შოთა რუსთაველის დარბაზში ბათუმის შოთა რუსთაველის სახელმწიფო უნივერსიტეტის იურიდიული ფაკულტეტის სამართლის საბაკალავრო საგანმანათლებლო პროგრამის პრეზენტაცია გაიმართა. ფაკულტეტის დეკანმა, პროფესორმა ადამ მახარაძემ, პროგრამის ხელმძღვანელმა, ასოცირებულმა პროფესორმა ლევან ჯაყელმა და პროფესორ-მასწავლებლებმა პოტენციურ დამსაქმებელებს პროგრამის ახალი მოთხოვნები, მისი დარგობრივი მახასიათებლები, ეროვნული საკვალიფიკაციო ჩარჩო, სტრუქტურა და სასწავლო კურსების დინამიკა გააცნეს.
ბათუმის შოთა რუსთაველის სახელმწიფო უნივერსიტეტში "სტუდენტურ-ახალგაზრდული დღეები-2015"-ის მონაწილე სტუდენტებთან შეხვედრა გაიმართა. უმაღლესი საგანმანათლებლო დაწესებულების რექტორის მოვალეობის შემსრულებლმა მერაბ ხალვაშმა ახალგაზრდებს მადლობა გადაუხადა საუნივერსიტეტო ცხოვრებაში აქტიური მონაწილეობისათვის და სიგელები გადასცა. ბსუ-მ რამდენიმე დღის წინ ახალგაზრდული ფესტივალის გრან-პრი მოიპოვა. სხვადასხვა ფაკულტეტის სტუდენტებმა საკუთარი შესაძლებლობები შემოქმედებით, კულტურულ და სპორტულ შეჯიბრებებში წარმოაჩინეს. უმაღლესი საგანმანათლებლო დაწესებულების გუნდებმა პირველი ადგილი დაიკავეს მხიარულ სტარტებსა და მინიფეხბურთში.
ღია მონაცემების პორტალის - data.gov.ge წარდგინება გაიმართა ბათუმის შოთა რუსთაველის სახელმწიფო უნივერსიტეტში. ინფორმაციის თავისუფლების განვითარების ინსტიტუტის (IDFI) თავმჯდომარემ ლევან ავალიშვილმა პროფესორ-მასწავლებლებსა და სტუდენტებს საქართველოს საჯარო დაწესებულებებში დაცული საჯარო მონაცემების ბაზების მონაცემები გააცნო და ისაუბრა მათი ხელმისაწვდომობის საკითხებსა და ბიზნეს-სტარტაპების გამოყენების გზებზე. პორტალი მოქალაქეებს, ბიზნესმენებს და ყველა დაინტერესებულ პირს საშუალებას აძლევს გაეცნონ არა მხოლოდ სახელმწიფო მონაცემებს, არამედ მათი გამოყენებით შექმნან ინოვაციური აპლიკაციები, ბიზნეს-პროექტები და ელექტრონული სერვისები. ღონისძიება IDFI-ის პროექტის „ღია მონაცემები: ცვლილებებისა და ინოვაციების წყარო“ ფარგლებში ჩატარდა.
საქართველოს საუნივერსიტეტო სპორტის ფედერაციის „საუნივერსიტეტო თასი - 2015“-ის ტურნირის მეორე შეხვედრაზე ბათუმის შოთა რუსთაველის სახელმწიფო უნივერსიტეტის ფუტსალის ნაკრებმა წარმატებულად იასპარეზა. უმაღლესი საგანმანათლებლო დაწესებულების გუნდი ამჯერად, თბილისის სასწავლო უნივერსიტეტის ნაკრებს დაუპირისპირდა და მატჩი ბსუ-ს გამარჯვებით, ანგარიშით 16:5 დასრულდა. უნივერსიტეტის სპორტსმენები „საუნივერსიტეტო თასი - 2015“-ის მოსაპოვებლად მორიგ შეხვედრას 27 ნოემბერს გრიგოლ რობაქიძის სახელობის უნივერსიტეტთან გამართავს.
ბათუმში აზერბაიჯანის რესპუბლიკის გენერალური კონსული რაშად ფაილ ოღლუ ისმაილოვი ბათუმის შოთა რუსთაველის სახელმწიფო უნივერსიტეტს ეწვია. დიპლომატი რექტორის მოვალეობის შემსრულებელ მერაბ ხალვაშს შეხვდა და საუნივერსიტეტო ცხოვრებას, უნივერსირტეტის ისტორიას, სასწავლო პროგრამებსა და საუნივერსიტეტოს ცხოვრებას გაეცნო. დიპლომატმა გაცნობითი ხასიათის შეხვედრაზე ორი ქვეყნის თანამშრომლობის მნიშვნელობასა და საგანმანათლებლო-სამეცნიერო ურთიერთობებზე ისაუბრა. ვიზიტის ფარგლებში დაიგეგმა თანამშრომლობის მემორანდუმის გაფორმება ბსუ-სა და აზერბაიჯანის უმაღლეს საგანმანათლებლო დაწესებულებებს შორის.
