებათა ეროვნული აკადემიის ვიცე-პრეზიდენტი, აკადემიკოსი როინ მეტრეველი, აკადემიკოსი გურამ ლორთქიფანიძე, ნიკო ბერძენიშვილის ინსტიტუტის დირექტორი როინ მალაყმაძე, სტამბოლის ქართველთა კულტურის ცენტრის თავმჯდომარე სეზენ-გონენჩ ოქჩანი, სტამბოლის ქართველთა სათვისტომოს წარმომადგენელი მუსტაფა იაქუთი (გურამ ხიმშიაშვილი) და ქუთაისის აკაკი წერეთლის სახელმწიფო უნივერსიტეტის პროფესორი ავთანდილ ნიკოლაიშვილი მიესალმნენ. კონფერენციაზე ქართველმა და თურქმა მკვლევრებმა მოხსენებები წარმოადგინეს სელიმ ხიმშიაშვილი ცხოვრებასა და მოღვაწეობაზე.

პენსილვანიის უნივერსიტეტის პროფესორმა დონოვან რიპკემამ ბათუმის შოთა რუსთაველის სახელმწიფო უნივერსიტეტში ამერიკის საელჩოს მოწვევით საჯარო ლექცია წაიკითხა თემაზე: „კულტურული მემკვიდრეობა, როგორც ეკონომიკური რესურსი“. დოქტორი დონოვან რიპკემა არის კულტურული მემკვიდრეობის დაცვის სახელმძღვანელოს - „მემკვიდრეობის დაცვის ეკონომიკა“ - ავტორი, აღიარებული სპეციალისტი ისტორიული ნაგებობების დაცვის ეკონომიკის სფეროში და ორგანიზაციის - „მემკვიდრეობის საერთაშორისო სტრატეგიები“ - დამფუძნებელი. მეცნიერმა ლექციაზე კულტურული მემკვიდრეობის დაცვა განიხილა იმ თვალსაზრისით, რომ ისტორიული ქალაქები ან უბნები არ უნდა შენარჩუნდეს მხოლოდ მუზეუმების სტატუსით. მისი აზრით, ისტორიული ნაგებობების დაცვა–შენარჩუნება ამავდროულად წარმოადგენს ეკონომიკური განვითარების მძლავრ ფაქტორს.