ახალი ამბები

ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტში უნივერსიტეტის 80 წლის იუბილესადმი მიძღვნილი სამეცნიერო კონფერენცია ჩატარდა თემაზე: „გენეტიკური რესურსების მრავალფეროვნება, დაცვა, შენარჩუნება“. სესიაზე სამეცნიერო-კვლევითი დაწესებულების მკვლევრებმა მოხსენებები წაიკითხეს დარგის აქტუალურ საკითხებსა და ბოლო პერიოდში წარმოებული კვლევის შედეგებზე. იმსჯელეს ისეთ თემებზე, როგორიცაა: „ბიომრავალფეროვნების ცალკეული კომპონენტის კვლევა, დაცვა, შენარჩუნება, გონივრული გამოყენება“, „ხეხილოვანი კულტურების მრავალფეროვნება, კონსერვაცია“, „შავი ზღვის ძუძუმწოვრები და კოლხეთის თევზების კონსერვაციის ეკოსისტემური მიდგომა“ და „კოლხეთი - ბიომრავალფეროვნების ცხელი წერტილი - წარსული, აწმყო, მომავალი“. სამეცნიერო კონფერენცია საველე ტურით დასრულდა. სესიის მონაწილეებმა დაათვალიერეს ინსტიტუტის სათბურები, სადაც მცენარეთა პათოგენური მიკროორგანიზმების შესწავლა ხდება და ასევე ყოფილი ქობულეთის სამკურნალო მცენარეთა ზონალური სადგურის საკოლექციო ნაკვეთი, რომელიც გადმოეცა ინსტიტუტს კვლევებისათვის.

ბათუმის შოთა რუსთაველის სახელმწიფო უნივერსიტეტმა ართვინის ჭოროხის უნივერსიტეტის დელეგაციას უმასპინძლა. ართვინის ჭოროხის უნივერსიტეტის რექტორი მეჰმედ დუმანი, რექტორის მოადგილე აიდინ თოფექჩიოგლუ დეკანებთან ერთად ბსუ-ს რექტორის მოვალეობის შემსრულებელს, ასოცირებულ პროფესორ მერაბ ხალვაშს, რექტორის მოადგილეს ნათია წიკლაშვილს, დეკანებს და პროფესორ-მასწავლებლებს შეხვდნენ. მხარეებმა უმაღლეს საგანმანათლებლო დაწესებულებებს შორის გაფორმებული მემორანდუმის ფარგლებში განხორცილებული პროგრამები განიხილეს და თანამშრომლობის გაღრმავების მიზნით ახალი მიმართულებები და პრიორიტეტები განსაზღვრეს. საბუნებისმეტყველო და აგრარული მიმართულებით რამდენიმე პროექტი უკვე განხორციელდა და ამოქმედდა ერთობლივი სადოქტორო პროგრამა, ასევე მევლანას გაცვლითი პროგრამის ფარგლებში ბსუ-ს პროფესორებმა ართვინის ჭოროხის უნივერსიტეტში ლექციები და ვორქშოფები ჩაატარეს. შეხვედრაზე დაიგეგმა ეკონომიკის, ჰუმანიტარული და ჯანდაცვის მიმართულებით სასწავლო-სამეცნიერო პროექტების შემუშავება და სტუდენტების გაცვლა.

ბათუმის შოთა რუსთაველის სახელმწიფო უნივერსიტეტში ორგანიზაცია ,,იკომოს საქართველოს“ გენერალური მდივნის, არქიტექტორ ნატო ცინცაბაძის საჯარო ლექციები ჩატარდა კულტურული მემკვიდრეობის დაცვისა და კონსერვაციის საკითხებზე. პირველი ლექცია თემაზე: „მსოფლიო კულტურული და ბუნებრივი მემკვიდრეობის კონვენცია და საქართველო“ მსოფლიო კულტურული მემკვიდრეობის კონვენციის დაფუძნების მოკლე ისტორიას, მის მიზნებსა და ამოცანებს დაეთმო.

უნივერსიტეტში განათლების ფაკულტეტის ორგანიზებით პროექტის "მულტიკულტურული განათლების ასახვა მასწავლებელთა განათლების პროგრამებში“ ეგიდით ინტერკულტურული ღონისძიება „ერთიანობა მრავალფეროვნებაშია“ ჩატარდა. საღამოზე ბსუ-ს ქართველმა, თურქმა, სომეხმა, რუსმა და აზერბაიჯანელმა სტუდენტებმა საკუთარი ქვეყნების კულტურა და მულტიკულტურულ მახასიათებლები წარმოადგინეს. პროექტს სამოქალაქო ინტეგრაციისა და ეროვნებათშორისი ურთიერთობების ცენტრი ფონდ ,,ღია საზოგადოება-საქართველოს“ ფინანსური მხარდაჭერით ახორციელებს და მიზნად ისახავს უმაღლეს საგანმანათლებლო დაწესებულებებში ტოლერანტობისა და ურთიერთპატივისცემის გარემოს შექმნას.

ბათუმის შოთა რუსთაველის სახელმწიფო უნივერსიტეტის ფილოსოფიის სპეციალობის 1-ლი კურსის სტუდენტებმა სასწავლო კურსის ,,დემოკრატია და მოქალაქეობა“ ფარგლებში პროექტების პრეზენტაცია გამართეს. ჰუმანიტარულ ფაკულტეტთან არსებული ,,არაფორმალური განათლების ცენტრის“ ღია ბიბილიოთეკის მხარდაჭერის მიზნით უნივერსიტეტის ფოიეში კუთხე ახალი წიგნებითა და პუფებით მოაწყვეს და ჩატარებული ღონისძიებების შედეგები წარმოადგინეს. სტუდენტებმა ბუნების დასაცავად თამარის დასახლებაში ხეები დარგეს, ზებრა ზოლზე ქვეითების გზის დათმობის მოთხოვნით გამოკითხვები ჩაატარეს და აქციები მოაწყვეს. ახალგაზრდები ჟესტების ენას დაეუფლნენ და შემდეგ დაინტერესებულ პირებს შეასწავლეს.