ახალი ამბები

ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებელმა, ასოცირებულმა პროფესორმა მერაბ ხალვაშმა და აჭარის ა.რ. სოფლის მეურნეობის მინისტრმა ზაურ ფუტკარაძემ ქობულეთის მუნიციპალიტეტის აგროსერვის ცენტრში თანამშრომლობის მემორანდუმს მოაწერეს ხელი. დოკუმენტი ითვალისწინებს ერთობლივი სასწავლო-საგანმანათლებლო პროექტების განხორციელებას. მხარეთა შეთანხმებით, ტექნოლოგიური ფაკულტეტის სტუდენტები სტაჟირებასთან ერთად სასწავლო პრაქტიკას გაივლიან სამინისტროში, აგროსერვის ცენტრსა და ლაბორატორიულ კვლევით ცენტრში. ახალგაზრდები შეისწავლიან სასოფლო-სამეურნეო კულტურების მოვლა-მოყვანის, გადამუშავების თანამედროვე ტექნოლოგიებისა და ლაბორატორიული კვლევების უახლეს მეთოდებს.

თანამშრომლობის მემორანდუმი გაფორმდა ბათუმის შოთა რუსთაველის სახელმწიფო უნივერსიტეტსა და საქართველოს სახელმწიფო მოდერნიზაციის ინსტიტუტს შორის. ხელშეკრულება მიზნად ისახავს ერთობლივი საგანმანათლებლო და შემეცნებითი პროგრამების ამოქმედებას. დოკუმენტის ხელმოწერის შემდეგ ინსტიტუტის კოლეგიის წევრებმა გიორგი კობერიძემ და გიორგი ლემონჯავამ სტუდენტებს პროექტი „უკან მომავალში“ წარუდგინეს და მონაწილეობა შესთავაზეს. პროექტის ფარგლებში დაგეგმილია „საუნივერსიტეტო ქსელისა“ და ონლაინ პლატფორმის ჩამოყალიბება, რაც საშუალებას მისცემს სტუდენტებს მსოფლიოს სხვადასხვა ქვეყნიდან უშუალოდ ჩაერთონ მის განხორციელებაში. პროგრამა ითვალისწინებს საქართველოს ევროინტეგრაციის პროცესის, გამჭვირვალე და ანგარიშვალდებული მმართველობის მხარდაჭერასა და რეფორმათა პაკეტების მომზადებას.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტისა და გერმანიის ევროპული ბიზნესის სკოლის ორგანიზებით I საერთაშორისო საზაფხულო სკოლა ,,ტურიზმი: ეკონომიკა და ბიზნესი“ ტარდება. ხუთდღიანი სწავლება მიზნად ისახავს ტურიზმის ინდუსტრიის სიახლეების გაცნობასა და გერმანელი კოლეგების გამოცდილების გაზიარებას. საერთაშორისო საზაფხულო სკოლის 30-მდე მონაწილე ისეთ მნიშვნელოვან საკითხებს განიხილავენ, როგორიცაა: ტურიზმის განვითარების ხედვა და სტრატეგია, ტურიზმის ინდუსტრიის განვითარების ტენდენციები, ტურიზმი და ეკოლოგია და ტურიზმი გლობალურ დონეზე. ქართველი და გერმანელი სტუდენტები პროფესორ-მასწავლებლებთან ერთად მტირალას ეროვნულ პარკში ვორკშოფებს მოაწყობენ და აჭარის მუნიციპალიტეტებში გაემგზავრებიან აგრო, ეთნო და ეკო ტურიზმის პოტენციალის გასაცნობად.

ტემპუსის პროექტის ფარგლებში უნივერსიტეტში სემინარი გაიხსნა თემაზე: „სამხრეთ კავკასიის უნივერსიტეტების საინჟინრო და საბუნებისმეტყველო სპეციალობების საგანმანათლებლო პროგრამების მათემატიკის კურსების მოდერნიზაცია თანამედროვე ტექნოლოგიების შესაბამისად“. სამი დღის განმავლობაში ქართველი, გერმანელი და სომეხი მათემატიკოსები საინჟინრო და საბუნებისმეტყველო სპეციალობების საგანმანათლებლო პროგრამების მათემატიკის კურსების მოდერნიზაციის საკითხებს განიხილავენ. სწავლება ითვალისწინებს STEM (მეცნიერება, ტექნოლოგია, ინჟინერია და მათემატიკა) დისციპლინებისათვის მათემატიკის კურიკულუმის შედარებით ანალიზს, მათემატიკისა და სტატისტიკის კურიკულუმების სტრუქტურული გაუმჯობესებას ბოლონიის პრინციპებისა და ევროპული გამოცდილების გაზიარებით და ევროპაში აპრობირებული საგანმანათლებლო ტექნოლოგიებთან ერთად სიახლეების დანერგვას პარტნიორ უნივერსიტეტებში.

გაიმართა ბათუმის შოთა რუსთაველის სახელმწიფო უნივერსიტეტის 80 წლის იუბილესადმი მიძღვნილი პირველობა ფუტსალში. შეჯიბრი 1 ივნისს დაიწყო და მასში უმაღლესი საგანმანათლებლო დაწესებულების 8 გუნდი მონაწილეობდა. ფინალურ შეხვედრაში ტურიზმის ფაკულტეტის ნაკრებს იურიდიული ფაკულტეტის ნაკრები დაუპირისპირდა. ტურნირი ტურიზმის ფაკულტეტის გამარჯვებით, ანგარიშით 6:5 დასრულდა. ჩემპიონატი ოლიმპიური სისტემით ჩატარდა.