ახალი ამბები

ბათუმის შოთა რუსთაველის სახელმწიფო უნივერსიტეტის სახალხო ანსამბლი „ტბეთი“ რუმინეთში გასტროლებზე გაემგზავრა. ბსუ-ს სტუდენტები მონაწილეობას მიიღებენ 32-ე საერთაშორისო ფესტივალში „Carpati 2015“, რომელიც 9 აგვისტოს დაიწყება და ერთ კვირას გაგრძელდება. ქორეოგრაფიული ანსამბლის მოცეკვავეები უცხოელი მაყურებლის წინაშე ქორეოგრაფ ზურაბ სვანაძის მიერ დადგმული ფოლკლორული ცეკვებით: „აჭარული“, „ქართული“, „ხევსურული ფარიკაობა“, „ყაზბეგური“, „ქალთა ხორუმი“, „მოხეური“, „აფხაზური“ და „მთიულური“ წარსდგებიან.

ბათუმის შოთა რუსთაველის სახელმწიფო უნივერსიტეტში ათასწლეულის გამოწვევის ფონდი - საქართველოს „პროფესიული განათლება ეკონომიკის განვითარებისთვის“ პროექტის ფარგლებში პროფესიული განათლების განვითარების საგრანტო კონკურსის პრეზენტაცია გაიმართა. პროექტი ათასწლეულის გამოწვევის კორპორაციის დაფინანსებით ამერიკის შეერთებულ შტატებსა და საქართველოს მთავრობას შორის გაფორმებული 140 მილიონი აშშ დოლარის კომპაქტის ფარგლებში, საქართველოს განათლებისა და მეცნიერების სამინისტროსთან თანამშრომლობით ხორციელდება.

თანამშრომლობის მემორანდუმი გაფორმდა ბათუმის შოთა რუსთველის სახელმწიფო უნივერსიტეტსა და სოციალური დაცვის ლიგას შორის. ხელშეკრულება ხელს შეუწყობს ახალგაზრდებისა და შშმ პირების საარჩევნო უფლებების დაცვას, საარჩევნო კულტურის განვითარებასა და სამოქალაქო ცნობიერების ამაღლებას. მემორანდუმი ასევე ითვალისწინებს ახალგაზრდა და შშმპ ამომრჩეველთა სამართლებრივი პრობლემების გამოვლენასა და შესაძლებლობების ფარგლებში მათ დახმარებას. თანამშრომლობის ფარგლებში ბსუ-ს სტუდენტთა მომსახურებისა და მხარდაჭერის სამსახური და სტუდენტური თვითმმართველობა სოციალური დაცვის ლიგასთან ერთად, განახორციელებს სხვადასხვა სახის პროექტებს.

წარმატებით გაიარა აკრედიტაცია ბათუმის შოთა რუსთაველის სახელმწიფო უნივერსიტეტის ახალმა საგანმანათლებლო პროგრამებმა. განათლების ხარისხის განვითარების ეროვნულ ცენტრში წარდგენილი იყო ოთხი სამაგისტრო პროგრამა: ტურიზმისა და მასპინძლობის მენეჯმენტი, ეკოლოგია, სოციოლოგია, ფილოსოფია და ერთი დამატებითი (Minor) პროგრამა - დიგიტალური ჰუმანიტარია. საგანმანათლებლო პროგრამების აკრედიტაციის საბჭოს გადაწყვეტილებით ხუთივე პროგრამამ მოიპოვა განხორციელების უფლება და ახალი სასწავლო წლიდან ამოქმედდება.

ბათუმის შოთა რუსთაველის სახელმწიფო უნივერსიტეტში სასკოლო მზაობის პროგრამის ტრენერთა ტრენინგი იმართება. სწავლება მიზნად ისახავს სასკოლო მზაობის აღმზრდელთა გადამზადებას და სკოლამდელი განათლების სფეროში მიმდინარე რეფორმის გაცნობას. ოთხი დღის განმავლობაში ღონისძიების მონაწილეები შეისწავლიან სასკოლო მზაობის პროგრამას, საგანმანათლებლო სტანდარტებს, ძირითად პრინციპებსა და კომპონენტებს.